ಕಾಡುಹಂದಿ ದಾಳಿ: ರೈತರಿಗೆ ಗಾಯ

ವನಗೂರು(ಸಕಲೇಶಪುರ): ತಾಲೂಕಿನ ಹೆತ್ತೂರು ಹೋಬಳಿಯ ಬಿಸಿಲೆ ಘಾಟ್‌ ಸಮೀಪದ ಆನೆಗುಂಡಿ ಗ್ರಾಮದಲ್ಲಿ ಕಾಡುಹಂದಿ ದಾಳಿಯಿಂದ ಇಬ್ಬರು ರೈತರು ಗಂಭೀರವಾಗಿ ಗಾಯಗೊಂಡಿರುವ ಘಟನೆ ಬುಧವಾರ ನಡೆದಿದೆ.

ಘಟನೆ ಹಿನ್ನಲೆ: ಗ್ರಾಮದ ತಮ್ಮಣ್ಣ ಗೌಡ ಎಂಬುವವರು ಗದ್ದೆ (ಏಲಕ್ಕಿ ಮಡಿ) ಯಲ್ಲಿ ಕೆಲಸ ಮಾಡುವಾಗ ಬುಧವಾರ ಬೆಳಗ್ಗೆ 7ಕ್ಕೆ ಕಾಡು ಹಂದಿಗಳ ಹಿಂಡು ಏಕಾಏಕಿ ದಾಳಿ ನಡೆಸಿದ್ದು ರೈತನ ತೊಡೆ ಹಾಗೂ ಕಾಲಿಗೆ ಗಂಭೀರವಾಗಿ ಗಾಯವಾಗಿದೆ. ಇದೇ ಸಮಯದಲ್ಲಿ ಕಾಡು ಹಂದಿ ದಾಳಿಯಿಂದ ತಮ್ಮಣ್ಣನನ್ನು ರಕ್ಷಿಸಲು ಬಂದ ಮತ್ತೊಬ್ಬ ರೈತ ಜಯಪ್ಪಗೌಡ ಅವರ ಮೇಲು ದಾಳಿ ಮಾಡಿದ್ದು ಗಾಯಗೊಂಡ ಇಬ್ಬರು ರೈತರನ್ನು ಸಕಲೇಶಪುರ ಆಸ್ಪತ್ರೆಗೆ ದಾಖಲಿಸಿ ಹೆಚ್ಚಿನ ಚಿಕಿತ್ಸೆಗೆ ಹಾಸನಕ್ಕೆ ಸಾಗಿಸಲಾಗಿದೆ.

ಪರಿಹಾರಕ್ಕೆ ಆಗ್ರಹ: ಕಾಡು ಹಂದಿ ದಾಳಿಯಿಂದ ಗಂಭೀರವಾಗಿ ಗಾಯಗೊಂಡಿರುವ ರೈತರು ಇಬ್ಬರಿಗೆ ಅರಣ್ಯ ಇಲಾಖೆಯಿಂದ ಸೂಕ್ತ ಚಿಕಿತ್ಸೆ ನೀಡಿ ಪರಿಹಾರ ನೀಡಬೇಕು ಎಂದು ಸ್ಥಳೀಯರು, ಪರಿಸರ ಪ್ರೇಮಿ ಗೊದ್ದು ಉಮೇಶ್‌ ಆಗ್ರಹಿಸಿದ್ದಾರೆ.