ಎಟಿಅರ್‌ ಕುಟುಂಬದಿಂದ ಭೂ ಅಕ್ರಮ

ಹಾಸನ: ಭೂ ಕಬಳಿಕೆ ವಿರೋಧಿ ಹೋರಾಟ ಸಮಿತಿ ನೇತೃತ್ವ ವಹಿಸಿದ್ದ ಶಾಸಕ ಎ.ಟಿ. ರಾಮಸ್ವಾಮಿ ಅವರ ಅಣ್ಣನ ಮಕ್ಕಳು, ಸಂಬಂಧಿಕರೇ 70ರಿಂದ 80 ಎಕರೆ ಭೂ ಒತ್ತುವರಿ ಮಾಡಿದ್ದು, ಇದೊಂದು ರೀತಿ ಬೇಲಿಯೇ ಎದ್ದು ಹೊಲ ಮೇಯ್ದ ಕತೆಯಂತಾಗಿದೆ ಎಂದು ಮಾಜಿ ಸಚಿವ ಎ.ಮಂಜು ಆರೋಪಿಸಿದರು.

''ಜಿಲ್ಲಾಪಂಚಾಯಿತಿ ಮತ್ತು ತಾಲೂಕು ಪಂಚಾಯಿತಿಯ ಅನುದಾನದಲ್ಲಿಶಾಸಕರು ತಮ್ಮ ತೋಟದ ಮನೆಗೆ ರಸ್ತೆಯನ್ನು ಮಾಡಿಸಿಕೊಂಡು ಅಕ್ರಮ ಎಸಗಿದ್ದಾರೆ,'' ಎಂದು ಸುದ್ದಿಗೋಷ್ಠಿಯಲ್ಲಿ ಆರೋಪಿಸಿದರು.

''ಬೆಂಗಳೂರಿನಲ್ಲಿಭೂಕಬಳಿಕೆ ವಿರೋಧಿ ಹೋರಾಟ ಮಾಡುವ ಶಾಸಕ ಎ.ಟಿ.ರಾಮಸ್ವಾಮಿ ಮೊದಲು ಕೊಣನೂರು ಹೋಬಳಿ ಬಿಸಲಹಳ್ಳಿ ಸರ್ವೆನಂ 7/1.7/2,8/1ಎ ಹಾಗೂ 8/1ಎ.2 ರಲ್ಲಿಹಾದುಹೋಗಿರುವ ಹಾಗೂ ಸರ್ವೆ ನಂ 8/1ಬಿ ಹಾದುಹೋಗಿರುವ ಕಾಲುದಾರಿ ಮತ್ತು ಬಂಡಿ ಪ್ರದೇಶವನ್ನು ಒತ್ತುವರಿ ಮಾಡಿದವರು ಯಾರು ಎಂಬುದನ್ನು ಶಾಸಕರು ಹೇಳಬೇಕು,'' ಎಂದು ಒತ್ತಾಯಿಸಿದರು.

''ಕೊಣನೂರು ಹೋಬಳಿ ಚಿಕ್ಕಬೊಮ್ಮನಹಳ್ಳಿ ಗ್ರಾಮದ ಸರ್ವೆನಂ 93ರಲ್ಲಿರಾಜ್ಯ ವಿದ್ಯುತ್‌ ಪ್ರಸರಣಾ ನಿಗಮಕ್ಕೆ ಎರಡು ಎಕರೆ ಜಮೀನು ಮೀಸಲಿದ್ದು, ಅದೇ ಸರ್ವೆ ನಂ 93ರಲ್ಲಿಉಳಿಕೆ 4.13 ಗುಂಟೆ ಸರಕಾರಿ ಬೀಳು ಮತ್ತು ಸರ್ವೆ ನಂ 91 ಮತ್ತು 92ರಲ್ಲಿ1.18 ಎಕರೆ ಮತ್ತು 5.17 ಎಕರೆ ಸರಕಾರಿ ಬೀಳು ಅನುಭವಿಸುತ್ತಿರುವವರು ಶಾಸಕ ಎ.ಟಿ.ರಾಮಸ್ವಾಮಿ ಅಣ್ಣನ ಮಕ್ಕಳು ಮತ್ತು ಹಿಂಬಾಲಕರು.ಆ ಭೂಮಿಯನ್ನು ಬೇರೆಯವರಿಗೆ ಬೆಳೆ ಬೆಳೆಯಲು ಕೊಟ್ಟಿರುವುದು ಸುಳ್ಳೇ ಶಾಸಕರೇ,'' ಎಂದು ದಾಖಲೆ ಪ್ರದರ್ಶಿಸಿದರು.