ವಿಷಪೂರಿತ ಆಹಾರ ಸೇವಿಸಿ 40 ಮಂದಿ ಅಸ್ವಸ್ಥ

ಬೇಲೂರು: ವಿಷಪೂರಿತ ಆಹಾರ ಸೇವಿಸಿ 40ಕ್ಕೂ ಹೆಚ್ಚು ಮಂದಿ ಇಲ್ಲಿನ ಸರಕಾರಿ ಆಸ್ಪತ್ರೆಗೆ ದಾಖಲಾಗಿದ್ದು ಚಿಕಿತ್ಸೆ ಪಡೆಯುತ್ತಿದ್ದಾರೆ. ಅಲ್ಲದೆ, ಮತ್ತೆ ಕೆಲವು ಮಂದಿ ಖಾಸಗಿ ಆಸ್ಪತ್ರೆಗಳಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ.

ಪಟ್ಟಣದ ಚನ್ನೇಗೌಡರ ಬೀದಿಯಲ್ಲಿರುವ ಕೆ.ಜಿ.ಪ್ರಮೋದಾ ಅವರ ಮನೆಯ ಗೃಹ ಪ್ರವೇಶಕ್ಕೆ ಆಗಮಿಸಿದ್ದ ಅತಿಥಿಗಳು ಮಧ್ಯಾಹ್ನ ಊಟ ಸೇವಿಸಿದ ಕೆಲವು ಗಂಟೆಗಳಲ್ಲೇ ಬಹುತೇಕರಿಗೆ ಹೊಟ್ಟೆನೋವಿನೊಂದಿಗೆ ವಾಂತಿ, ಭೇದಿ ಕಾಣಿಸಿಕೊಂಡಿದೆ. ಕೆಲವರಿಗೆ 5ರಿಂದ 15 ಬಾರಿ ವಾಂತಿಯಾಗಿದೆ. ಸಂಜೆ 5 ಗಂಟೆ ನಂತರ ಆಸ್ಪತ್ರೆಗೆ ಚಿಕಿತ್ಸೆಗಾಗಿ ಧಾವಿಸಿದ ರೋಗಿಗಳು ರಾತ್ರಿ 8 ಗಂಟೆಯಾದರೂ ಬರುತ್ತಿದ್ದ ದೃಶ್ಯ ಕಂಡುಬಂತು.

ಸುದ್ದಿಗಾರರೊಂದಿಗೆ ಮಾತನಾಡಿದ ವೈದ್ಯಾಧಿಕಾರಿ ಡಾ.ಪ್ರಮೋದ್ ಹಾಗೂ ನರಸೇಗೌಡ, ‘‘ಸಂಜೆ 5 ಗಂಟೆಯಿಂದ ವಾಂತಿ, ಭೇದಿ, ಹೊಟ್ಟೆನೋವು ಎಂದು ಸುಮಾರು 40ಕ್ಕೂ ಹೆಚ್ಚು ಮಂದಿ ದಾಖಲಾಗಿದ್ದಾರೆ. ಊಟವಾದ ಮೇಲೆ ಈ ರೀತಿ ಆಗಿದೆ ಎಂದು ಗೊತ್ತಾಗಿದೆ. ಸೂಕ್ತ ಚಿಕಿತ್ಸೆ ನೀಡಲಾಗುತ್ತಿದ್ದು ಗುಣ ಮುಖರಾಗುತ್ತಿದ್ದಾರೆ,’’ ಎಂದರು.

ಆಹಾರ ನಿರೀಕ್ಷಕ ನವೀನ್‌ಕುಮಾರ್ ಮಾತನಾಡಿ, ‘‘ವಿಷಯ ತಿಳಿದು ಗೃಹಪ್ರವೇಶ ಮನೆ ಬಳಿಗೆ ವೈದ್ಯಾಧಿಕಾರಿ ನರಸೇಗೌಡ ಅವರೊಂದಿಗೆ ತೆರಳಿ ಆಹಾರವನ್ನು ಪರೀಕ್ಷೆಗೆ ತರಲಾಗಿದ್ದು, ಪ್ರಯೋಗಾಲಯಕ್ಕೆ ಕಳುಹಿಸಲಾಗು ವುದು,’’ ಎಂದು ಹೇಳಿದರು.