ಬೇಲೂರಿನಲ್ಲಿ ಮಿತಿಮೀರಿದ ಬೀದಿನಾಯಿ ಹಾವಳಿ

ಬೇಲೂರು: ಪಟ್ಟಣದಾದ್ಯಂತ ಬೀದಿ ನಾಯಿಗಳ ಹಾವಳಿ ಹೆಚ್ಚಾಗಿದ್ದರೂ ಅದರ ನಿಯಂತ್ರಣಕ್ಕೆ ಸಂಬಂಧಿಸಿದವರು ಯಾವುದೇ ಕ್ರಮ ಕೈಗೊಳ್ಳದ ಪರಿಣಾಮ ಸಾರ್ವಜನಿಕರು ನಿತ್ಯ ಸಮಸ್ಯೆ ಎದುರಿಸುವಂತಾಗಿದೆ.

ಹಗಲು, ರಾತ್ರಿ ಎನ್ನದೆ ಎಲ್ಲಂದರಲ್ಲಿ ತಂಡೋಪತಂಡವಾಗಿ ಸಂಚರಿಸುವ ಬೀದಿ ನಾಯಿಗಳಿಂದ ಸಾರ್ವಜನಿಕರು ಆತಂಕಗೊಂಡಿದ್ದಾರೆ. ಇಲ್ಲಿನ ಬಸ್‌ ನಿಲ್ದಾಣ, ಶ್ರೀಚನ್ನಕೇಶವ ದೇಗುಲದ ಮುಂಭಾಗ, ಮುಖ್ಯರಸ್ತೆ ಸೇರಿದಂತೆ ಬಡಾವಣೆಯ ಬೀದಿ ಬೀದಿಗಳಲ್ಲಿ ನಾಯಿಗಳು ಗುಂಪು ಗುಂಪಾಗಿ ಕಂಡುಬರುತ್ತಿದೆ.

ಬೀದಿ ನಾಯಿಗಳು ಕಂಡ ಪುಟ್ಟಮಕ್ಕಳು ಭಯಪಡುತ್ತಿದ್ದಾರೆ. ದೊಡ್ಡವರು ಯಾವ ಸಂದರ್ಭದಲ್ಲಿ ಮಕ್ಕಳ ಮೇಲೆ ದಾಳಿ ಮಾಡುತ್ತವೆಯೋ, ದಾರಿಯಲ್ಲಿ ಹೋಗುವಾಗ ಕಚ್ಚುತ್ತವೆಯೊ ಎಂಬ ಹೆದರಿಕೆಯಲ್ಲಿದ್ದಾರೆ.

ಬೀದಿ ನಾಯಿಗಳ ಹಾವಳಿ ಮಿತಿಮೀರಿದ್ದರೂ ಸಹ ಪುರಸಭೆ ಅಧಿಕಾರಿಗಳು ಏಕೆ ಮೌನವಾಗಿದ್ದಾರೆ ಎಂಬುದು ತಿಳಿಯುತ್ತಿಲ್ಲ. ನಾಯಿಗಳ ಸಾಯಿಸಲು ಅವಕಾಶ ಇಲ್ಲ. ಹಾಗಂತ ಮೌನವಾಗಿರಲೂ ಸಾಧ್ಯವಿಲ್ಲ. ನಿಯಮದ ಪ್ರಕಾರ ನಾಯಿ ಹಾವಳಿ ತಡೆಗೆ ಏನು ಮಾಡಬೇಕೆಂಬುದನ್ನು ಅಧಿಕಾರಿ ಯೋಚಿಸಿ ನಿರ್ಧಾರ ಕೈಗೊಳ್ಳುವ ಅಗತ್ಯವಿದೆ. ಇಲ್ಲದಿದ್ದರೆ ನಾಯಿಗಳ ಸಂಖ್ಯೆ ಮತ್ತಷ್ಟು ಹೆಚ್ಚುವ ಸಾಧ್ಯತೆಯಿದೆ ಎನ್ನುತ್ತಾರೆ ನಾಗರೀಕರು.