ಅರ್ಧ ಕ್ವಿಂಟಾಲ್‌ ತೂಗುವ ಹಲಸು !

ಚನ್ನರಾಯಪಟ್ಟಣ: ಬಯಲು ಸೀಮೆಯ ಹಲಸಿನ ಹಣ್ಣೊಂದು ಅರ್ಧ ಕ್ವಿಂಟಾಲ್‌ಗೂ ಹೆಚ್ಚು ತೂಗುವ ಮೂಲಕ ಎಲ್ಲರ ಗಮನ ಸೆಳೆದಿದೆ.

ತಾಲೂಕಿನ ಶ್ರವಣೇರಿ ಗ್ರಾಮದ ತೋಪೇಗೌಡ ಎಂಬುವರ ತೋಟದಲ್ಲಿರುವ 15 ವರ್ಷದ ಹಲಸಿನ ಮರ ಈ ಬಾರಿ ಅಚ್ಚರಿಯ ಫಸಲು ನೀಡಿದೆ.

ತೋಟದ ಮಾಲೀಕ ತೋಪೇಗೌಡರು ಮರದಿಂದ ಹಣ್ಣನ್ನು ಕಿತ್ತು ಮಾರುಕಟ್ಟೆಗೆ ಮಾರಾಟ ಮಾಡುವ ವೇಳೆ ಈ ಬಾರಿ ಅವರಿಗೇ ಅಚ್ಚರಿಯೊಂದು ಕಾದಿತ್ತು. ಇದುವರೆಗೆ ಸಾಧಾರಣವಾಗಿ 30 ರಿಂದ 37 ಕೆಜಿ ತನಕವೂ ಹಲಸಿನಹಣ್ಣು ದಪ್ಪ ಆಗುತ್ತಿದ್ದು, ಒಳ್ಳೆಯ ಬೆಲೆಯೂ ಸಿಗುತ್ತಿತ್ತು. ಈಗ ಎಲ್ಲರ ಗಮನ ಸೆಳೆದಿರುವ ಈ ಹಣ್ಣು ಬರೋಬ್ಬರಿ 51.36 ಕೆಜಿ ಇದ್ದು 700 ರೂ.ಗಿಂತ ಹೆಚ್ಚಿನ ಬೆಲೆಗೆ ಮಾರಾಟವಾಗುವುದರಲ್ಲಿ ಸಂಶಯವೇ ಇಲ್ಲ ಎನ್ನುತ್ತಾರವರು.

ಈ ಮರಕ್ಕೆ ತಾವು ವಿಶೇಷ ಆರೈಕೆಯನ್ನೇನೂ ಮಾಡಿಲ್ಲ. ಸಾವಯವ ಪದ್ಧತಿಯಲ್ಲಿ ಕೃಷಿ ಮಾಡಿಕೊಂಡು ಬರುತ್ತಿದ್ದು, ಅದರೊಂದಿಗೆ ಹಲಸಿನ ಮರಕ್ಕೂ ಎಲೆಗೊಬ್ಬರ ಮತ್ತು ತಿಪ್ಪೆಗೊಬ್ಬರವನ್ನು ಆಗಾಗ್ಗೆ ಹಾಕುತ್ತಿದ್ದೆ ಅಷ್ಟೇ. ಈವರೆಗೂ ಒಂದು ಹಣ್ಣಿಗೆ 300 ರೂ. ತನಕ ಬೆಲೆ ಸಿಕ್ಕಿದ್ದು ಒಳ್ಳೆಯ ಲಾಭವಾಗಿದೆ. ಆರಂಭದಲ್ಲಿ ಬಿಡುವ ಕಾಯಿಗಳು ಹೆಚ್ಚು ತೂಕವಿರುತ್ತವೆ ಹಾಗೂ ರುಚಿಯಾಗಿರುತ್ತವೆ ಎನ್ನುತ್ತಾರೆ ತೋಪೇಗೌಡರು. ಈ ಹಣ್ಣನ್ನು ನೋಡಲು ಕುತೂಹಲದಿಂದ ಜನರು ತೋಪೇಗೌಡರ ಮನೆಗೆ ಭೇಟಿ ನೀಡುತ್ತಿದ್ದಾರೆ.