ತೋಂಟದ ಶ್ರೀ ಸಮಾಧಿಗೆ ಜಾಟ್‌ ಸಮುದಾಯದ ಭಕ್ತರ ಭೇಟಿ

ಗದಗ : ನಗರದ ತೋಂಟದಾರ್ಯ ಮಠಕ್ಕೆ ದಿಲ್ಲಿಯಿಂದ ಆಗಮಿಸಿದ್ದ ಜಾಟ್‌ ಸಮುದಾಯದ ಭಕ್ತರು ಶುಕ್ರವಾರ ಭೇಟಿ ನೀಡಿ, ಲಿಂಗೈಕ್ಯ ಸಿದ್ಧಲಿಂಗ ಸ್ವಾಮೀಜಿ ಸಮಾಧಿಗೆ ನಮಸ್ಕರಿಸಿ, ಕಂಬನಿ ಮಿಡಿದರು. ಡಾ.ತೋಂಟದ ಸಿದ್ಧಲಿಂಗ ಸ್ವಾಮೀಜಿ ಅವರು ರಾಷ್ಟ್ರೀಯ ಕೋಮು ಸೌಹಾರ್ದತೆ ಪ್ರಶಸ್ತಿ ಪಡೆಯಲು ದಿಲ್ಲಿಗೆ ಹೋದಾಗ ಅಲ್ಲಿನ ಜಾಟ್‌ ಸಮುದಾಯದವರು ಶ್ರೀಗಳನ್ನು ತಮ್ಮ ಮನೆಯಲ್ಲಿ ಆತಿಥ್ಯ ಸ್ವೀಕರಿಸುವಂತೆ ಕೇಳಿಕೊಂಡಿದ್ದರು. ಶ್ರೀಗಳು ಅವರ ಇಚ್ಛೆಯಂತೆ ಜಾಟ್‌ ಸಮುದಾಯದ ಜನರು ವಾಸಿಸುವ ಕೇರಿಗೆ ಹೋಗಿ ಪ್ರಸಾದ ಸ್ವೀಕರಿಸಿದ್ದರು. ಜತೆಗೆ ಅವರಿಗೆ ಲಿಂಗದೀಕ್ಷೆ ನೀಡಿದ್ದರು.

''ತೋಂಟದ ಶ್ರೀಗಳು ಜಾತ್ಯತೀತ ಮನೋಭಾವ ಹೊಂದಿದ್ದರು. ಅವರು ನಮ್ಮೊಂದಿಗೆ ಇಲ್ಲ ಅನ್ನುವ ನೋವು ನಮ್ಮನ್ನು ಕಾಡುತ್ತಿದೆ. ಪ್ರತಿ ವರ್ಷ ತೋಂಟದಾರ್ಯ ಮಠದ ಜಾತ್ರೆಗೆ ಆಗಮಿಸುವ ಮೂಲಕ ಶ್ರೀಗಳೊಂದಿಗೆ ಸಾಕಷ್ಟು ಒಡನಾಟ ಬೆಳೆದಿತ್ತು. ಮುಂದೆಯೂ ಸಹ ನಾಗನೂರು ಸಿದ್ದರಾಮ ಶ್ರೀಗಳ ಜತೆಗೆ ನಮ್ಮ ಒಟನಾಟ ಮುಂದುವರಿಯಲಿದೆ'' ಎಂದು ಜಾಟ್‌ ಸಮುದಾಯದ ಭಕ್ತರು ಹೇಳಿದರು.

ಸಮುದಾಯದ ಮುಖಂಡ ಮನೋಜ, ಮಹಾಂತ ದೇವರು, ಜಯಾಭಾರತಿ ಇದ್ದರು.