ಆಲೂ ಬೆಳೆಗಾರರಿಗೆ ಸಬ್ಸಿಡಿ: ರೇವಣ್ಣ

ಹಾಸನ: ರಾಜ್ಯದಲ್ಲಿ ಅತಿ ಹೆಚ್ಚು ಆಲೂ ಬೆಳೆಯುವ ಪ್ರದೇಶ ನಮ್ಮ ಜಿಲ್ಲೆಯಾಗಿತ್ತು. ಆದರೆ, ಇಂದು ಆಲೂಗೆಡ್ಡೆ ಬೆಳೆಯುವುದು ಕಡಿಮೆ ಮಾಡಿದ್ದಾರೆ. ಹಿಂದೆ 20 ಸಾವಿರ ಹೆಕ್ಟೇರ್‌ ಆಲೂ ಬೆಳೆಯುತ್ತಿದ್ದರು. ಕಳೆದ ವರ್ಷ 12 ಹೆಕ್ಟೇರ್‌ಗೆ ಇಳಿಕೆಯಾಗಿದೆ. ಈ ಬಾರಿ 15 ಹೆಕ್ಟೇರ್‌ಗೆ ಬೇಡಿಕೆ ಇದೆ. ಆದ್ದರಿಂದ ಈ ಬಾರಿ ಶೇ.50 ರಷ್ಟು ಸಬ್ಸಿಡಿ ನೀಡುತ್ತೇವೆ ಎಂದು ಜಿಲ್ಲಾ ಉಸ್ತುವಾರಿ ಸಚಿವ ಎಚ್‌.ಡಿ.ರೇವಣ್ಣ ಹೇಳಿದರು.

ಬುಧವಾರ ಸುದ್ದಿಗೋಷ್ಠಿಯಲ್ಲಿ ಪ್ರಶ್ನೆಯೊಂದಕ್ಕೆ ಉತ್ತರಿಸಿದ ಅವರು, ''ಆಲೂಗೆ ಬಳಸುವ ಔಷಧಕ್ಕೆ 15 ಕೋಟಿ ರೂ. ಹಣ ಬೇಕಾಗುತ್ತದೆ ಎಂದು ಅಂದಾಜಿಸಲಾಗಿದೆ. ಆದರೆ, ಈಗ ಜಿಲ್ಲಾಡಳಿತದಲ್ಲಿ 5 ಕೋಟಿ ರೂ. ಹಣ ಇದೆ. ಇನ್ನೂ 10 ಕೋಟಿ ಹಣವನ್ನು ಬಿಡುಗಡೆ ಮಾಡುವಂತೆ ಮುಖ್ಯಮಂತ್ರಿಗಳಿಗೆ ಮನವಿ ಮಾಡಿದ್ದೇನೆ'' ಎಂದರು.

''ಮೈತ್ರಿ ಸರಕಾರ ಬಂದ ಮೇಲೆ 45 ಸಾವಿರ ಕೋಟಿ ರೂ. ಸಾಲ ಮನ್ನಾ ಮಾಡಿದ್ದೇವೆ. ಅಕ್ಕಿ ಕೊಡುತ್ತಿದ್ದೇವೆ. ಹಾಲು ಖರೀದಿ ದರವನ್ನು 1 ರೂ. ಹೆಚ್ಚಳ ಮಾಡಿದ್ದೇವೆ. ಆದರೆ, ಜನರಿಗೆ ಬಿಜೆಪಿಯವರು ಏನು ಕೊಡುಗೆ ನೀಡಿದ್ದಾರೆ ಎಂದು ಪ್ರಶ್ನಿಸಿದರು.

''ಈಗ ಚುನಾವಣಾ ನೀತಿ ಸಂಹಿತೆ ಇರುವುದರಿಂದ ಎಲ್ಲಾ ಕೆಲಸಗಳನ್ನು ಆಯಾ ಇಲಾಖೆಯವರು ಮಾಡಬೇಕು. ಮಾಡದಿದ್ದರೆ ಅದನ್ನು ಅಭಿವೃದ್ದಿ ಕೆಲಸಗಳನ್ನು ಜಿಲ್ಲಾಧಿಕಾರಿಯವರು ನೋಡಿಕೊಳ್ಳುತ್ತಾರೆ'' ಎಂದು ತಿಳಿಸಿದರು.