ಜಾವಗಲ್‌ನಲ್ಲಿ ಕಾರ ಹುಣ್ಣಿಮೆ ಸಂಭ್ರಮ

ಜಾವಗಲ್‌ : ಹೋಬಳಿಯಲ್ಲಿ ಕೃಷಿಕರು ತಮ್ಮ ಚಟುವಟಿಕೆಗಳಿಗೆ ವಿರಾಮ ನೀಡಿ, ಕಾರ ಹುಣ್ಣಿಮೆ ಆಚರಿಸಿದರು.

ತಮ್ಮ ಮನೆಗಳಲ್ಲಿ ಹಸು, ಕರು, ಎತ್ತುಗಳ ಮೈ ತೊಳೆದು, ಎತ್ತುಗಳ ಕೊಂಬುಗಳಿಗೆ ಸುಣ್ಣ ಹಾಗೂ ಕೆಮಣ್ಣಿನ ಬಣ್ಣ ಹಚ್ಚಿ, ಹೂಮಾಲೆಯಿಂದ ಅಲಂಕರಿಸಿದರು.

ಕೃಷಿ ಉಪಕರಣಗಳಾದ ನೇಗಿಲು, ನೊಗ, ಕುಂಟೆ, ಹೆಡೆಕುಂಟೆ, ಎತ್ತಿನಗಾಡಿ,ಕಬ್ಬುಕುಂಟೆ, ಕೂರಿಗೆ ಸೇರಿದಂತೆ ಹಲವಾರು ಕೃಷಿ ಬಳಕೆಯ ಸಾಮಗ್ರಿಗಳನ್ನು ತೊಳೆದು ಸುಣ್ಣ ಹಾಗೂ ಕೆಮ್ಮಣ್ಣಿನ ಬಣ್ಣ ಹಚ್ಚಿ, ಬೇಟೆ ಸೊಪ್ಪು, ಬೇವಿನ ಸೊಪ್ಪು ಹಾಗೂ ಹೊಂಬಳ್ಳಿ ಕಟ್ಟಿನಿಂದ ಶೃಂಗರಿಸಿ ಅರಿಶಿಣ, ಕುಂಕುಮ, ಹೂಗಳಿಂದ ಪೂಜೆ ಮಾಡಲಾಯಿತು.

ಜೋಡಿ ಎತ್ತುಗಳಿಗೆ ವಿಶೇಷವಾಗಿ ಪೂಜೆ ಸಲ್ಲಿಸಿ, ಕಿಚಿಡಿ, ಅಕ್ಕಿ, ಬೆಲ್ಲ ಹಾಗೂ ಬಾಳೆ ಹಣ್ಣನ್ನು ಅರ್ಪಿಸಿ, ಮಂಗಳಾರತಿ ಹಾಗೂ ಆರತಿ ಬೆಳಗಿ ಸಂಭ್ರಮಿಸಿದರು. ನಂತರ ಕುಟುಂಬವರ್ಗದವರು ಎತ್ತುಗಳೊಂದಿಗೆ ಮನೆಯೊಳಕ್ಕೆ ಪ್ರವೇಶಿಸಿದರು.

ಗ್ರಾಮದ ಕರಿಗಲ್ಲು ಇರುವ ಸ್ಥಳದಲ್ಲಿ ಗ್ರಾಮಸ್ಥರು ಸೇರಿ ಕರಿಗಲ್ಲಿಗೆ ಗ್ರಾಮದ ಪದ್ದತಿಯಂತೆ ಪೂಜೆ ಸಲ್ಲಿಸಿ, ಮಹಾಮಂಗಳಾರತಿ ಮಾಡಿದರು. ನಂತರ ಬೇಟೆ ಸೊಪ್ಪು, ಬೇವಿನ ಸೊಪ್ಪು ಹಾಗೂ ಹೊಂಬಳ್ಳಿ ಕಟ್ಟಿನಿಂದ ತಯಾರಿಸಿದ್ದ ಕರಿಯನ್ನು ಕೆಲವು ಪ್ರಮುಖ ಬೀದಿಗಳಲ್ಲಿ ಎಳೆದು ಸಂಭ್ರಮಿಸಿದರು. ನಂತರ ಕರಿಯಹೊಂಬಳ್ಳಿಯನ್ನು ಮನೆಗಳಿಗೆ ತೆಗೆದುಕೊಂಡು ಹೋಗಿ ದನದ ಕೊಟ್ಟಿಗೆಗೆ ಕಟ್ಟಿದರು.