ವಿಜಯಪುರ -ಮಂಗಳೂರು ಹೊಸ ರೈಲು

ಸಕಲೇಶಪುರ: ಹಾಸನ-ಸಕಲೇಶಪುರ ಮಾರ್ಗವಾಗಿ ವಿಜಯಪುರದಿಂದ ಮಂಗಳೂರಿಗೆ ಮತ್ತೊಂದು ರೈಲು ಸಂಚಾರ ಮಂಗಳವಾರದಿಂದ ಪ್ರಾರಂಭಗೊಂಡಿದ್ದು, ಪ್ರಯಾಣಿಕರು ಖುಷಿಗೊಂಡಿದ್ದಾರೆ.

ದಕ್ಷಿಣ ಕನ್ನಡದ ಕರಾವಳಿ(ಮಂಗಳೂರು) ಭಾಗ ಹಾಗೂ ಉತ್ತರ ಕರ್ನಾಟಕದ ಭಾಗಕ್ಕೆ ಪ್ರಯಾಣ ಬೆಸೆಯುವ ಈ ಮಾರ್ಗದ ಪ್ರಥಮ ರೈಲು ಸಂಚಾರ ಇದಾಗಿದೆ. ಈ ಹೊಸ ರೈಲು ಸಂಚಾರಕ್ಕೆ ಪಟ್ಟಣದಲ್ಲಿಸಾರ್ವಜನಿಕರು ಹಾಗೂ ಸಂಘ ಸಂಸ್ಥೆಗಳ ಕಾರ‍್ಯಕರ್ತರಿಂದ ಸ್ವಾಗತ ಕೋರಲಾಯಿತು.

ನಿಗದಿಯಂತೆ ಸಕಲೇಶಪುರಕ್ಕೆ ಬೆಳಗ್ಗೆ 7.10ಕ್ಕೆ ಬರಬೇಕಾಗಿದ್ದ ರೈಲು, ಪ್ರಾರಂಭದ ದಿನವಾದ ಮಂಗಳವಾರ ಸುಮಾರು 9ಕ್ಕೆ ಪಟ್ಟಣದ ರೈಲು ನಿಲ್ದಾಣಕ್ಕೆ ಬಂದು ತಲುಪಿತು.

ವೇಳಾ ಪಟ್ಟಿ: ವಿಜಯಪುರ (ಬಿಜಾಪುರ) ದಿಂದ ನಿತ್ಯ ಸಂಜೆ 6.30ಕ್ಕೆ ಹೊರಟು, ಬಸವನಬಾಗೆವಾಡಿ, ಆಲಮಟ್ಟಿ, ಬಾಗಲಕೋಟೆ, ಬಾದಾಮಿ, ಹೊಳೆಆಲೂರು, ಗದಗ, ಹುಬ್ಬಳ್ಳಿ, ಹಾವೇರಿ, ರಾಣೆಬೆನ್ನೂರು, ಹರಿಹರ, ದಾವಣಗೆರೆ, ಕಡೂರು ಮಾರ್ಗವಾಗಿ ಅರಸೀಕೆರೆಗೆ ಬೆಳಗಿನ ಜಾವ 5.15ಕ್ಕೆ ಬರಲಿದೆ. ಅಲ್ಲಿಂದ ಹಾಸನಕ್ಕೆ 6.15, ಸಕಲೇಶಪುರಕ್ಕೆ ಬೆಳಗ್ಗೆ 7.10 ಬಂದು ಇಲ್ಲಿಂದ 7.30 ಕ್ಕೆ ಹೊರಟು ಮಧ್ಯಾಹ್ನ 12.40 ಕ್ಕೆ ಮಂಗಳೂರು ತಲುಪಲಿದೆ. ಮಂಗಳೂರು ಕಡೆಯಿಂದ ಸಂಜೆ 4.30ಕ್ಕೆ ಹೊರಟು ಸಕಲೇಶಪುರಕ್ಕೆ ರಾತ್ರಿ 9.10, ಹಾಸನಕ್ಕೆ 10.00, ಅರಸಿಕೆರೆಗೆ 10.50ಕ್ಕೆ ಹಾಗೂ ವಿಜಯಪುರಕ್ಕೆ ಮರುದಿನ ಬೆಳಗ್ಗೆ 11 ಕ್ಕೆ ತಲುಪಲಿದೆ.