ಜಿಂಕೆ ಹತ್ಯೆ: ಆರೋಪಿಗಳ ಪತ್ತೆಗೆ ಬಲೆ

ಅರಕಲಗೂಡು: ತಾಲೂಕಿನ ಗೊಬ್ಬಳಿ ಅರಣ್ಯದಲ್ಲಿ ದುಷ್ಕರ್ಮಿಗಳು ನಾಡಬಂದೂಕಿನಿಂದ ಜಿಂಕೆಯೊಂದನ್ನು ಕೊಂದಿದ್ದು, ಆರೋಪಿಗಳ ಪತ್ತೆಗೆ ಇಲಾಖೆ ಬಲೆ ಬೀಸಿದೆ.

ಈ ಭಾಗದಲ್ಲಿ ಹೊರಜಿಲ್ಲೆಯ ತಂಡವೊಂದು ಬೇಟೆಗಾಗಿ ಬಂದು ಹಂಪಾಪುರ ಗ್ರಾಮದ ಕೆಲವರ ಸಹಕಾರದಿಂದ ಜಿಂಕೆಯನ್ನು ಕೊಂದಿದ್ದಾರೆ ಎನ್ನುವ ಅನುಮಾನ ವ್ಯಕ್ತವಾಗಿದೆ. ಜಿಂಕೆಯ ದೇಹದಲ್ಲಿ ಎರಡು ಕಡೆ ಗುಂಡೇಟು ಬಿದ್ದಿರುವ ಗಾಯ ಪರೀಕ್ಷಾ ವೇಳೆ ಪತ್ತೆಯಾಗಿದೆ,''ಎಂದು ಸಕಲೇಶಪುರ ಉಪ ವಿಭಾಗದ ಸಹಾಯಕ ಉಪ ಅರಣ್ಯ ಸಂರಕ್ಷ ಣಾಧಿಕಾರಿ ಲಿಂಗರಾಜು ಪತ್ರಿಕೆಗೆ ತಿಳಿಸಿದರು.

ವಲಯ ಅರಣ್ಯಾಧಿಕಾರಿ ವಿನಯ್‌ಚಂದ್ರ ಮಾತನಾಡಿ, ''ಗೊಬ್ಬಳಿ ಅರಣ್ಯದಲ್ಲಿ ಜಿಂಕೆ ಮೃತಪಟ್ಟಿರುವ ಬಗ್ಗೆ ದನಗಾಹಿಗಳಿಂದ ಮಾಹಿತಿ ಲಭ್ಯವಾಗಿದೆ. ಈಗಾಗಲೇ ಕೃತ್ಯದಲ್ಲಿ ಭಾಗಿಯಾದವರ ಪತ್ತೆಗೆ ಶೋಧ ನಡೆಸುತ್ತಿದ್ದು, ಸದ್ಯದಲ್ಲಿಯೇ ಆರೋಪಿಗಳನ್ನು ವಶಕ್ಕೆ ಪಡೆಯಲಾಗುವುದು. ಇತ್ತೀಚೆಗೆ ಬೆಟ್ಟದರಂಗನಾಥಸ್ವಾಮಿ ಬೆಟ್ಟದಲ್ಲಿ ಉರುಳಿಗೆ ಸಿಲುಕಿ ಮೃತಪಟ್ಟಿರುವ ಚಿರತೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ವಿಚಾರಣೆ ಹಂತ ಮುಗಿದಿದೆ,''ಎಂದು ಹೇಳಿದರು.