ಪೊಲೀಸರ ಖೆಡ್ಡಕ್ಕೆ ಬಿದ್ದ ನಕಲಿ ವೀರ

ಹಾಸನ: ವಿಶೇಷಚೇತನ ಸೇರಿದಂತೆ ನಾನಾ ಸಾಮಾಜಿಕ ಭದ್ರತಾ ಯೋಜನೆಗಳ ಮಾಸಾಶನ ಪಡೆಯಲು ನಕಲಿ ದಾಖಲೆ ಸೃಷ್ಟಿಸಿಕೊಡುತ್ತಿದ್ದ ಆರೋಪಿ ಮನೆಯನ್ನು ಜಾಲಾಡಿರುವ ಪೊಲೀಸರು, ವೈದ್ಯರು ಹಾಗೂ ನಾನಾ ಇಲಾಖೆ ಹಿರಿಯ ಅಧಿಕಾರಿಗಳ ಹೆಸರಿನಲ್ಲಿದ್ದ ಐದು ಸೀಲ್‌ಗಳನ್ನು ವಶಪಡಿಸಿಕೊಂಡಿದ್ದಾರೆ.

''ವಿಶೇಷಚೇತನರ ಕಾರ್ಡ್‌ ಮಾಡಿಸುವ ನೆಪದಲ್ಲಿ ಬೀಸಿದ ಬಲೆಗೆ ಸೋಮವಾರ ಆರೋಪಿ ಸಿಕ್ಕಿಬಿದ್ದಿದ್ದಾನೆ. ಪೊಲೀಸ್‌ ವಶದಲ್ಲಿರುವ ಆರೋಪಿ ಮೋಹನಕುಮಾರನ ವಲ್ಲಭಬಾಯಿ ರಸ್ತೆಯ ಮನೆಯಲ್ಲಿ ಶೋಧ ಕಾರ್ಯ ನಡೆಸಿದ್ದು, ಕೆಲವು ದಾಖಲೆಗಳು ಸಿಕ್ಕಿವೆ,'' ಎಂದು ಎಸ್‌ಐ ಸುರೇಶ್‌ ತಿಳಿಸಿದ್ದಾರೆ.

''ಹಿಮ್ಸ್‌ ವೈದ್ಯಾಧಿಕಾರಿ, ತಹಸೀಲ್ದಾರ್‌, ಅಂಗವಿಕಲರ ಕಲ್ಯಾಣಾಧಿಕಾರಿ ಸೇರಿದಂತೆ ಐದು ಜನ ಅಧಿಕಾರಿಗಳ ಸೀಲ್‌ಗಳು ಪತ್ತೆಯಾಗಿವೆ. ಜತೆಗೆ ನಕಲಿ ಸಹಿ ಮಾಡಲು ಬಳಸುತ್ತಿದ್ದ ಪೆನ್‌ ವಶಪಡಿಸಿಕೊಳ್ಳಲಾಗಿದೆ,'' ಎಂದಿದ್ದಾರೆ.

''ಆರೋಪಿಯು ತನ್ನ ಕೃತ್ಯದ ಬಗ್ಗೆ ಸಂಪೂರ್ಣವಾಗಿ ಬಾಯಿ ಬಿಡುತ್ತಿಲ್ಲ. ಹೀಗಾಗಿ ಮಂಗಳವಾರ ನ್ಯಾಯಾಲಯಕ್ಕೆ ಹಾಜರುಪಡಿಸಿ, ಹೆಚ್ಚಿನ ವಿಚಾರಣೆಗಾಗಿ ಪೊಲೀಸ್‌ ವಶಕ್ಕೆ ಪಡೆಯಲಾಗಿದೆ,'' ಎಂದು ಸುರೇಶ್‌ ಹೇಳಿದರು.