ಹಾಸನ: ಪುನರ್ವಸು ಮಳೆಯಿಂದ ನದಿಗಳಿಗೆ ಜೀವಕಳೆ; ಯಗಚಿ ಆಣೆಕಟ್ಟು ಭರ್ತಿಗೆ 3 ಅಡಿ ಮಾತ್ರ ಬಾಕಿ

ಹಾಸನ: ಜಲಾಶಯದ ನದಿ ಪಾತ್ರದಲ್ಲಿ ಸುರಿಯುತ್ತಿರುವ ಉತ್ತಮ ಮಳೆಯಿಂದ ಒಳ ಹರಿವು ಹೆಚ್ಚಾಗಿದ್ದು, ಬೇಲೂರು ತಾಲೂಕಿನ ಯಗಚಿ ಅಣೆಕಟ್ಟು ಭರ್ತಿಯಾಗಲು ಮೂರು ಅಡಿ ಮಾತ್ರ ಬಾಕಿಯಿದೆ. ಕಳೆದ ವಾರದಿಂದ ಸುರಿಯುತ್ತಿರುವ ಮಳೆಯಿಂದಾಗಿ ಯಗಚಿ ಜಲಾಶಯಕ್ಕೆ ಭಾರೀ ಪ್ರಮಾಣದ ನೀರು ಹರಿದು ಬಂದಿದ್ದು ಭರ್ತಿಯಾಗಲು 3 ಅಡಿ ಬೇಕಾಗಿದೆ.

ಜಲಾಶಯದ ಗರಿಷ್ಠ ನೀರಿನ ಮಟ್ಟ 3.603 ಟಿಎಂಸಿ ಇದ್ದು ಶುಕ್ರವಾರ 3.103 ಟಿಎಂಸಿ ನೀರು ಬಂದಿದೆ. ಒಳ ಹರಿವು 170 ಕ್ಯೂಸೆಕ್ಸ್ ಬರುತ್ತಿದೆ. ಯಗಚಿ ನದಿ ಹರಿದು ಬರುವ ಪ್ರದೇಶಗಳಾದ ಆಲ್ದೂರು, ಮಾಕೋನಹಳ್ಳಿ, ಸಿಂಗಾಪುರದ ಭಾಗದಲ್ಲಿ ವಾಡಿಕೆ ಮಳೆ ಕೈಕೊಟ್ಟಿದ್ದರೂ ಪುನರ್ವಸು ಮಳೆ ಭರ್ಜರಿಯಾಗಿರುವುದರಿಂದ ಕಳೆದ 2 ದಿನಗಳಿಂದ ಒಳ ಹರಿವು ಹೆಚ್ಚಾಗಿದೆ.

ಕಳೆದ ವರ್ಷ ಜುಲೈ ನಂತರ ಮಳೆಯ ಆರ್ಭಟ ಜೋರಾಗಿತ್ತು ಆಗಸ್ಟ್‌ನಲ್ಲಿ ಜಲಾಶಯ ಭರ್ತಿ ಯಾಗಿ 5 ಕ್ರೆಸ್ಟ್ ಗೇಟ್ ಮೂಲಕ ನೀರನ್ನು ಹೊರಬಿಡಲಾಗಿತ್ತು. ಆದರೆ ಈ ಬಾರಿ ಜುಲೈ ತಿಂಗಳಲ್ಲೇ ಒಳ ಹರಿವು ಹೆಚ್ಚಾಗಿರುವುದರಿಂದ ಐದಾರು ದಿನದಲ್ಲಿ ಜಲಾಶಯ ಭರ್ತಿಯಾಗುವ ಅಂದಾಜಿದೆ.

ಬೆಳೆಯುವ ಹಂತದಲ್ಲೇ ಕೊಳೆಯುತ್ತಿದೆ ಆಲೂಗಡ್ಡೆ: ತಲೆ ಮೇಲೆ ಕೈಹೊತ್ತು ಕುಳಿತ ಹಾಸನ ರೈತರು

ಈ ಜಲಾಶಯದಿಂದ ಪಟ್ಟಣ ಸೇರಿ ಚಿಕ್ಕಮಗಳೂರು ನಗರ ಹಾಗೂ ಅರಸೀಕೆರೆಯ 51 ಗ್ರಾಮಗಳಿಗೆ ಮತ್ತು ತಾಲೂಕಿನ 12 ಗ್ರಾಮಗಳಿಗೆ ಕುಡಿಯುವ ನೀರು ಕೊಡಲಾಗುತ್ತಿದೆ. ಚಿಕ್ಕಮಗಳೂರು ಮತ್ತು ಬೇಲೂರು ಪಟ್ಟಣಗಳು ದಿನಕ್ಕೆ ಕ್ರಮವಾಗಿ 1.85 ಮತ್ತು 0.058 ಕ್ಯೂಸೆಕ್‌ ನೀರನ್ನು ಬಳಕೆ ಮಾಡಲಾಗುತ್ತಿದೆ. ಅಲ್ಲದೆ ಇದೇ ಜಲಾಶಯದಿಂದ ಹಾಸನ ತಾಲೂಕು ಕಟ್ಟಾಯ ಭಾಗದ 37 ಸಾವಿರ ಎಕರೆ ಅಚ್ಚುಕಟ್ಟು, ಹಳೆಬೀಡು, ಮಾದೀಹಳ್ಳಿ ಹೋಬಳಿಗೆ ಏತ ನೀರಾವರಿ ಮೂಲಕ ನೀರನ್ನು ಹರಿಸಲಾಗುತ್ತಿದೆ.

ಬಿಸಿಲೆ ಘಾಟ್‌ ಸುತ್ತಮುತ್ತ ಸ್ವಯಂ ಪ್ರೇರಿತ ಬಂದ್‌