ಚಾಕು ಇರಿತ: ವ್ಯಕ್ತಿಗೆ 7 ವರ್ಷ ಜೈಲು

ಚನ್ನರಾಯಪಟ್ಟಣ: ಹಣಕ್ಕಾಗಿ ಅಪರಿಚಿತ ಯುವಕನ್ನು ಚಾಕುವಿನಿಂದ ಇರಿದು ಗಾಯಗೊಳಿಸಿದ್ದ ವ್ಯಕ್ತಿಗೆ ಪಟ್ಟಣದ ನಾಲ್ಕನೇ ಹೆಚ್ಚುವರಿ ಜಿಲ್ಲಾಮತ್ತು ಸೆಷನ್ಸ್‌ ನ್ಯಾಯಾಲಯ 7 ವರ್ಷ ಕಠಿಣ ಸೆರೆವಾಸ ಶಿಕ್ಷೆ ಹಾಗೂ 32 ಸಾವಿರ ರೂ. ದಂಡ ವಿಧಿಸಿ ತೀರ್ಪು ನೀಡಿದೆ.

2014ರ ಏಪ್ರಿಲ್‌ 22 ರಂದು ಪಟ್ಟಣದ ಮಾರಿಗುಡಿ ಬೀದಿ ವಾಸಿಯಾದ ಯೋಗೇಶ ತನ್ನ ತಮ್ಮ ಹರೀಶನೊಂದಿಗೆ ಆನೆಕೆರೆ ಗ್ರಾಮದೇವತೆಯ ಜಾತ್ರೆಯಲ್ಲಿ ಪಾಲ್ಗೊಂಡಿದ್ದ ವೇಳೆ ಅಲ್ಲಿಗೆ ಬಂದ ನುಗ್ಗೇಹಳ್ಳಿ ಹೋಬಳಿ ಮುದ್ದನಹಳ್ಳಿಯ ಜಯರಾಮ ವಿನಾಕಾರಣ ಜಗಳ ತೆಗೆದು ಏಕಾಏಕಿ ಹರೀಶನಿಗೆ ಚಾಕುವಿನಿಂದ ಇರಿದು ಕೊಲೆಗೆ ಯತ್ನಿಸಿದ್ದ. ಈ ವೇಳೆ ಯೋಗೇಶ, ರಂಗಸ್ವಾಮಿ, ಸ್ವಾಮಿ ಮತ್ತು ತೀರ್ಥರಾಜು ಜಗಳ ಬಿಡಿಸಿ ಹರೀಶನನ್ನು ಆಸ್ಪತ್ರೆಗೆ ದಾಖಲು ಮಾಡಿದ್ದರು. ಬಳಿಕ ಹರೀಶ ಚೇತರಿಸಿಕೊಂಡಿದ್ದ. ಅಂದಿನ ಗ್ರಾಮಾಂತರ ಠಾಣೆ ಎಸ್‌ಐ ಪಿ.ಸುರೇಶ್‌ ಕೋರ್ಟ್‌ಗೆ ದೋಷಾರೋಪ ಪಟ್ಟಿ ಸಲ್ಲಿಸಿದ್ದರು. ನ್ಯಾಯಾಧಿಧೀಶರು ವಿಚಾರಣೆ ನಡೆಸಿ ಅಪರಾಧಿ ಜಯರಾಮಗೆ ಶಿಕ್ಷೆ ವಿಧಿಸಿ ತೀರ್ಪು ನೀಡಿದ್ದಾರೆ.

32 ಸಾವಿರ ರೂ. ದಂಡದಲ್ಲಿ 20 ಸಾವಿರ ರೂ. ಗಳನ್ನು ಪರಿಹಾರವಾಗಿ ಗಾಯಾಳು ಹರೀಶನಿಗೆ ನೀಡುವಂತೆ ಆದೇಶ ನೀಡಿದ್ದಾರೆ. ಸರಕಾರದ ಪರವಾಗಿ ಸರಕಾರಿ ಅಭಿಯೋಜಕಿ ಬಿ.ನಾಗಸಂದ್ರಮ್ಮ ವಾದ ಮಂಡಿಸಿದ್ದರು.