ಸಕಲೇಶಪುರ: ಶೇ.80 ರಷ್ಟು ಮತದಾನ

ಸಕಲೇಶಪುರ: ಪಟ್ಟಣ ಪುರಸಭೆಯ 23 ವಾರ್ಡ್‌ಗಳಿಗೆ ಶೇ.80 ರಷ್ಟು ಮತದಾನವಾಗಿದೆ. ಒಟ್ಟು 85 ಅಭ್ಯರ್ಥಿಗಳು ಕಣದಲ್ಲಿದ್ದು ಒಟ್ಟು 16,797 ಮಂದಿ ಮತದಾರರ ಪೈಕಿ 13,437 ಮಂದಿ ಹಕ್ಕು ಚಲಾಯಿಸಿದ್ದಾರೆ.

ಕುಶಾಲನಗರ ಬಡಾವಣೆಗೆ ಒಳಪಡುವ ವಾರ್ಡ್‌ ನಂಬರ್‌ 8ರ ಮತದಾನಕ್ಕೆ ಸರಕಾರಿ ಆಸ್ಪತ್ರೆ ಮುಂಭಾಗವಿರುವ ನಂಜಮ್ಮ ಮಹಿಳಾ ಸಮಾಜದಲ್ಲಿ ವ್ಯವಸ್ಥೆ ಮಾಡಲಾಗಿತ್ತು. ಒಟ್ಟು 23 ವಾರ್ಡ್‌ಗಳ ಪೈಕಿ ಬರೋಬ್ಬರಿ 30 ಅಭ್ಯರ್ಥಿಗಳು ಪಕ್ಷೇತರರಾಗಿ ಕಣಕ್ಕಿಳಿದಿದ್ದು ಈ ಪೈಕಿ ನಿರ್ಣಾಯಕ ಹಂತದ ಗೆಲುವು ಸಾಧಿಸಿದರೆ ಇವರೇ ಪಾರುಪತ್ಯ ಸಾಧಿಸುವ ನಿರೀಕ್ಷೆ ಇದೆ. ಅಲ್ಲದೆ ಜೆಡಿಎಸ್‌ ಸಹ ಎಲ್ಲ ವಾರ್ಡ್‌ಗಳಲ್ಲಿ ತನ್ನ ಅಭ್ಯರ್ಥಿಗಳನ್ನು ಕಣಕ್ಕಿಳಿಸಿದ್ದು ಪಕ್ಷೇತರರನ್ನು ಹಿಂದೆ ಸರಿಸಿ 13 ಸ್ಥಾನಗಳನ್ನು ಪಡೆದು ಅಧಿಕಾರ ಹಿಡಿದರೂ ಅಚ್ಚರಿ ಇಲ್ಲ. ಯಾರಿಗೂ ಬಹುಮತ ಲಭ್ಯವಾಗದಿದ್ದರೆ ಅಂತಿಮವಾಗಿ ಪಕ್ಷೇತರರ ಬೆಂಬಲ ಪಡೆದು ಅಧಿಕಾರ ಹಿಡಿಯುವುದು ಮೂರು ಪಕ್ಷದವರಿಗೂ ಅನಿವಾರ್ಯವಗುತ್ತದೆ. ಮತಯಂತ್ರಗಳನ್ನು ಮಿನಿ ವಿಧಾನಸೌಧದ ಮತ ಎಣಿಕೆ ಕೇಂದ್ರದಲ್ಲಿ ಭದ್ರವಾಗಿ ಇರಿಸಲಾಗಿದ್ದು ಸೇ.3ರಂದು ಮತ ಎಣಿಕೆ ನಡೆಯಲಿದೆ.