ಶಾಲೆ ಪಕ್ಕದಲ್ಲೇ ಶಿಥಿಲ ಟ್ಯಾಂಕ್‌

ರಾಣೇಬೆನ್ನೂರ: ಗ್ರಾಮದ ಜನತೆಗೆ ನೀರು ಪೂರೈಸುವ ಉದ್ದೇಶದಿಂದ ನಿರ್ಮಿಸಲಾದ ಓವರ್‌ಹೆಡ್‌ ಟ್ಯಾಂಕ್‌ ಜನರಿಗೆ ವರವಾಗುವ ಬದಲಾಗಿ ಶಾಪವಾಗುವ ಲಕ್ಷ ಣಗಳು ತಾಲೂಕಿನ ತಿರುಮಲದೇವರಕೊಪ್ಪದಲ್ಲಿ ಕಾಣಬಹುದಾಗಿದೆ.

ಗ್ರಾಮದ ರಂಗನಾಥಸ್ವಾಮಿ ದೇವಾಲಯ ಹಾಗೂ ಸರಕಾರಿ ಪ್ರಾಥಮಿಕ ಶಾಲೆಯ ಆವರಣದಲ್ಲಿರುವ ಟ್ಯಾಂಕ್‌ ನಾಲ್ಕು ವರ್ಷಗಳಿಂದ ಸೋರುತ್ತಿದ್ದು ಯಾವುದೇ ಕ್ಷ ಣದಲ್ಲಿ ಧರೆಗುರುಳುವ ಎಲ್ಲ ಸಾಧ್ಯತೆಗಳಿವೆ.

ಈ ಕುರಿತು ಗ್ರಾಮಸ್ಥರು ಸಂಬಂಧಿಸಿದ ಇಲಾಖೆ ಅಧಿಕಾರಿಗಳಿಗೆ ಹಾಗೂ ಗ್ರಾಮ ಪಂಚಾಯಿತಿಗೆ ಹಲವಾರು ಬಾರಿ ದೂರು ನೀಡಿದರೂ ಯಾವುದೇ ಪ್ರಯೋಜನವಾಗಿಲ್ಲ.

ನೀರಿನ ಟ್ಯಾಂಕ್‌ ಸ್ಥಿತಿ: ಟ್ಯಾಂಕಿನ ತಳಭಾಗದಲ್ಲಿ ಬಿರುಕು ಬಿಟ್ಟಿದ್ದು ಸಿಮೆಂಟ್‌ ಕಿತ್ತು ಹೋಗಿದೆ. ನೀರು ತುಂಬಿದಾಗ ಸೋರಿಕೆ ಹೆಚ್ಚಾಗಿ ಪಾಚಿ ಹುಟ್ಟಿಕೊಂಡಿದೆ. ಮೇಲ್ಭಾದಲ್ಲಿನ ಕಬ್ಬಿಣದ ಸಲಾಕೆಗಳು ಅಸ್ಥಿಪಂಜರದಂತೆ ಗೋಚರಿಸುತ್ತಿವೆ. ಇದನ್ನೆಲ್ಲಾ ಗಮನಿಸಿದರೆ ಟ್ಯಾಂಕ್‌ ಈಗಲೋ ಆಗಲೋ ಬೀಳುವ ಪರಿಸ್ಥಿತಿಯಲ್ಲಿದೆ.

ಭಯದಲ್ಲಿ ವಿದ್ಯಾರ್ಥಿಗಳು: ಟ್ಯಾಂಕ್‌ ಪಕ್ಕದಲ್ಲಿರುವ ಶಾಲೆಯಲ್ಲಿ 50 ಕ್ಕೂ ಅಧಿಕ ವಿದ್ಯಾರ್ಥಿಗಳು ವ್ಯಾಸಂಗ ಮಾಡುತ್ತಿದ್ದಾರೆ, ಟ್ಯಾಂಕ್‌ನಿಂದಾಗಿ ಆತಂಕದಲ್ಲಿ ಕಾಲ ಕಳೆಯುವಂತಾಗಿದೆ.

ಟ್ಯಾಂಕ್‌ ಅನತಿ ದೂರದಲ್ಲಿಯೇ ಬೇರೊಂದು ಟ್ಯಾಂಕ್‌ ನಿರ್ಮಿಸಲು ಜಾಗವಿದೆ. ಸಂಬಂಧಿಸಿದ ಅಧಿಕಾರಿಗಳು ಈ ಬಗ್ಗೆ ಚಿಂತನೆ ನಡೆಸಬೇಕಿದೆ ಎಂದು ಗ್ರಾಮಸ್ಥರು ಒತ್ತಾಯಿಸಿದ್ದಾರೆ.