ಹಾವೇರಿ: ಸುಪ್ರೀಂ ಕೋರ್ಟ್ ಆದೇಶ ನಡುವೆಯೂ ರಾಜ್ಯ ಸರಕಾರ ಹೆದ್ದಾರಿಗಳನ್ನು ಡಿನೋಟಿಫೈ ಮಾಡಿದ ಹಿನ್ನೆಲೆಯಲ್ಲಿ ಜಿಲ್ಲೆಯ ಹೆದ್ದಾರಿ ಮೇಲಿರುವ 115 ಮದ್ಯದ ಅಂಗಡಿಗಳ ಪೈಕಿ 92 ಬಚಾವ್ ಆಗಿದ್ದು, 23 ಸ್ಥಳಾಂತರಗೊಳಿಸುವ ತಪ್ಪಿದಲ್ಲಿ ಮುಚ್ಚುವುದು ಅನಿವಾರ್ಯವಾಗಿದೆ.
ಸುಪ್ರೀಂ ಕೋರ್ಟ್ ಅದೇಶ ನೀಡಿದ್ದರೂ ತಮಿಳುನಾಡು ಮಾದರಿಯಲ್ಲಿ ಹೆದ್ದಾರಿ ಮೇಲಿರುವ ಎಲ್ಲ ರೀತಿಯ ಮದ್ಯದ ಅಂಗಡಿಗಳನ್ನು ಉಳಿಸಿಕೊಂಡೇ ತೀರುತ್ತೇವೆ ಎನ್ನುವ ವಿಶ್ವಾಸ ವ್ಯಕ್ತಪಡಿಸಿದ್ದ ಜಿಲ್ಲೆಯ ಮದ್ಯ ಮಾರಾಟಗಾರರ ಸಂಘ ಕೊನೆಗೂ 92 ಅಂಗಡಿಗಳನ್ನು ಉಳಿಸಿಕೊಳ್ಳುವಲ್ಲಿ ಯಶಸ್ವಿಯಾಗಿದೆ. 23 ಅಂಗಡಿಗಳನ್ನು ಕಳೆದುಕೊಂಡಿದೆ.
ರಾಷ್ಟ್ರೀಯ ಹೆದ್ದಾರಿ, ರಾಜ್ಯ ಹೆದ್ದಾರಿ ಹಾಗೂ ಜಿಲ್ಲಾ ಹೆದ್ದಾರಿಗಳನ್ನಾಗಿ ವಿಂಗಡಿಸುವ ಮೂಲಕ ಸರಕಾರ ಜೂನ್13 ರಂದು ಡಿನೋಟಿಫೈ ಆದೇಶ ಹೊರಡಿಸಿದೆ. ಈ ಹಿನ್ನೆಲೆಯಲ್ಲಿ ಜಿಲ್ಲೆ ಸೇರಿದಂತೆ ರಾಜ್ಯದ ಮುಚ್ಚುವ ಆತಂಕದಲ್ಲಿದ್ದ ಬಹುತೇಕ ಮದ್ಯದ ಅಂಗಡಿಗಳನ್ನು ಉಳಿಸಿಕೊಳ್ಳು ವಲ್ಲಿ ಮದ್ಯದ ಲಾಬಿ ಕೆಲಸ ಮಾಡಿದೆ.
ಜಿಲ್ಲೆಯ ಅಬಕಾರಿ ಇಲಾಖೆ ಮೂಲಗಳ ಪ್ರಕಾರ, ಜಿಲ್ಲೆಯಲ್ಲಿ ಒಟ್ಟು 115 ಮದ್ಯದ ಅಂಗಡಿ ಗಳು ಸ್ಥಳಾಂತರಗೊಳ್ಳುವ ಆತಂಕದಲ್ಲಿದ್ದವು. ಹೊಸ ಡಿನೋಟಿಫೈ ಆದೇಶದ ಪ್ರಕಾರ 92 ಅಂಗ ಡಿಗಳು ಜಿಲ್ಲೆ ಮತ್ತು ರಾಜ್ಯ ಹೆದ್ದಾರಿಗಳ ಹೆಸರಲ್ಲಿ ಬಚಾವ್ ಆಗಿವೆ. ಹಳ್ಳಿಯ 23 ಮದ್ಯದ ಅಂಗಡಿಗಳಿಗೆ ಸುಪ್ರೀಂ ಕೋರ್ಟ್ ಆದೇಶ ಕುತ್ತು ತಂದಿದೆ. ಸ್ಥಳಾಂತರ ಇಲ್ಲವೇ ಮುಚ್ಚುವ ಪರಿಸ್ಥಿತಿ ತಲುಪಿವೆ.
ಜೂನ್ 30 ರ ಗಡುವು!: ಸುಪ್ರೀಂ ಕೋರ್ಟ್ ಆದೇಶ ಹೊರ ಬರುತ್ತಿದ್ದಂತೆ ಚುರುಕಗೊಂಡಿದ್ದ ಅಬಕಾರಿ ಇಲಾಖೆ ಆರಂಭ ಹಂತದಲ್ಲೇ 17 ಮಾರ್ಚ 2017 ರಂದು ಸ್ಥಳಾಂತರಗೊಳಿಸುವಂತೆ ನೋಟಿಸ್ ಜಾರಿ ಮಾಡಿತ್ತು. ರಾಜ್ಯ ಸರಕಾರ ಅಭಯ ನೀಡಿದ 2 ತಿಂಗಳು ಕಾದು ಪುನಃ 1 ಜೂನ್ 2017 ರಂದು ಎರಡನೇ ನೋಟಿಸ್ ಜಾರಿಗೊಳಿಸಿ. ಶತಾಯುಗತ ಜೂನ್ 30 ರೊಳಗೆ ಕೋರ್ಟ್ ಆದೇಶದ ನಿಯಮಾನುಸಾರ 220 ಮೀಟರ್ ಅಡಿಗಳಷ್ಟು ಹಿಂದೆ ಸರಿಯುವಂತೆ ಸೂಚಿಸಿತ್ತು.
ಸರಕಾರ ಅಂತಿಮವಾಗಿ 13 ಜೂನ್ ,2017 ರಂದು ಹೆದ್ದಾರಿ ಡಿನೋಟಿಫೈ ಅಂತಿಮಗೊಳಿಸಿದ ಕಾರಣಕ್ಕೆ ಮದ್ಯದ ಅಂಗಡಿಗಳ ಸ್ಥಳಾಂತರ ಪ್ರಕ್ರಿಯೆ ಚುರುಕು ಪಡೆದುಕೊಂಡಿದೆ. ಜಿಲ್ಲೆಯ ಮಟ್ಟಿಗೆ ಈಗಾಗಲೇ 23 ಮದ್ಯದ ಅಂಗಡಿಗಳ ಮಾಲೀಕರಿಗೆ ಜೂನ್ 30 ರೊಳಗೆ ಸ್ಥಳಾಂತರಿಸಬೇಕು ಇಲ್ಲವೇ ಮುಚ್ಚಬೇಕು ಎಂದು ಕಟ್ಟು ನಿಟ್ಟಾಗಿ ಸೂಚಿಸಲಾಗಿದೆ.
ಜಿಲ್ಲೆಯ ಅಬಕಾರಿ ಮೂಲಗಳ ಪ್ರಕಾರ 23 ಅಂಗಡಿಗಳ ಮಾಲೀಕರು ಈಗಾಗಲೇ ತಾವಿರುವ ಸ್ಥಳದಿಂದ 220 ಮೀಟರ್ ದೂರ ಸರಿದು ಪುನರ್ ನಿರ್ಮಾಣ ಕೆಲಸ ಆರಂಭಿಸಿದ್ದಾರೆ. ಇದರ ನಡುವೆಯೂ ಜೂನ್ 30 ರೊಳಗೆ ಸ್ಥಳಾಂತರಗೊಳ್ಳದ ಮದ್ಯದ ಅಂಗಡಿಗಳನ್ನು ಮುಚ್ಚಿಸುವ ಜತೆಗೆ ನೀಡಿರುವ ಲೈಸನ್ಸ್ನ್ನು ನವೀಕರಿಸದಿರಲು ನಿರ್ಧರಿಸಿದೆ.
ಒಟ್ಟಿನಲ್ಲಿ ಸುಪ್ರೀಂ ಕೋರ್ಟ್ ನೀಡಿದ್ದ ಕಟ್ಟುನಿಟ್ಟಿನ ಆದೇಶದ ನಡುವೆಯೂ ತಮಿಳುನಾಡು ಮಾದರಿಯಲ್ಲಿ ಹೆದ್ದಾರಿಗಳನ್ನು ಡಿನೋಟಿಫೈ ಮಾಡುವ ಮೂಲಕ ರಾಜ್ಯ ಸರಕಾರ ಅಬಕಾರಿ ಆದಾಯ ಸಂಪನ್ಮೂಲ ಉಳಿಸಿಕೊಳ್ಳುವಲ್ಲಿ ಯಶಸ್ವಿಯಾಗಿದೆ. ಜಿಲ್ಲೆಯ ಮಟ್ಟಿಗೆ ಮದ್ಯ ಮಾರಾಟಗಾರರ ಸಂಘ ಸಹ ಸರಕಾರದ ಆದೇಶಕ್ಕೆ ತಲೆಬಾಗಿ ನಿಯಮಾವಳಿ ಉಲ್ಲಂಘಿಸಲಿರುವ ಮದ್ಯದ ಅಂಗಡಿಗಳನ್ನು ಸ್ಥಳಾಂತರಿಸಲು ಒಪ್ಪಿಕೊಂಡು ಸಹಕಾರ ನೀಡಿದೆ.
ತಾಲೂಕು ಊರು ಮದ್ಯದಂಗಡಿ ಸಂಖ್ಯೆ: ಹಾವೇರಿ ಹೊಸರಿತ್ತಿ 1, ರಾಣೇಬೆನ್ನೂರ ಹೊನ್ನತ್ತಿ 1, ಕುಮಾರ ಪಟ್ಟಣ 4, ಬ್ಯಾಡಗಿ ಮೋಟೇಬೆನ್ನೂರ 1, ಹಾನಗಲ್ಲ ತಿಳುವಳ್ಳಿ 3, ಆಡೂರ 2,
ಅಕ್ಕಿಆಲೂರ 2, ಚಿಕ್ಕಾಂಸಿಹೊಸೂರ 1, ಶಿಗ್ಗಾವಿ ಹುಲಗೂರ 1, ಮುನವಳ್ಳಿ 1, ಹಿರೇಕೇರೂರ ಮಾಸೂರು 2, ಕೋಡ 2, ಚಿಕ್ಕೇರೂರ 1, ಹಂಸಬಾವಿ 2.