ಪೊಲೀಸರಿಗೆ ಬ್ರಷ್‌, ಪೇಸ್ಟ್‌, ಸೋಪು, ಸೇವಿಂಗ್‌ ಕಿಟ್‌

ಹಾವೇರಿ: ಹಾವೇರಿ ಲೋಕಸಭಾ ಚುನಾವಣೆಯ ಮತದಾನ ಬದೋಬಸ್ತ್‌ಗಾಗಿ ಆಯೋಜಿಸಲಾಗಿದ್ದ ಪೊಲೀಸ್‌ ಸಿಬ್ಬಂದಿಗೆ ಪ್ರಥಮ ಬಾರಿಗೆ ಜಿಲ್ಲೆಯ ಪೊಲೀಸ್‌ ಇಲಾಖೆಯು ವಿಶೇಷ ಕಿಟ್‌ಗಳನ್ನು ನೀಡಿದೆ.

ಏ.23 ರಂದು ನಡೆಯಲಿರುವ ಚುನಾವಣೆ ಕರ್ತವ್ಯಕ್ಕೆ ಜಿಲ್ಲೆ, ಹೊರ ಜಿಲ್ಲೆಯ ಪೊಲೀಸ್‌ ಸಿಬ್ಬಂದಿ ಹಾಜರಾಗಿದ್ದು, ಅವರಿಗೆ ದಿನದ ಅವಶ್ಯಕತೆಗೆ ತಕ್ಕಂತೆ ವಿಶೇಷ ಕಿಟ್‌ ನೀಡಿ ಉತ್ಸಾಹ ತುಂಬಿದೆ.

ಕಿಟ್‌ಲ್ಲಿ ಏನಿದೆ?: ಪೊಲೀಸರಿಗೆ ನೀಡಿರುವ ಕಿಟ್‌ನಲ್ಲಿ 2 ಲೀ. ನೀರಿನ ಬಾಟಲ್‌, ಬಿಸ್ಕಿಟ್‌, ಬ್ರಷ್‌, ಪೇಸ್ಟ್‌, ಚಾಕಲೇಟ್‌, ಮೆಡಿಮಿಕ್ಸ್‌ ಸೋಪು, ಸೇವಿಂಗ್‌ ಕಿಟ್‌, ಸೇವಿಂಗ್‌ ಕ್ರಿಮ್‌, ನವರತ್ನ ಎಣ್ಣೆ ಸೇರಿದಂತೆ ಇತರೆ ವಸ್ತುಗಳು ಸೇರಿ ಒಟ್ಟು 80 ರಿಂದ 100 ರೂ. ಮೌಲ್ಯದ ವಸ್ತುಗಳನ್ನು ನೀಡಲಾಗಿದೆ. ಪುರುಷ ಮತ್ತು ಮಹಿಳೆಯರಿಗೂ ಒಂದೇ ಕಿಟ್‌ ಕೊಟ್ಟಿದ್ದಾರೆ.

ಕಿಟ್‌ ನೀಡುವ ಉದ್ದೇಶ: ಪೊಲೀಸ್‌ ಇಲಾಖೆಯಲ್ಲಿ ಪ್ರತಿನಿತ್ಯ ಪೊಲೀಸ್‌ ಸಿಬ್ಬಂದಿ ಸೇವಿಂಗ್‌ ಮಾಡಿಕೊಳ್ಳಬೇಕು ಎಂಬ ನಿಯಮವಿದೆ. ತುರ್ತು ಕೆಲಸಕ್ಕೆ ಹಾಜರಾಗುವ ತರಾತುರಿಯಲ್ಲಿ ಸೊಳ್ಳೆ ಬತ್ತಿ, ಸೇವಿಂಗ್‌ ಕಿಟ್‌, ಬ್ರಷ್‌, ಸೋಪು ಸೇರಿದಂತೆ ದಿನದ ಬಳಕೆಯ ಅಗತ್ಯವಸ್ತುಗಳನ್ನು ಮರೆತು ಬರುತ್ತಾರೆ. ನಂತರ ಅವರಿಗೆ ಮಾನಸಿಕ ಕಿರಿಕಿರಿ ಆಗಬಾರದು ಎಂಬ ದೃಷ್ಟಿಯಿಂದ ಮತ್ತು ಆರೋಗ್ಯದ ಹಿತದೃಷ್ಟಿಯಿಂದ ಅಂದಿನ ದಿನದ ಬಳಕೆಯ ವಸ್ತುಗಳನ್ನು ನೀಡಲಾಗುತ್ತದೆ ಎಂದು ಜಿಲ್ಲಾ ಪೊಲೀಸ್‌ ವರಿಷ್ಠಾಧಿಕಾರಿ ಕೆ.ಪರಶುರಾಮ್‌ ತಿಳಿಸಿದರು.

ಖುಷಿಯಿಂದ ಹಾಜರ್‌: ಚುನಾವಣೆಯ ತರ್ಕವ್ಯಕ್ಕೆ ಹಾಜರಾಗುವ 6 ಡಿವೈಎಸ್ಪಿ, 18 ವೃತ್ತ ಆರಕ್ಷ ಕ ನಿರೀಕ್ಷ ಕರು, 21 ಪೊಲೀಸ್‌ ಸಬ್‌ ಇನ್ಸಪೆಕ್ಟರ್‌ಗಳು, 18 ಸಹಾಯಕ ಪೊಲೀಸ್‌ ಇನ್ಸಪೆಕ್ಟರ್‌, 1039 ಮುಖ್ಯ ಪೇದೆ ಹಾಗೂ ಪೇದೆಗಳು, 998 ಗೃಹರಕ್ಷ ಕ ಪೇದೆಗಳು, 85 ಜೈಲು ಸಿಬ್ಬಂದಿ, 18 ಫಾರೆಸ್ಟ್‌ ಗಾರ್ಡ್‌, 20 ಡಿ.ಎ.ಆರ್‌. ತಂಡ, 6 ಕೆ.ಎಸ್‌.ಆರ್‌.ಪಿ. ತಂಡ, 6 ಕೇಂದ್ರ ಸಶಸ್ತ್ರ್ರ ಮೀಸಲು ಪಡೆ ತಂಡ ಸೇರಿದಂತೆ ಒಟ್ಟು 3200 ಕಿಟ್‌ಗಳನ್ನು ವಿತರಿಸಲಾಗಿದೆ.

ಪೊಲೀಸ್‌ ಸಿಬ್ಬಂದಿಗಳಿಗೆ ಮೊದಲ ಬಾರಿ ಇಂತಹ ಕಿಟ್‌ಗಳನ್ನು ನೀಡಿದ್ದು, ವಿಶೇಷ ಮತ್ತು ಪೊಲೀಸ್‌ ಸಿಬ್ಬಂದಿಗಳಿಗೆ ಆಶ್ಚರ್ಯವಾಗಿದೆ. ಪೊಲೀಸ್‌ ಸಿಬ್ಬಂದಿ ನಗುಮೂಗದಿಂದ ಕಿಟ್‌ಗಳನ್ನು ಪಡೆದು ಸಂತಸದಿಂದ ಕರ್ತವ್ಯ ಹಾಜರಾಗಿದ್ದಾರೆ.