ಬೈಕ್‌ ಚೈನ್‌ ಕವರ್‌ನಲ್ಲಿ ನಾಗರಹಾವು..!

ಹಾವೇರಿ: ನಗರದ ಶಿವಲಿಂಗೇಶ್ವರ ನಗರದ ಗುತ್ತಲ ರಸ್ತೆಯ ಪಕ್ಕದಲ್ಲಿ ನಿಲ್ಲಿಸಿದ್ದ ಬೈಕ್‌ನ ಚೈನ್‌ ಕವರ್‌ನಲ್ಲಿ ನಾಗರಹಾವು ಸೇರಿಕೊಂಡು ಕೆಲಕಾಲ ಆತಂಕದ ವಾತಾವರಣ ಭಾನುವಾರ ನಿರ್ಮಾಣವಾಯಿತು.

ಬೈಕ್‌ನೊಳಗೆ ಸಿಲುಕಿದ್ದ ಹಾವು ಹೊರಬರಲು ಪರದಾಡುತ್ತಿತ್ತು. ಬೈಕ್‌ ಸವಾರ ನಾಗರಹಾವನ್ನು ಹೊರ ತೆಗೆಯಲು ಹರಸಾಹಸ ಪಟ್ಟರೂ ಹಾವು ಹೊರಗೆ ಬಾರಲಿಲ್ಲ. ಕೊನೆಗೆ ಹಾವು ರಕ್ಷಕ ದೇವರಾಜ ಅಳವಂಡಿ ಅವರನ್ನು ಕರೆಯಿಸಿ ಬೈಕ್‌ನಲ್ಲಿದ್ದ ನಾಗರ ಹಾವನ್ನು ಹೊರತೆಗೆಯಲಾಯಿತು. ಈ ಸಂದರ್ಭದಲ್ಲಿ ಹಾವಿಗೆ ಸಣ್ಣಪುಟ್ಟ ಗಾಯಗಳಾಗಿದ್ದು, ಸುರಕ್ಷಿತವಾಗಿ ಕಾಡಿಗೆ ಬಿಡಲಾಯಿತು.