ಹಾಸನ: ಪತಿ ಶವದೊಂದಿಗೆ ದಿನ ಕಳೆದ ಪತ್ನಿ; ಕೊರೊನಾ ಭೀತಿಯಿಂದ ಮೃತದೇಹ ಮುಟ್ಟಲೂ ಕೂಡ ಸಂಬಂಧಿಕರ ಹಿಂದೇಟು

ಹಾಸನ: ಕೊರೊನಾ ವೈರಸ್‌ನಿಂದ‌ ಮಾನವನ ಸಂಬಂಧಗಳು ಎಷ್ಟು ದುರ್ಬಲ ಎಂಬುದನ್ನು ಪದೇ ಪದೇ ಸಾಬೀತು ಮಾಡುತ್ತಿದೆ. ವ್ಯಕ್ತಿ ಮೃತಪಟ್ಟು ಒಂದು ದಿನ ಕಳೆದರೂ ಕೊರೊನಾ ಭೀತಿಯಿಂದ ಸಂಬಂಧಿಕರು ಯಾರು ಬರದೇ ಮನೆಯಲ್ಲೇ ಒಂದು ದಿನ ಪತಿಯ ಶವದ ಪಕ್ಕದ್ದಲ್ಲೇ ವೃದ್ಧೆ ಕಣ್ಣೀರಿಡುತ್ತಾ ಕುಳಿತ ಮನಕಲಕುವ ಘಟನೆ ನಗರದಲ್ಲಿ ನಡೆದಿದೆ.

ಹಾಸನದ ಬಡಾವಣೆಯೊಂದರ ಮನೆಯಲ್ಲಿ ವಯೋವೃದ್ಧ ಪತಿ ಹಾಗೂ ವೃದ್ಧೆ ಪತ್ನಿ ಇಬ್ಬರೇ ಇದ್ದರು. ಶನಿವಾರ ವಯೋಸಹಜವಾಗಿ ಪತಿ ಅಣ್ಣಪ್ಪಶೆಟ್ಟು ಮೃತಪಟ್ಟಿದ್ದರು. ಕೊರೊನಾ ಭಯದಿಂದ ಮೃತ ಶವ ಮುಟ್ಟಲು ಜನರ ಹಿಂದೇಟು ಹಾಕಿದ್ದರು. ಬಂಧು ಬಳಗ ಮಕ್ಕಳಿಲ್ಲದ ವ್ಯಕ್ತಿ ಮರಣದಿಂದ ಮನೆಯಲ್ಲೇ ದಿಕ್ಕುತೋಚದೆ ವೃದ್ಧೆ ಕುಳಿತಿದ್ದರು.

ಮೃತದೇಹ ನೋಡಿ ಸಂಬಂಧಿಕರು ಕೂಡ ಹೋಗಿದ್ದರು. ಮೃತದೇಹ ಸಾಗಾಟಕ್ಕೆ ಯಾರು ನೆರವು ನೀಡದೇ ಮನೆಯಲ್ಲಿಯೇ ಶವ ಉಳಿದಿತ್ತು. ಅಂತಿಮವಾಗಿ ನಗರಸಭೆ ಅಧಿಕಾರಿಗಳಿಗೆ ವಿಚಾರ ತಿಳಿದರೂ, ಕೊರೊನ ಭೀತಿಯಿಂದ ಮೃತದೇಹ ಸಾಗಿಸಲು ಹಿಂದೇಟು ಹಾಕಿದ್ದರು ಎಂಬ ಆರೋಪ ಕೇಳಿಬಂದಿದೆ.

ಕೊನೆಗೆ ನಗರಸಭೆ ಆಯುಕ್ತ ಕೃಷ್ಣಮೂರ್ತಿ ಆಗಮಿಸಿ ಶವ ಸಾಗಿಸಲು ಕ್ರಮ ಕೈಗೊಂಡು ಅಂತ್ಯ ಸಂಸ್ಕಾರ ನಡೆಸಿಕೊಟ್ಟರು.