ಜಮೀನು ವಿವಾದ: ದಂಪತಿಗೆ ಥಳಿತ

ಹಾಸನ: ಜಮೀನು ವಿವಾದದ ಹಿನ್ನೆಲೆಯಲ್ಲಿಗುಂಪೊಂದು ಮನೆಗೆ ನುಗ್ಗಿ ಗಂಡ, ಹೆಂಡತಿಯನ್ನು ಥಳಿಸಿ ಬೆದರಿಕೆ ಹಾಕಿದ ಪ್ರಕರಣ ತಾಲೂಕಿನ ಮಲ್ಲಪ್ಪನಹಳ್ಳಿಯಲ್ಲಿಶನಿವಾರ ರಾತ್ರಿ ನಡೆದಿದ್ದು, ಗಾಯಾಳುವನ್ನು ಜಿಲ್ಲಾಸ್ಪತ್ರೆಗೆ ದಾಖಲಿಸಲಾಗಿದೆ.

ರಂಗಸ್ವಾಮಿ ಗಾಯಾಳು. ತಮಗೆ ಸೇರಿದ ಒಂದೂಕಾಲು ಎಕರೆ ಗದ್ದೆ ತಮಗೆ ಸೇರಬೇಕೆಂದು ಮಹೇಶ, ದೀಪಕ್‌, ಕರುಣೇಶ್‌, ಅಮರ್‌, ದೊರೆ, ಏಲಕ್ಕಿ ಎಂಬವರು ಮನೆಗೆ ನುಗ್ಗಿ ಥಳಿಸಿ,ಕೊಲೆ ಬೆದರಿಕೆ ಹಾಕಿದ್ದಾರೆ ಎಂದು ರಂಗಸ್ವಾಮಿ ಮತ್ತು ಅವರ ಪತ್ನಿ ರಂಗಮ್ಮ ಪೊಲೀಸರಿಗೆ ನೀಡಿದ ದೂರಿನಲ್ಲಿಆರೋಪಿಸಿದ್ದಾರೆ.

ಕಳೆದ ಒಂದೂವರೆ ವರ್ಷದಿಂದಲೂ ಮಾನಸಿಕ ಕಿರುಕುಳ ನೀಡುತ್ತಿದ್ದಾರೆ, ಜಮೀನಿನ ಎಲ್ಲದಾಖಲೆಗಳು ನಮ್ಮ ಬಳಿ ಇದ್ದು, ಕಳೆದ 20 ವರ್ಷದಿಂದಲೂ ಕೃಷಿ ಚಟುವಟಿಕೆ ಮಾಡಿಕೊಂಡು ಬಂದಿದ್ದೇವೆ. ವಯೋವೃದ್ಧರಾದ ನಮ್ಮನ್ನು ಬೆದರಿಸಿ ಗದ್ದೆಯನ್ನು ಲಪಟಾಯಿಸಲು ಕುತಂತ್ರ ನಡೆಸಿದ್ದಾರೆ, ಅಧಿಕಾರಿಗಳು ರಂಗಸ್ವಾಮಿ ಅವರಿಗೆ ಜಮೀನು ಸೇರಬೇಕು ಎಂದರೂ ಒಪ್ಪದೆ ದೌರ್ಜನ್ಯ ಎಸಗಿದ್ದಾರೆ. ತಮಗೆ ಜೀವ ಬೆದರಿಕೆ ಇದ್ದು, ರಕ್ಷಣೆ ನೀಡಬೇಕು ಎಂದು ದೂರು ನೀಡಿದ್ದಾರೆ.

ಈ ಸಂಬಂಧ ಗೊರೂರು ಠಾಣೆ ಪೊಲೀಸರು ಪ್ರಕರಣ ದಾಖಲಿಸಿದ್ದಾರೆ.