ಅಕೌಂಟಿಗೆ ಮೋದಿ ದುಡ್ಡು ಹಾಕ್ತಾರೆ ಎಂದು ನಂಬಿಸಿ ವಂಚನೆ!

ಹೊಳೆನರಸೀಪುರ : ಅಕೌಂಟ್‌ಗೆ ಪ್ರಧಾನಿ ಮೋದಿ ದುಡ್ಡು ಹಾಕುತ್ತಾರೆ ಎಂದು ಮೊಬೈಲ್‌ಗೆ ಬಂದ ಹುಸಿ ಕರೆ ನಂಬಿ ತಮ್ಮ ಬ್ಯಾಂಕ್‌ ಖಾತೆ ಸಂಖ್ಯೆ, ವಿವರ, ಡೆಬಿಟ್‌ ಕಾರ್ಡ್‌ ನಂಬರ್‌ ಹೇಳಿದ ಕೆಲವರು ಹಣ ಕಳೆದುಕೊಂಡಿದ್ದಾರೆ.

ತಾಲೂಕಿನ ಗವಿಸೋಮನಹಳ್ಳಿಯಲ್ಲಿ ಸುಮಾರು 12 ಮಂದಿ 1 ಲಕ್ಷ ರೂ.ವರೆಗೆ ಹಣ ಕಳೆದುಕೊಂಡಿದ್ದಾರೆ.

ವಂಚಕ ತನ್ನ ಮಾತಿನ ಮೋಡಿಗೆ ಮೋದಿ ಹೆಸರು ಬಳಸಿಕೊಂಡಿದ್ದು, ಗವಿ ಸೋಮನಹಳ್ಳಿಯ ಒಬ್ಬರ ಅಕೌಂಟ್‌ಗೆ 2 ಸಾವಿರ ರೂ. ಹಾಕಿದ್ದಾನೆ. ಯುವಕ ಈ ವಿಚಾರವನ್ನು ಗ್ರಾಮದ ಇತರರೊಂದಿಗೆ ಹಂಚಿಕೊಂಡಿದ್ದಾರೆ. ನಂಬಿದ ಕೆಲವರು ವಂಚಕನ ಮೊಬೈಲ್‌ ಸಂಖ್ಯೆಗೆ ಕರೆ ಮಾಡಿ, ತಮ್ಮ ಖಾತೆ ವಿವರ, ಡೆಬಿಟ್‌ ಕಾರ್ಡ್‌ ಕೋಡ್‌ ಹೇಳಿದ್ದಾರೆ. ಆತ ಎಲ್ಲರ ಖಾತೆ ಖಾಲಿ ಮಾಡಿಟ್ಟಿದ್ದಾನೆ. ತಾವು ಮೋಸ ಹೋಗಿರುವುದನ್ನು ತಿಳಿದು ಬ್ಯಾಂಕ್‌ಗೆ ಬಂದು ವ್ಯವಸ್ಥಾಪಕರಲ್ಲಿ ದೂರು ತೋಡಿಕೊಂಡಿದ್ದು, ಡೆಬಿಟ್‌ ಕಾರ್ಡ್‌ ವಹಿವಾಟು ಸ್ಥಗಿತಗೊಳಿಸಿದ್ದಾರೆ.

ಗ್ರಾಮದ ಯುವಕನೊಬ್ಬ ತಾನೂ ಮೋಸ ಹೋಗಿರುವುದಲ್ಲದೆ, ಬೆಂಗಳೂರಿನಲ್ಲಿರುವ ತನ್ನಕ್ಕನಿಗೂ ಕರೆ ಮಾಡಿ ಮೋದಿ ಪ್ರತಿಯೊಬ್ಬರ ಅಕೌಂಟ್‌ಗೆ ಹಣ ಹಾಕುತ್ತಿರುವುದಾಗಿ ತಿಳಿಸಿದ್ದಾನೆ. ಆಕೆಯೂ ವಂಚಕನಿಗೆ ಕರೆ ಮಾಡಿ ವಿವರ ನೀಡಿದ್ದಾರೆ. ಇದೇ ರೀತಿ ಒಬ್ಬೊಬ್ಬರೇ ಹಣ ಕಳೆದು ಕೊಂಡಿದ್ದಾರೆ. ಪ್ರಸ್ತುತ ವಂಚಕನ ಮೊಬೈಲ್‌ ಸ್ಥಗಿತಗೊಂಡಿದೆ ಎನ್ನುತ್ತಾರೆ ಗ್ರಾಮದ ನಂಜುಂಡಿ.

ಈ ಬಗ್ಗೆ ಯಾರೊಬ್ಬರೂ ಪೊಲೀಸರಿಗೆ ದೂರು ನೀಡಿಲ್ಲ. ಯಾರೇ ಕರೆ ಮಾಡಿ ಬ್ಯಾಂಕ್‌ ಮಾಹಿತಿ ಕೇಳಿದರೂ ಬ್ಯಾಂಕ್‌ಗೆ ನಾವೇ ಹೋಗಿ ನೀಡುತ್ತೇವೆ ಎಂದು ಹೇಳುವಂತೆ ಬ್ಯಾಂಕ್‌ ಅಧಿಕಾರಿಗಳು ತಿಳಿಸಿದ್ದಾರೆ.