ಎಸಿಬಿ ಬಲೆಗೆ ಇಬ್ಬರು ಸರ್ವೆಯರ್‌

ಗದಗ: ನಿವೇಶನದ ನಕ್ಷೆ ತಯಾರಿಸಿ ಕೊಡಲು 1 ಸಾವಿರ ರೂ. ಲಂಚ ಸ್ವೀಕರಿಸುತ್ತಿದ್ದಾಗ ಎಸಿಬಿ ಅಧಿಕಾರಿಗಳು ದಾಳಿ ನಡೆಸಿ ಭೂಮಾಪಕರ ಕಚೇರಿಯ ಇಬ್ಬರು ಸಿಬ್ಬಂದಿಯನ್ನು ವಶಕ್ಕೆ ಪಡೆದಿದ್ದಾರೆ.

ತಹಸೀಲ್ದಾರ್‌ ಕಚೇರಿ ಆವರಣದಲ್ಲಿರುವ ನಗರ ಭೂಮಾಪನ ಕಚೇರಿಯಲ್ಲಿಶುಕ್ರವಾರ ಈ ದಾಳಿ ನಡೆದಿದ್ದು, ಸಿಟಿ ಸರ್ವೆಯರ್‌ಗಳಾದ ರಮೇಶ ಅಮರಪ್ಪ ಮತ್ತು ಮೋಹನ ಚಲವಾದಿ ಎಸಿಬಿ ಅಧಿಕಾರಿಗಳ ಬಲೆಗೆ ಬಿದ್ದಿದ್ದಾರೆ.

ನಗರದ ತಳಗೇರಿ ಓಣಿಯ ನಿವಾಸಿ ಚಂದ್ರಶೇಖರ ಗುತ್ತಿ ಎಂಬವರು ತಮ್ಮ ಚಿಕ್ಕಪ್ಪನ ಹೆಸರಿನಲ್ಲಿರುವ ನಿವೇಶನದ ನಕ್ಷೆ ತಯಾರಿಸಿಕೊಡುವಂತೆ ಅರ್ಜಿ ಸಲ್ಲಿಸಿದ್ದಾರೆ. ಸತತ ಎರಡ್ಮೂರು ತಿಂಗಳಿಂದ ಭೂಮಾಪಕರ ಕಚೇರಿಗೆ ಅಲೆದಾಡಿದ ನಂತರ ಕೆಲಸ ಮಾಡಿಕೊಡಲು ಇವರಿಬ್ಬರೂ 1 ಸಾವಿರ ರೂ. ಬೇಡಿಕೆ ಇಟ್ಟಿದ್ದಾರೆ.

ನಂತರ ಹಣ ನೀಡುತ್ತಿದ್ದಾಗ ದಾಳಿ ನಡೆಸಿದ ಎಸಿಬಿ ಅಧಿಕಾರಿಗಳು ಇಬ್ಬರನ್ನು ವಶಕ್ಕೆ ಪಡೆದಿದ್ದಾರೆ. ಎಸಿಬಿ ಠಾಣೆಯ ಡಿಎಸ್ಪಿ ವಾಸುದೇವ ರಾಮ್‌ ಎನ್‌., ಎ.ಎಸ್‌. ಗುದಿಗೆಪ್ಪ, ವಿಶ್ವನಾಥ ಎಚ್‌., ಬಿ.ಬಿ. ಜಕ್ಕಣ್ಣವರ, ಎಂ.ಎಂ. ಅಯ್ಯನಗೌಡರ, ಆರ್‌.ಎಚ್‌. ಹೆಬಸೂರ, ಎಸ್‌.ಟಿ. ಅಣ್ಣಿಗೇರಿ, ಎಂ.ಎನ್‌. ಕರಿಗಾರ, ಎನ್‌.ಎಸ್‌. ತಾಯಣ್ಣವರ, ಈರಣ್ಣ ಜಾಲಿಹಾಳ, ವೀರೇಶ ಜೋಳದ ದಾಳಿಯಲ್ಲಿಭಾಗವಹಿಸಿದ್ದರು.