ನೇಣು ಬಿಗಿದುಕೊಂಡು ವ್ಯಕ್ತಿ ಆತ್ಮಹತ್ಯೆ

ಅರೇಹಳ್ಳಿ (ಬೇಲೂರು): ಮನೆಯಲ್ಲಿ ಯಾರು ಇಲ್ಲದ ವೇಳೆ ವ್ಯಕ್ತಿಯೊಬ್ಬರು ಸೀರೆಯಿಂದ ನೇಣುಬಿಗಿದುಕೊಂಡು ಆತ್ಮಹತ್ಯೆ ಮಾಡಿಕೊಂಡಿರುವ ಘಟನೆ ಬೇಲೂರು ತಾಲೂಕು ಅರೇಹಳ್ಳಿ ಹೋಬಳಿಯ ಸಂತೋಷನಗರದಲ್ಲಿ ನಡೆದಿದೆ.

ಕೂಲಿ ಕಾರ್ಮಿಕ ಶಿವಾಜಿ(32) ಮೃತರು. ಇವರ ಪತ್ನಿ ಲತಾ ಎಂದಿನಂತೆ ಕೂಲಿ ಕೆಲಸಕ್ಕೆಂದು ಕಾಫಿ ತೋಟಕ್ಕೆ ತೆರಳಿದ್ದರು. ಆದರೆ, ಶಿವಾಜಿ ಮಾತ್ರ ಕೆಲಸಕ್ಕೆ ತೆರಳದೆ ಮನೆಯಲ್ಲೇ ಉಳಿದುಕೊಂಡಿದ್ದರು. ಈ ವೇಳೆ ಬೇರೆ ಊರಿನಲ್ಲಿರುವ ಲತಾ ಅವರ ಅಕ್ಕನಿಗೆ ಕರೆಮಾಡಿದ ಶಿವಾಜಿ, 'ನಾಳೆ ಮನೆಯಲ್ಲಿ ಹಬ್ಬ ಮಾಡುತ್ತಿದ್ದೇವೆ ಬನ್ನಿ' ಎಂದು ಆಮಂತ್ರಿಸಿದ್ದಾರೆ. ಆದರೆ ಶಿವಾಜಿಯ ಮಾತಿನಿಂದ ಸಂದೇಹಗೊಂಡ ಆಕೆ ಈ ಬಗ್ಗೆ ಲತಾಗೆ ಕರೆ ಮಾಡಿ ವಿಚಾರಿಸಿದ್ದಾರೆ. ವಿಚಲಿತಗೊಂಡ ಲತಾ ತಕ್ಷಣ ಪತಿಗೆ ಫೋನ್‌ ಮಾಡಿದ್ದಾರೆ. ಆಗ ಶಿವಾಜಿ, ''ನನಗೆ ಜೀವನ ನಡೆಸಲು ಸಾಧ್ಯವಾಗುತ್ತಿಲ್ಲ. ಹಾಗಾಗಿ ಆತ್ಮಹತ್ಯೆ ಮಾಡಿಕೊಳ್ಳುತ್ತಿದ್ದೇನೆ,'' ಎಂದು ಹೇಳಿ ಕರೆಕಟ್‌ ಮಾಡಿದ್ದಾರೆ. ಇದರಿಂದ ಆತಂಕಗೊಂಡ ಆಕೆ ಮನೆಗೆ ಧಾವಿಸಿ ಬಂದು ನೋಡಿದಾಗ ಶಿವಾಜಿ ಮನೆಯ ಕಬ್ಬಿಣದ ಸರಳಿಗೆ ನೇಣು ಬಿಗಿದುಕೊಂಡು ಆತ್ಮಹತ್ಯೆ ಮಾಡಿಕೊಂಡಿದ್ದರು. ಅರೇಹಳ್ಳಿ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.