ಬೈಕ್‌ ಸವಾರರನ್ನು ದೋಚುತ್ತಿದ್ದವರಿಗೆ ಗ್ರಾಮಸ್ಥರ ಗೂಸಾ

ಹೊಳೆನರಸೀಪುರ: ತಾಲೂಕಿನ ಮೈಸೂರು ರಸ್ತೆಯ ಕಬ್ಬೂರು ತಿರುವಿನಲ್ಲಿ ಬೈಕ್‌ ಸವಾರರನ್ನು ದೋಚುತ್ತಿದ್ದ ಮೂವರು ಆರೋಪಿಗಳನ್ನು ಸಾರ್ವಜನಿಕರೇ ಹಿಡಿದು ಪೊಲೀಸರಿಗೆ ಒಪ್ಪಿಸಿದ್ದಾರೆ.

ಅರುಣ್‌ರಾಜೇ ಅರಸ್‌(ರೌಡಿಶೀಟರ್‌), ಸಿದ್ದರಾಮ ಮತ್ತು ರಾಘು(ರಾಘವೇಂದ್ರ) ಆರೋಪಿಗಳು. ಕಬ್ಬೂರು ಕೊಪ್ಪಲಿನ ನಿವಾಸಿಗರು ಎನ್ನಲಾದ ಈ ಮೂವರು ಬೈಕ್‌ನಲ್ಲಿ ತೆರಳುತ್ತಿದ್ದವರ ಮೇಲೆ ಹಲ್ಲೆ ನಡೆಸಿ ಮೊಬೈಲ್‌, ಹಣ, ಚಿನ್ನಾಭರಣ ಕಿತ್ತುಕೊಂಡು ಪರಾರಿಯಾಗುತ್ತಿದ್ದರು. ಈ ಬಗ್ಗೆ ಪೊಲೀಸರಿಗೆ ಮಾಹಿತಿ ಇತ್ತಾದರೂ ದೋಚುತ್ತಿದ್ದವರು ಸಿಕ್ಕಿರಲಿಲ್ಲ. ಇದೇ ಕೃತ್ಯಕ್ಕಿಳಿದಾಗ ಗುರುವಾರ ಸಾರ್ವಜನಿಕರೇ ಮೂವರನ್ನೂ ಹಿಡಿದು ಗೂಸ ಕೊಟ್ಟಿದ್ದಾರೆ.

ಕೆಎಸ್‌ಆರ್‌ಟಿಸಿ ಬಸ್‌ ಕಂಡಕ್ಟರ್‌ ವಿಷಕಂಠಯ್ಯ ಹೊಳೆನರಸೀಪುರದಿಂದ ಭಾನುವಾರ ಮಧ್ಯಾಹ್ನ 4 ಗಂಟೆ ಸಮಯದಲ್ಲಿ ಡ್ಯೂಟಿ ಮುಗಿಸಿಕೊಂಡು ತಮ್ಮೂರು ಕೆ.ಆರ್‌. ಪೇಟೆ ತಾಲೂಕಿನ ಅಕ್ಕಿಹೆಬ್ಬಾಳು ಸಮೀಪದ ಆಲಂಬಾಡಿ ಗ್ರಾಮಕ್ಕೆ ತೆರಳುತ್ತಿದ್ದಾಗ ರಸ್ತೆ ದರೋಡೆ ನಡೆಸಿದ್ದಾರೆ. ಬೈಕ್‌ ಅಡ್ಡ ಗಟ್ಟಿ ಕ್ಯಾತೆ ತೆಗೆದಿದ್ದಾರೆ. ಹಲ್ಲೆ ನಡೆಸಿ ಮೊಬೈಲ್‌ ಕಿತ್ತುಕೊಂಡಿದ್ದರು. ನಂತರ ಕತ್ತಿನಲ್ಲಿದ್ದ ಚಿನ್ನದ ಸರ ಕೀಳಲು ಬಂದಾಗ ವಿಷಕಂಠಯ್ಯ ತೀವ್ರ ಪ್ರತಿರೋಧ ವ್ಯಕ್ತಪಡಿಸಿದ್ದಾರೆ. ಅವರನ್ನು ಹತ್ತಿರದ ಪೊದೆಯೊಂದರ ಬಳಿ ಎಳೆದೊಯ್ಯವುದನ್ನು ಕಂಡ ಸುತ್ತಮುತ್ತಲಿನ ಗ್ರಾಮಸ್ಥರು ಒಗ್ಗೂಡಿ ಹಿಡಿದಿದ್ದಾರೆ. ಇನ್ನೂ ನೋಂದಾಯಿಸಿಕೊಳ್ಳದ ಬೈಕ್‌ನ್ನು ಕೃತ್ಯಕ್ಕೆ ಬಳಸಿದ್ದರು. ಗಸ್ತಿನಲ್ಲಿದ್ದ ಪೇದೆ ತಕ್ಷ ಣ ಸ್ಥಳಕ್ಕೆ ಧಾವಿಸದಿದ್ದರೆ ಆರೋಪಿಗಳನ್ನು ಗ್ರಾಮಸ್ಥರಿಂದ ಬಚಾವ್‌ ಮಾಡಿ ಠಾಣೆಗೆ ಕರೆದುಕೊಂಡು ಬಂದಿದ್ದಾರೆ.

ಆರೋಪಿಗಳನ್ನು ಬಂಧಿಸಿ, ಬೈಕ್‌ ವಶಕ್ಕೆ ಪಡೆಯಲಾಗಿದೆ. ಹಳ್ಳಿಮೈಸೂರು ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ಈ ಹಿಂದೆ ಆರೋಪಿಗಳು ಎಡೆಗೋಡನಹಳ್ಳಿ ಅರಣ್ಯ ಪ್ರದೇಶದಲ್ಲಿ ಮರ ಕಡಿದು ಮಾರಾಟ ಮಾಡುತ್ತಿದ್ದರು. ಕಾಡು ಹಂದಿ ಬೇಟೆಯಾಡಿ ಪೊಲೀಸರ ಆತಿಥ್ಯ ಸ್ವೀಕರಿಸಿದ್ದರು ಎನ್ನಲಾಗಿದೆ. ಮುಂದುವರೆದಂತೆ ರಸ್ತೆ ಹೋಕರನ್ನು ದೋಚುವ ಕಸುಬು ರೂಢಿಸಿಕೊಂಡಿದ್ದರು ಎಂಬ ಆರೋಪ ಇದೆ.