ಗಮನ ಸೆಳೆದ 2ಸಾವಿರ ಅಡಿ ತ್ರಿವರ್ಣ ಧ್ವಜ

ಅರಕಲಗೂಡು : ಪಟ್ಟಣದಲ್ಲಿ ವಾಸವಿ ಕ್ಲಬ್‌ ಹಾಗೂ ವನಿತಾ ಕ್ಲಬ್‌ ಸಹಯೋಗದಲ್ಲಿ ಆಯೋಜಿಸಿದ್ದ 10 ಅಡಿ ಅಗಲ ಮತ್ತು 2000 ಅಡಿ ಉದ್ದದ ತ್ರಿವರ್ಣ ರಾಷ್ಟ್ರಧ್ವಜ ಪ್ರದರ್ಶನ 73ನೇ ಸ್ವಾತಂತ್ರ್ಯೋತ್ಸವಕ್ಕೆ ಮೆರುಗು ನೀಡಿತು.

ಗುರುವಾರ ನೂರಾರು ವಿದ್ಯಾರ್ಥಿಗಳು, ಸಂಘಟನೆಗಳ ಕಾರ್ಯಕರ್ತರು ತಾಲೂಕು ಕಚೇರಿ ಆವರಣಕ್ಕೆ ಆಗಮಿಸಿ ಸಂವಿಧಾನ ಶಿಲ್ಪಿ ಅಂಬೇಡ್ಕರ್‌ ಅವರ ಪ್ರತಿಮೆಗೆ ಮಾಲಾರ್ಪಣೆ ಮಾಡಿದ ಬಳಿಕ ರಾಷ್ಟ್ರಧ್ವಜ ಪ್ರದರ್ಶನಕ್ಕೆ ಶಾಸಕ ಎ.ಟಿ.ರಾಮಸ್ವಾಮಿ ಚಾಲನೆ ನೀಡಿದರು.

ಸುಮಾರು ಅರ್ಧ ಕಿಮೀ ದೂರದ ರಾಷ್ಟ್ರಧ್ವಜವನ್ನು ವಿದ್ಯಾರ್ಥಿಗಳು, ಸಂಘಟನೆಗಳ ಕಾರ್ಯಕರ್ತರು, ಶಿಕ್ಷ ಕರು ಕೈಯಲ್ಲಿ ಹಿಡಿದುಕೊಂಡು ದೇಶ ಪ್ರೇಮದ ಘೋಷಣೆಗಳನ್ನು ಕೂಗುತ್ತಾ ಸಾಗಿದರು.

ಮಿನಿ ವಿಧಾನಸೌಧದಿಂದ ಕೋಟೆ ಅನಕೃ ವೃತ್ತ, ಬೈಪಾಸ್‌ ರಸ್ತೆ, ಮುಖ್ಯರಸ್ತೆ ಮೂಲಕ ಸಾಗಿದ ಮೆರವಣಿಗೆ ಬಾಲಕರ ಪದವಿ ಪೂರ್ವ ಕಾಲೇಜು ಆವರಣದಲ್ಲಿ ಸಮಾಪ್ತಿಗೊಂಡಿತು. ಮೆರವಣಿಗೆ ಎಲ್ಲರ ಗಮನ ಸೆಳೆಯಿತು.

ತಹಸೀಲ್ದಾರ್‌ ಶಿವರಾಜ್‌, ತಾಪಂ ಇಒ ರವಿಕುಮಾರ್‌, ತಾಪಂ ಅಧ್ಯಕ್ಷೆ ವೀಣಾಮಂಜುನಾಥ್‌, ಉಪಾಧ್ಯಕ್ಷ ನಾಗರಾಜು, ವಾಸವಿ ಕ್ಲಬ್‌ ಅಧ್ಯಕ್ಷ ಎ.ಜಿ.ರಾಮನಾಥ್‌, ವಕೀಲ ಎ.ಆರ್‌.ಜನಾರ್ದನ ಗುಪ್ತ, ಕ್ಲಬ್‌ ಪದಾಧಿಕಾರಿಗಳಾದ ಅರುಣ್‌, ರಾಜೇಂದ್ರ ಕುಮಾರ್‌, ಪಿ.ನಾಗೇಂದ್ರ ಪ್ರಸಾದ್‌, ಕಿರಣ್‌ ಕುಮಾರ್‌, ಉಷಾ, ಶಾಲಾ ಕಾಲೇಜು ಶಿಕ್ಷ ಕರು, ಉಪನ್ಯಾಸಕರು, ಸಂಘಟನೆಗಳ ಮುಖಂಡರು ಮೆರವಣಿಗೆಯಲ್ಲಿ ಹೆಜ್ಜೆಹಾಕಿದರು.