ಹಾಸನ್‌ ಕ್ಲಬ್‌ಗೆ ಮಾರ್ಚ್‌ 2ಕ್ಕೆ ಚುನಾವಣೆ

ಹಾಸನ: ಇತ್ತೀಚಿನ ದಿನದಲ್ಲಿ ಸುದ್ದಿಯಲ್ಲಿರುವ ಹಾಸನ್‌ ಕ್ಲಬ್‌ ಅಧ್ಯಕ್ಷರು, ನಿರ್ದೇಶಕ ಸ್ಥಾನಗಳಿಗೆ ಮಾ.2ರಂದು ಚುನಾವಣೆ ನಿಗದಿಯಾಗಿದ್ದು, ಈ ಬಾರಿಯ ಚುನಾವಣೆ ಜಿದ್ದಾಜಿದ್ದಿಗೆ ಕಾರಣವಾಗುವ ಲಕ್ಷಣ ಕಂಡುಬರುತ್ತಿದೆ.

ಹಣ ದುರುಪಯೋಗ ಮತ್ತಿತರ ಆರೋಪದ ಹಿನ್ನೆಲೆಯಲ್ಲಿ ಜಿಲ್ಲಾಧಿಕಾರಿ ರೋಹಿಣಿ ಸಿಂಧೂರಿ ಅಧಿಕಾರಿಗಳ ಮೂಲಕ ತನಿಖೆ ನಡೆಸಿ, ಹಿಂದಿನ ಆಡಳಿತ ಮಂಡಳಿ ನಿರ್ಮಿಸಿದ ನೂತನ ಕಟ್ಟಡ ಖರ್ಚು, ವೆಚ್ಚದಲ್ಲಿ ಲೋಪ ಕಂಡುಬಂದಿದೆ ಎಂಬ ಆರೋಪದ ವರದಿ ಹಿನ್ನೆಲೆಯಲ್ಲಿ ಹಣವನ್ನು ಮರುಪಾವತಿ ಮಾಡುವಂತೆ ಸೂಚಿಸಲಾಗಿದೆ. ಅಷ್ಟೇ ಅಲ್ಲದೆ ಚುನಾಯಿತ ಅಧ್ಯಕ್ಷರ ಬದಲಿಸಿ, ಡಾ.ಅಶೋಕ್‌ಗೌಡರನ್ನು ಡಿಸಿ ನೇಮಿಸಿದ್ದರು. ಕ್ಲಬ್‌ನಲ್ಲಿ ಇಸ್ಪೀಟ್‌ ಆಡದಂತೆ ಪೊಲೀಸ್‌ ಅಧಿಕಾರಿಗಳು ಸೂಚನೆ ನೀಡಿ ಬಂದಿದ್ದರು.

ಈ ಎಲ್ಲ ಬೆಳವಣಿಗೆ ಬಳಿಕ ಇತ್ತೀಚೆಗೆ ಜಿಲ್ಲಾಧಿಕಾರಿ ರೋಹಿಣಿ ಸಿಂಧೂರಿ ಅಧ್ಯಕ್ಷತೆಯಲ್ಲಿ ನಡೆದ ಸರ್ವ ಸದಸ್ಯರ ಸಭೆಯಲ್ಲಿ ಕೆಲ ವಿಷಯಗಳನ್ನು ಚರ್ಚಿಸಿ, ಬೈಲಾದ ನಿಯಮಾವಳಿ ಬದಲಿಸಿ, ಮಾರ್ಚ್‌ 2 ರಂದು ಚುನಾವಣೆ ನಡೆಸಲು ನಿರ್ಧರಿಸಲಾಗಿದೆ ಎಂದು ಮೂಲ ತಿಳಿಸಿದೆ.

ಉಪಾಧ್ಯಕ್ಷರು, ಖಜಾಂಚಿ ,ನಿರ್ದೇಶಕ ಸ್ಥಾನಕ್ಕೆ ಚುನಾವಣೆ ನಿಗದಿಯಾಗಿದ್ದು, ಆಕಾಂಕ್ಷಿಗಳ ಸಂಖ್ಯೆಯೂ ದಿನದಿಂದ ದಿನಕ್ಕೆ ಹೆಚ್ಚುತ್ತಿದೆ. ಹಿಂದಿನ ಸಮಿತಿಯಲ್ಲಿ ಪದಾಧಿಕಾರಿಗಳು ಆಗಿದ್ದವರು ಸ್ಪರ್ಧಿಸುವಂತಿಲ್ಲ. ಕ್ರಿಮಿನಲ್‌ ಹಿನ್ನೆಲೆಯುಳ್ಳವರು, ಕ್ರಿಯಾಶೀಲ ರಾಜಕಾರಣಿಯಾಗಿರುವವರು ಕೂಡ ಕ್ಲಬ್‌ ಚುನಾವಣೆಯಲ್ಲಿ ಸ್ಪರ್ಧೆ ಮಾಡುವಂತಿಲ್ಲ ಎಂಬ ಬೈಲ ತಿದ್ದುಪಡಿ ಮಾಡಿರುವುದು ಹಲವರಿಗೆ ನಿರಾಸೆಯನ್ನುಂಟು ಮಾಡಿದೆ. 500ಕ್ಕೂ ಹೆಚ್ಚು ಸದಸ್ಯರನ್ನು ಹೊಂದಿರುವ ಪ್ರತಿಷ್ಠಿತ ಕ್ಲಬ್‌ ಇಷ್ಟು ಸುದೀರ್ಘ ವರ್ಷ ಹಲವು ಪ್ರಮುಖ ವ್ಯಕ್ತಿಗಳು ಒಳ್ಳೆಯ ಹೆಸರು ತಂದಿದ್ದರು. ಪ್ರಸ್ತುತ ದಿನದಲ್ಲಿ ಹಣವಂತರೆಲ್ಲ ಸದಸ್ಯರಾಗಿದ್ದಾರೆ. ಅಸಮಾಧಾನಗೊಂಡಿರುವ ಗುಂಪು ಈ ಹಿಂದೆಯೇ ಆಡಳಿತ ಮಂಡಳಿ ವಿರುದ್ಧ ಡಿಸಿಗೆ ದೂರು ಸಲ್ಲಿಸಿದ ಬಳಿಕ ಸುಧಾರಣೆ ನಿಟ್ಟಿನಲ್ಲಿ ಡಿಸಿ ಹಲವು ಕ್ರಮ ಕೈಗೊಂಡಿದ್ದು, ಅವರ ನಿರ್ಧಾರಕ್ಕೆ ಮೆಚ್ಚುಗೆಯೂ ವ್ಯಕ್ತವಾಗಿದೆ.