ನಿತ್ಯವೂ ಅಪಘಾತ, ಆಂಬ್ಯುಲೆನ್ಸ್‌ ಖಾತ್ರಿ

ರಾಜು ನದಾಫ ಹಾವೇರಿ: ಸವೂರ-ಫಕ್ಕೀರನಂದಿಹಳ್ಳಿ ರಸ್ತೆ ಸಾಕಷ್ಟು ಹದಗೆಟ್ಟಿದ್ದು, ಅಪಘಾತ ವಲಯವಾಗಿದೆ. ಈ ರಸ್ತೆಯಲ್ಲಿಬೈಕ್‌ನಿಂದ ಬಿದ್ದು ಸೊಂಟ ಮುರಿದುಕೊಂಡು ಆಂಬ್ಯುಲೆನ್ಸ್‌ ಮೂಲಕ ಪಕ್ಕದ ಬಂಕಾಪುರ ಆಸ್ಪತ್ರೆಗೆ ಚಿಕಿತ್ಸೆಗಾಗಿ ದಾಖಲಾಗುವುದು ಸಹ ನಿತ್ಯದ ಮಾತಾಗಿದೆ.

ಬಂಕಾಪುರದಿಂದ ಫಕ್ಕೀರನಂದಿಹಳ್ಳಿಗೆ ಮೂರು ಕಿ.ಮೀ. ರಸ್ತೆ ಇದೆ. ಇಕ್ಕಟ್ಟಾದರೂ ಸುಮಾರು 1.20 ಕಿ.ಮೀ. ಅಗಲ ಮತ್ತು ಕಾಂಕ್ರೀಟ್‌ ಕಂಡಿದೆ. ಮುಂದೆ ಸವೂರ-ಫಕ್ಕೀರನಂದಿಹಳ್ಳಿ ವರೆಗಿನ ಒಂದೂವರೆ ಕಿ.ಮೀ. ರಸ್ತೆ ಸಂಪೂರ್ಣ ತಗ್ಗು-ಗುಂಡಿಗಳ ಸಾಮ್ರಾಜ್ಯವಾಗಿ ಗಾಡಿಗಳ ಸಂಚಾರ ಕಷ್ಟ, ಕಷ್ಟ ಎನ್ನುವಂತಿದೆ. ಸುತ್ತುವರಿದು ಊರು ತಲಪುವ ಬಸ್‌ ಮಾರ್ಗದ ಬದಲಿ ಕಷ್ಟವಾದರೂ ಜನ ಈ ರಸ್ತೆಯಲ್ಲೇ ಅನಿವಾರ್ಯವಾಗಿ ಸಂಚರಿಸುವಂತಾಗಿದೆ. ಪಂಚಾಯಿತಿ ಸದಸ್ಯರಿಗೆ ಹಿಡಿಶಾಪ ಮಾತ್ರ ನಿತ್ಯದ ಮಾತಾಗಿದೆ.

ಆಗಿದ್ದೇನೆ?: ಮೊಹರಂ ಹಬ್ಬಕ್ಕೆ ಊರಿಗೆ ಬಂಕಾಪುರದಿಂದ ಕಿರಾಣಿ ಖರೀದಿಸಿ ಸೋಮವಾರ ಬೈಕ್‌ನಲ್ಲಿಚಳ್ಯಾಳಕ್ಕೆ ಹೊರಟಿದ್ದ ದಂಪತಿ ಸವೂರ-ಫಕ್ಕೀರನಂದಿಹಳ್ಳಿ ಕ್ರಾಸ್‌ನಲ್ಲಿಬಿದ್ದಿದ್ದಾರೆ. ಈ ಸಮಯದಲ್ಲಿದಾರಿಯಲ್ಲಿರುವ ಡಾ.ಫೀರ್ಜಾದೆ ನರ್ಸ್‌ ಗಾಯಗೊಂಡಿದ್ದ ಹೆಣ್ಣುಮಗಳಿಗೆ ಪ್ರಥಮ ಚಿಕಿತ್ಸೆ ನೀಡಿ, ಬಟ್ಟೆ ಬದಲಾಯಿಸಲು ಅವಕಾಶ ಕೊಡುವ ಜತೆಗೆ ಸೊಂಟಕ್ಕೆ ಪೆಟ್ಟಾಗಿ ನಡೆದಾಡಲು ಸಹ ಸಾಧ್ಯವಾಗದ ಹಿನ್ನೆಲೆಯಲ್ಲಿತಕ್ಷಣ ಆಂಬ್ಯುಲೆನ್ಸ್‌ಗೆ ಕರೆ ಮಾಡಿ ಆಸ್ಪತ್ರೆಗೆ ಸಾಗಿಸಿ ಮಾನವೀಯತೆ ಮೆರೆದಿದ್ದರು.

ಈ ಘಟನೆ ಮಾಸುವ ಮುನ್ನವೇ ಪುನಃ ಮಂಗಳವಾರ ವ್ಯಾಪಾರಿಯೊಬ್ಬರು ಈ ಜಾಗೆಯಲ್ಲೇ ಬೈಕ್‌ ಸ್ಕಿಡ್‌ ಆಗಿ ಬಿದ್ದಿದ್ದಾರೆ. ಅವರಿಗೂ ಸೊಂಟಕ್ಕೆ ಪೆಟ್ಟು ಬಿದ್ದಿದೆ. ಈ ಘಟನಾವಳಿಯಿಂದಾಗಿ ರಸ್ತೆ ಅವ್ಯವಸ್ಥೆ ಫಕ್ಕೀರನಂದಿಹಳ್ಳಿ ಗ್ರಾಮಕ್ಕೆ ಕಪ್ಪುಚುಕ್ಕೆ ತಂದಿಟ್ಟಿದೆ. ಶಾಸಕರನ್ನೂ ಸೇರಿದಂತೆ ಈ ಹಳ್ಳಿಯ ಪಂಚಾಯಿತಿ ಸದಸ್ಯರ ನಿರ್ಲಕ್ಷೆಗೆ ಗ್ರಾಮಸ್ಥರು ಆಕ್ರೋಶಗೊಳ್ಳುವಂತೆ ಮಾಡಿದೆ. ಇಂಥ ಅವಘಡಗಳು ಆಗೊಮ್ಮೆ-ಈಗೊಮ್ಮೆ ನಡೆದಿದ್ದರೆ ಗ್ರಾಮಸ್ಥರು ಅಷ್ಟಾಗಿ ತಲೆ ಕೆಡಸಿಕೊಳ್ಳುತ್ತಿರಲಿಲ್ಲ. ಕೇವಲ ಎರಡೇ ದಿನಗಳಲ್ಲಿಬೈಕ್‌ನಲ್ಲಿಸಂಚರಿಸುವವರನ್ನು ಅಂಗವಿಕಲರನ್ನಾಗಿಸುತ್ತಿರುವುದು ಕೆರಳುವಂತೆ ಮಾಡಿದೆ.

ನೆರೆಯೂ ಕಾರಣ?: ಊರಿನ ಮುಂಭಾಗದಲ್ಲೇ ಹರಿಯುವ ಬಾಜೀರಾಯನ ಹಳ್ಳದ ಜಲ ಪ್ರತಾಪಕ್ಕೆ ಈ ಫಕ್ಕೀರನಂದಿಹಳ್ಳಿಯ ಜನತೆ ಅಕ್ಷರಶಃ ಆತಂಕಗೊಂಡಿದ್ದರು. ಊರಲ್ಲಿನೀರು ನುಗ್ಗಿ ರಸ್ತೆಗಳು ಜಲಾವೃತಗೊಂಡಿದ್ದವು. ಈ ನೀರು ಇಳಿಮುಖಗೊಳ್ಳುವವರೆಗೂ ರಸ್ತೆಯ ಮಾರ್ಗದಲ್ಲಿರುವ ಮನೆಗಳ ಜನರು ಹೊರಗೆ ಬರದ ಪರಿಸ್ಥಿತಿ ನಿರ್ಮಾಣವಾಗಿತ್ತು. ಈ ಫೋಟೋಗಳು ಸಹ ಸಾಮಾಜಿಕ ಜಾಲತಾಣದಲ್ಲಿಹರಿದಾಡುವ ಮೂಲಕ ಗ್ರಾಮಸ್ಥರ ದುಸ್ಥಿತಿಗೆ ಸಾಕ್ಷಿಯಾಗಿತ್ತು.

ಈಗ ನೆರೆ ಪರಿಸ್ಥಿತಿ ತೆರೆ ಕಂಡಿದೆ. ರಸ್ತೆ ಮಾತ್ರ ತಗ್ಗು-ಗುಂಡಿಗಳಿಂದಾಗಿ ಸಂಚಾರ ದುಸ್ತರಗೊಳ್ಳುವಂತೆ ಮಾಡಿದೆ. ಈ ರಸ್ತೆಯನ್ನು ದುರಸ್ತಿಗೊಳಿಸಿ ಎನ್ನುವ ಗ್ರಾಮಸ್ಥರ ಬೇಡಿಕೆಗೆ ಶಾಸಕರೂ ಸೇರಿದಂತೆ ಯಾವೊಬ್ಬ ಜನಪ್ರತಿನಿಧಿಗಳೂ ಕವಡೆ ಕಾಸಿನ ಕಿಮ್ಮತ್ತೂ ಕೊಟ್ಟಿಲ್ಲಎನ್ನುವುದಕ್ಕೆ ಈ ಘಟನಾವಳಿಗಳೇ ಸಾಕ್ಷಿಯಾಗಿವೆ. ಈ ನಿಟ್ಟಿನಲ್ಲಿಜನಪ್ರತಿನಿಧಿಗಳ ಮತ್ತು ಅಧಿಕಾರಿಗಳ ಕ್ರಮ ಏನು? ಕಾದು ನೋಡಬೇಕಿದೆ.