ಜಾವಗಲ್‌: ನೇರ್ಲಿಗೆ: ಕರಿಯಮ್ಮ ದೇವಿ ರಥೋತ್ಸವ

ಜಾವಗಲ್‌: ಹೋಬಳಿಯ ನೇರ್ಲಿಗೆ ಗ್ರಾಮದ ಗ್ರಾಮ ದೇವತೆ ಕರಿಯಮ್ಮ ದೇವಿ ರಥೋತ್ಸವ ಸೋಮವಾರ ಸಹಸ್ರಾರು ಭಕ್ತರ ಸಮ್ಮುಖದಲ್ಲಿ ನಡೆಯಿತು.

ಬೆಳಗ್ಗೆ ಕರಿಯಮ್ಮ ದೇವಿ ಮೂಲ ದೇವಾಲಯಕ್ಕೆ ಸಲ್ಲಿಸಲಾಯಿತು. 7 ಗಂಟೆಗೆ ಅಶ್ವವಾಹನೋತ್ಸವ ನಡೆಯಿತು. ಮಧ್ಯಾಹ್ನ 12 ಗಂಟೆಗೆ ಆನೆ ಉತ್ಸವ(ಬಲಿ ಉತ್ಸವ), ಪಾನಕದ ಬಂಡಿ ಉತ್ಸವ, ದೇವಿಯವರಿಗೆ ಸೀರೆ, ಕುಪ್ಪಸ, ಮತ್ತಿತರ ಹರಕೆಯನ್ನು ಅರ್ಪಿಸಿದರು. ಭಕ್ತರಿಗೆ ಅನ್ನಸಂತರ್ಪಣೆ, ಮಜ್ಜಿಗೆ, ಮಕ್ಕಳಿಗೆ ಹಾಲು ವಿತರಿಸಿದರು.

ಮಧ್ಯಾಹ್ನ 3 ಗಂಟೆಗೆ ಕರಿಯಮ್ಮ ದೇವಿ, ಭೂತರಾಯಸ್ವಾಮಿ, ಕೆಂಚರಾಯಸ್ವಾಮಿ, ಚಿಕ್ಕಮ್ಮದೇವಿ ಉತ್ಸವ ಮೂರ್ತಿಗಳನ್ನು ಪುಷ್ಪಾಲಂಕೃತ ರಥದಲ್ಲಿ ಸಿಂಗರಿಸಿ, ಕುಂಕುಮ ಸೇವೆ , ಮಹಾ ಮಂಗಳಾರತಿ ಮಾಡಲಾಯಿತು. ರಥದ ಗಾಲಿಗಳಿಗೆ ಬಲಿ ಪ್ರದಾನ ನಡೆಸಿ ತೆಂಗಿನ ಕಾಯಿಗಳನ್ನು ಒಡೆಯಲಾಯಿತು. ಭಕ್ತರು ರಥದ ಕಳಶಕ್ಕೆ ಬಾಳೆ ಹಣ್ಣು ಎಸೆದರು. ನಂತರ ಸೋಮನ ಕುಣಿತ, ಮಂಗಳವಾದ್ಯದೊಂದಿಗೆ ರಥವನ್ನು ಎಳೆದರು. ನಂತರ ಕುಂಕುಮ ಸೇವೆ ಹಾಗೂ ಮುಳ್ಳಲಗೆ ಸೇವೆ ನಡೆದವು.

ನೇರ್ಲಿಗೆ, ತಿಮ್ಮನಹಳ್ಳಿ, ಗುಡ್ಡೇನಹಳ್ಳಿ, ಕಲ್ಲಹಳ್ಳಿ, ಕಾಮೇನಹಳ್ಳಿ, ಡಿಗ್ಗೇನಹಳ್ಳಿ, ಸಂಕೀಹಳ್ಳಿ, ನಿಢಘಟ್ಟ ಸೇರಿದಂತೆ ಸುತ್ತಲ ಗ್ರಾಮಗಳಿಂದ ಭಕ್ತರು ಆಗಮಿಸಿದ್ದರು.