ತಾಯಿ ಅಂತ್ಯಕ್ರಿಯೆ ದಿನ ಮಗನ ಸಾವು

ಬೇಲೂರು ತಾಲೂಕಿನ ಬಕ್ರವಳ್ಳಿಯಲ್ಲಿ ಘಟನೆ

Vijaya Karnataka Web

ಅರೇಹಳ್ಳಿ (ಬೇಲೂರು): ತಾಯಿಯ ಅಂತ್ಯಸಂಸ್ಕಾರದಲ್ಲಿ ಪಾಲ್ಗೊಳ್ಳಲು ತೆರಳಿದ ವೇಳೆ ಮಗನೂ ಮೃತಪಟ್ಟ ಘಟನೆ ಬೇಲೂರು ತಾಲೂಕಿನ ಅರೇಹಳ್ಳಿ ಹೋಬಳಿಯ ಬಕ್ರವಳ್ಳಿ ಗ್ರಾಮದಲ್ಲಿ ನಡೆದಿದೆ.

ಬಕ್ರವಳ್ಳಿ ಗ್ರಾಮದ ಪಾಲಮ್ಮ (70) ಹಾಗೂ ಇವರ ಮೂರನೆಯ ಪುತ್ರ ಅರೇಹಳ್ಳಿ ಹೋಬಳಿಯ ಕಿತ್ತಾವರ ಗ್ರಾಮದ ಮಂಜು (48) ಮೃತರು. ಪಾಲಮ್ಮ ಅವರು ಅನಾರೋಗ್ಯದಿಂದಾಗಿ ಬಕ್ರವಳ್ಳಿ ಗ್ರಾಮದಲ್ಲಿ ಶುಕ್ರವಾರ ಮೃತಪಟ್ಟಿದ್ದರು. ತಾಯಿಯ ನಿಧನ ಸುದ್ದಿ ತಿಳಿದ ಮಂಜು ಅವರು ಬಕ್ರವಳ್ಳಿಯ ತಾಯಿಯ ಮನೆಗೆ ಬಂದಿದ್ದರು. ಮೃತ ಪಾಲಮ್ಮ ಅವರ ಸಂಬಂಧಿಕರರು ಚೆನ್ನೈನಿಂದ ಬರಬೇಕಿದ್ದರಿಂದ ಅಂತ್ಯಸಂಸ್ಕಾರವನ್ನು ಶನಿವಾರಕ್ಕೆ ನಿಗದಿಪಡಿಸಲಾಗಿತ್ತು. ಆದರೆ, ಅಂತ್ಯಕ್ರಿಯೆ ದಿನ ಬೆಳಗ್ಗೆ ಮಂಜು ಕುಸಿದುಬಿದ್ದರು. ಅವರನ್ನು ಆಸ್ಪತ್ರೆಗೆ ಸಾಗಿಸಲಾಯಿತಾದರೂ ಮಾರ್ಗ ಮಧ್ಯೆಯೇ ಅವರು ಮೃತಪಟ್ಟರು.

ಒಂದೇ ಮನೆಯಲ್ಲಿ ಎರಡು ಶವಗಳನ್ನು ಕಂಡ ಕುಟುಂಬಸ್ಥರು ಹಾಗೂ ಸುತ್ತಮುತ್ತಲಿನ ಗ್ರಾಮಸ್ಥರು ಕಂಬನಿ ಮಿಡಿದರು. ಕೊನೆಗೆ ತಾಯಿ- ಮಗನ ಮೃತದೇಹವನ್ನು ಅಕ್ಕಪಕ್ಕ ಹೂಳುವುದರ ಮೂಲಕ ಅಂತ್ಯಸಂಸ್ಕಾರವನ್ನು ನೆರವೇರಿಸಲಾಯಿತು.