ಆಸ್ಪ್ರೇಲಿಯಾ ಮಾದರಿ ರಸ್ತೆ ನಿರ್ಮಾಣಕ್ಕೆ ಕ್ರಮ: ಸಚಿವ

ಹಾಸನ: ಮೈಸೂರು-ಬೆಂಗಳೂರು, ಹುಬ್ಬಳ್ಳಿ, ಬೆಳಗಾವಿ ರಸ್ತೆಗಳನ್ನು ಆಸ್ಪ್ರೇಲಿಯಾ ಮಾದರಿಯಲ್ಲಿ ನಿರ್ಮಿಸಲು ಅಗತ್ಯ ಕ್ರಮ ಕೈಗೊಂಡು ಸರಕಾರದಿಂದ ಮಂಜೂರು ಪಡೆಯಲಾಗುವುದು ಎಂದು ಪಿಡಬ್ಲ್ಯೂಡಿ ಹಾಗೂ ಲೋಕೋಪಯೋಗಿ ಸಚಿವ ಎಚ್‌.ಡಿ.ರೇವಣ್ಣ ಹೇಳಿದರು.

ಪಟ್ಟಣದಲ್ಲಿ ಸುದ್ದಿಗಾರರೊಂದಿಗೆ ಮಾತನಾಡಿ, ''ಆಸ್ಪ್ರೇಲಿಯಾದಲ್ಲಿ 80 ಕಿ.ಮೀ. ವೇಗದಲ್ಲಿ 20 ಚಕ್ರದ ಲಾರಿ, ವಾಹನಗಳು ಸಂಚರಿಸುತ್ತವೆ. ಒಂದ್‌ ಚೂರು ಮೈ, ಕೈ ನೋವೇ ಬರಲ್ಲ. ಸಮುದ್ರ ಪಕ್ಕದಲ್ಲೇ 250 ಕಿ.ಮೀ. ರಸ್ತೆ ನಿರ್ಮಿಸಲಾಗಿದೆ. 70ರಿಂದ 80 ಟನ್‌ ಭಾರ ಹೊತ್‌ಕಂಡು ಶರವೇಗದಲ್ಲಿ ಲಾರಿಗಳು ಸಂಚರಿಸುತ್ತವೆ. ಒಂದಕ್ಕಿಂತ ಮತ್ತೊಂದು ಅತ್ಯುತ್ತಮ ರಸ್ತೆಗಳಿದ್ದು, ಸಾರ್ವಜನಿಕ ವಾಹನಕ್ಕೆ ಬೇರೆ, ಸರಕು ಸಾಗಣೆಗೆ ಬೇರೆ ಮಾರ್ಗಗಳಿವೆ. ಹೀಗೆ ಆರರಿಂದ ಎಂಟು ಪಥದ ರಸ್ತೆಗಳಿವೆ. ನಮ್ಮಲ್ಲೂ ಅಂತಹ ರಸ್ತೆಗಾಗಿ ಶೀಘ್ರದಲ್ಲೇ ಸರಕಾರಕ್ಕೆ ವರದಿ ಸಲ್ಲಿಸುವುದಕ್ಕಾಗಿ ಸೂಪರಿಟೆಂಡೆಂಟ್‌ ಎಂಜಿನಿಯರ್‌, ಎಂಜಿನಿಯರ್‌ಗಳೊಂದಿಗೆ ಆಸ್ಪ್ರೇಲಿಯಾಕ್ಕೆ ತೆರಳಿ ಅಧ್ಯಯನ ನಡೆಸಿದ್ದೇನೆ,'' ಎಂದರು.