ಕೈಬೀಸಿ ಕರೆಯುವ ವನ್ಯಜೀವಿಗಳ ಬೀಡು

ಕರಿಯಪ್ಪ ಎಚ್‌ ಚೌಡಕ್ಕನವರ ರಟ್ಟೀಹಳ್ಳಿ: ಅರೆಮಲೆನಾಡು ಪ್ರದೇಶವಾಗಿದ್ದರೂ ರಟ್ಟೀಹಳ್ಳಿ ತಾಲೂಕಿನ ಕೆಲವೊಂದು ಭಾಗದಲ್ಲಿ ಬೆಟ್ಟ ಗುಡ್ಡಗಳು ಇರುವುದರಿಂದ ಕಾಡು ಪ್ರಾಣಿಗಳು, ವಿವಿಧ ಪಕ್ಷಿಗಳು ವಾಸವಾಗಿದ್ದು ಕಂಡುಬರುತ್ತದೆ.

ಈ ಭಾಗದಲ್ಲಿ ನವಿಲುಗಳು ಹೆಚ್ಚಾಗಿ ಕಂಡು ಬರುತ್ತಿದ್ದು, ಕಣವಿಸಿದ್ಗೇರಿ, ಪರ್ವತಸಿದ್ಗೇರಿ, ಜೋಕನಾಳ, ಸಣ್ಣಗುಬ್ಬಿ, ಹಿರೇಮಾದಾಪುರ, ಕುಡುಪಲಿ, ಬಡಸಂಗಾಪುರ, ಯಡಗೋಡ, ಸೇರಿದಂತೆ ತಾಲೂಕಿನ ಹಲವು ಗ್ರಾಮದಲ್ಲಿ ಸಾಕಷ್ಟು ನವಿಲುಗಳು ಕಂಡು ಬರುತ್ತಿವೆ. ನವಿಲುಗಳು ಸಂಜೆ ಮತ್ತು ಬೆಳಿಗ್ಗೆ ಆಹಾರ ಹುಡಿಕಿಕೊಂಡು ರೈತರ ಜಮೀನುಗಳತ್ತ ಬರುತ್ತಿವೆ

ಆಹಾರ ಹುಡಿಕಿ ಅಲೆದಾಡುವ ಜಿಂಕೆಗಳು: ಈ ಭಾಗದಲ್ಲಿ ಅನೇಕ ವರ್ಷಗಳಿಂದ ಜಿಂಕೆಗಳು ವಾಸವಾಗಿವೆ. ಹಸಿರು ಹುಲ್ಲು ಹುಡಿಕಿಕೊಂಡು ಜಿಂಕೆಗಳು ಜಮೀನುಗಳಲ್ಲಿ ಅಲೆದಾಡುತ್ತಿರುವುದು ಹೆಚ್ಚಾಗಿ ಕಂಡು ಬರುತ್ತದೆ. ಮಳೆ ಇಲ್ಲದೇ ಇರುವುದರಿಂದ ಜಿಂಕೆಗಳಿಗೆ ಆಹಾರದ ತೊಂದರೆ ಉಂಟಾಗಿದ್ದು ನೀರಾವರಿ ಜಮೀನುಗಳತ್ತ ಜಿಂಕೆಗಳು ಹುಲ್ಲು ತಿನ್ನುವುದಕ್ಕೆ ಬರುತ್ತಿವೆ.

ಕಣವಿಸಿದ್ಗೇರಿ, ಕಡೂರು,ಜೋಕನಾಳ, ಬುಳ್ಳಾಪುರ, ಹಾಡೆ, ಪರ್ವತಸಿದ್ಗೇರಿ, ಹಳಿಯಾಳ, ಅಂಗರಗಟ್ಟಿ ಸೇರಿದಂತೆ ಈ ಭಗದಲ್ಲಿ ಚಿರತೆಗಳು ವಾಸವಾಗಿವೆ. ಈ ಭಾಗದಲ್ಲಿ ಈಗಾಗಲೇ 5 ಚಿರತೆಗಳನ್ನು ಸೆರೆ ಹಿಡಿಯಲಾಗಿದೆ.

ಇನ್ನು ಗುಡ್ಡದಮಾದಾಪುರ, ಅಣಜಿ, ನಾಗವಂದ ಹೊಸಕಟ್ಟಿ ಸೇರಿದಂತೆ ಕೆಲವೊಂದು ಗ್ರಾಮಗಳ ವ್ಯಾಪ್ತಿಯಲ್ಲಿ ಕಾಡು ಹಂದಿಗಳು ವಾಸವಾಗಿವೆ. ಇನ್ನು ಕೆಲವೊಂದು ಭಾಗದಲ್ಲಿ ಮೊಲಗಳು ಹೆಚ್ಚಾಗಿವೆ. ಈ ಭಾಗದ ಕೆರೆ ಕಟ್ಟೆಗಳಲ್ಲಿ ನಾನಾ ಪಕ್ಷಿಗಳು ಕಂಡು ಬರುತ್ತವೆ. ಮತ್ತು ತುಂಗಭದ್ರಾ ನದಿಯಲ್ಲಿ ಕೆಲವೊಂದು ಪಕ್ಷಿಗಳು ಕಂಡು ಬರುತ್ತಿವೆ.

ಒಟ್ಟಿನಲ್ಲಿ ಅರೆಮಲೆನಾಡು ಪ್ರದೇಶವಾದರೂ ಈ ಭಾಗದಲ್ಲಿ ಪ್ರಾಣಿ,ಪಕ್ಷಿಗಳು ಹೆಚ್ಚಾಗಿ ಕಂಡು ಬರುತ್ತಿವೆ.