ಕರ್ತವ್ಯಲೋಪ: ಮೂವರ ಅಮಾನತು

ಅರಕಲಗೂಡು: ಚುನಾವಣಾ ಕರ್ತವ್ಯಕ್ಕೆ ನಿಯೋಜನೆಯಾಗಿದ್ದ ಮೂವರು ಸಿಬ್ಬಂದಿಯನ್ನು ಕರ್ತವ್ಯ ಲೋಪದ ಆರೋಪದ ಮೇಲೆ ಚುನಾವಣಾಧಿಕಾರಿಯೂ ಆದ ಜಿಲ್ಲಾಧಿಕಾರಿ ಅಕ್ರಂ ಪಾಷ ಅಮಾನತುಗೊಳಿಸಿ ಆದೇಶ ಹೊರಡಿಸಿದ್ದಾರೆ.

ಕಾಲೇಜಿನ ಉಪನ್ಯಾಸಕ ಎಸ್‌.ವೈ.ದೀಪು, ಬನ್ನೂರು ಗ್ರಾಪಂ ಕಾರ್ಯದರ್ಶಿ ಸುನೀಲ್‌, ಆಲದಹಳ್ಳಿ ಗ್ರಾಪಂ ಕಾರ್ಯದರ್ಶಿ ಯೋಗೇಶ್‌ ಹಾಗೂ ಪೇದೆ ಕೃಷ್ಣ, ಗೃಹರಕ್ಷ ಕ ಸ್ವಾಮಿಗೌಡ ಎಂಬುವರನ್ನು ಅರಕಲಗೂಡು ವಿಧಾನಸಭಾ ಕ್ಷೇತ್ರದ ಹಿಪ್ಪಲಿ ಚೆಕ್‌ಪೋಸ್ಟ್‌ಗೆ ನಿಯೋಜಿಸಲಾಗಿತ್ತು.

ಮಾ.19ರಂದು ರಾತ್ರಿ 11.25ರ ವೇಳೆ ಜಿಲ್ಲಾ ಚುನಾವಣಾಧಿಕಾರಿ, ಅರಕಲಗೂಡು ತಹಸೀಲ್ದಾರ್‌ ಸಂಬಂಧಿಸಿದ ಚೆಕ್‌ಪೋಸ್ಟ್‌ಗೆ ಭೇಟಿ ನೀಡಿದ ವೇಳೆ ಈ ಐದು ಮಂದಿ ಕರ್ತವ್ಯಕ್ಕೆ ಹಾಜರಾಗಿರಲಿಲ್ಲ. ಚುನಾವಣಾ ಕರ್ತವ್ಯಲೋಪವೆಂದು ಪರಿಗಣಿಸಿ ಈ ಅಮಾನತುಗೊಳಿಸಿದ್ದಾರೆ.

ಪೇದೆ ಕೃಷ್ಣ ಮತ್ತು ಗೃಹರಕ್ಷ ಕ ಸ್ವಾಮಿಗೌಡ ವಿರುದ್ಧ ಕ್ರಮ ಕೈಗೊಳ್ಳುವ ಕುರಿತು ಇಲಾಖೆ ಮೇಲಧಿಕಾರಿಗೆ ಮಾಹಿತಿ ರವಾನಿಸಲಾಗಿದೆ.