ಪೆಟ್ರೋಲ್‌,ಡೀಸೆಲ್‌ ಬೆಲೆ ಏರಿಕೆ ಖಂಡಿಸಿ ಧರಣಿ

ಹಾಸನ: ಪೆಟ್ರೋಲ್‌,ಡೀಸೆಲ್‌ ಬೆಲೆ ಏರಿಕೆ ಖಂಡಿಸಿ ನಗರದಲ್ಲಿ ಸಿಪಿಐ(ಎಂ) ಕಾರ್ಯಕರ್ತರು ಹೇಮಾವತಿ ಪ್ರತಿಮೆ ಬಳಿ ಧರಣಿ ನಡೆಸಿದರು.

ಪ್ರತಿದಿನ ಪೆಟ್ರೋಲ್‌,ಡೀಸೆಲ್‌ ಬೆಲೆ ಏರಿಕೆಯಾಗುತ್ತಲೇ ಇದ್ದು, ಬಡವರು ಬದುಕು ನಡೆಸುವುದು ಕಷ್ಟಕರವಾಗಿದೆ. ಕೇಂದ್ರ ಸರಕಾರ ಬೆಲೆ ಇಳಿಕೆಗೆ ಯಾವ ಗಂಭೀರ ಪ್ರಯತ್ನ ನಡೆಸಿಲ್ಲ ಎಂದು ಆರೋಪಿಸಿ ಘೋಷಣೆ ಕೂಗಿದರು.

ಪ್ರತಿದಿನ ದರ ಬದಲಾವಣೆ ನೀತಿ ಜಾರಿಗೆ ತಂದು ಪೆಟ್ರೋಲಿಯಂ ಕಂಪನಿಗೆ ಲಾಭ ಮಾಡಿಕೊಡುತ್ತಿರುವ ಸರಕಾರ ಜನಸಾಮಾನ್ಯರ ಜೇಬಿಗೆ ಕತ್ತರಿ ಹಾಕುತ್ತಿದೆ ಎಂದು ದೂರಿದರು.

2014ರಲ್ಲಿ ಕಚ್ಛಾತೈಲ ಬ್ಯಾರಲ್‌ಗೆ 105.50 ಡಾಲರ್‌ ಇತ್ತು. ಇದು 2018ರಲ್ಲಿ 55.71ಕ್ಕೆ ಇಳಿಯಿತು. ನಾಲ್ಕುವರ್ಷದಲ್ಲಿ ಅರ್ಧದಷ್ಟು ಬೆಲೆ ಇಳಿಕೆಯಾಗಿದ್ದರೂ,ಬೆಲೆ ಮಾತ್ರ ಏರಿಕೆಯಾಗುತ್ತಲೇ ಇದೆ. ನಾಲ್ಕುವರ್ಷದ ಹಿಂದೆ ಲೀಟರ್‌ ಪೆಟ್ರೋಲ್‌ಗೆ 72.26 ರೂ.ಇತ್ತು ಈಗ 77.48ಕ್ಕೆ ಏರಿಕೆಯಾಗಿದೆ. ಇಷ್ಟೊಂದು ಪ್ರಮಾಣದಲ್ಲಿ ಬೆಲೆ ಏರಿಕೆಯಾಗಲು ಕೇಂದ್ರ ಸರಕಾರ ವಿಧಿಸುತ್ತಿರುವ ಅಬಕಾರಿ ಸುಂಕ ,ರಾಜ್ಯ ಸರಕಾರದ ವ್ಯಾಟ್‌ ವಿಧಿಸುವ ಕಾರಣ ಜನಸಾಮಾನ್ಯರು ಹೊರೆ ಹೊರುವಂತಾಗಿದೆ. ಪೆಟ್ರೋಲ್‌,ಡೀಸೆಲ್‌ ಮೇಲೆ ವಿಧಿಸಿರುವ ಯತೇಚ್ಛ ಅಬಕಾರಿ ಸುಂಕವನ್ನು ಕಡಿಮೆ ಮಾಡಿ ಬೆಲೆ ಇಳಿಸಬೇಕು ಎಂದು ಆಗ್ರಹಿಸಿದೆ. ಸಿಪಿಐ(ಎಂ)ನ ಕಾರ್ಯದರ್ಶಿ ನವೀನ್‌ ಮತ್ತಿತರರು ಹಾಜರಿದ್ದರು.