ದುಶ್ಚಟದಿಂದ ಮನುಷ್ಯನ ಜೀವನ ನಾಶ: ಜಿಲ್ಲಾಧಿಕಾರಿ

ಹಾವೇರಿ: ದುಶ್ಚಟಗಳಿಂದ ಕುಟುಂಬದ ನೆಮ್ಮದಿ ಹಾಳಾಗುತ್ತದೆ. ಜೀವನದಲ್ಲಿ ಉತ್ತಮ ಹವ್ಯಾಸಗಳನ್ನು ರೂಢಿಸಿಕೊಳ್ಳುವ ಮೂಲಕ ವ್ಯಸನಗಳಿಂದ ದೂರವಿರಬೇಕು ಎಂದು ಜಿಲ್ಲಾಧಿಕಾರಿ ಕೃಷ್ಣ ಬಾಜಪೇಯಿ ಹೇಳಿದರು.

ಕೆರಿಮತ್ತಿಹಳ್ಳಿಯ ಜಿಲ್ಲಾ ಕಾರಾಗೃಹದಲ್ಲಿ ವಿಶೇಷಚೇತನರ ಹಾಗೂ ಹಿರಿಯ ನಾಗರಿಕರ ಸಬಲೀಕರಣ ಇಲಾಖೆ ಹಾಗೂ ಅನ್ನಪೂರ್ಣ ಮದ್ಯಪಾನ ವ್ಯಸನ ಮುಕ್ತ ಕೇಂದ್ರದ ಸಹಯೋಗದಲ್ಲಿ ನಡೆದ ವಿಶ್ವ ಮಾದಕ ವಸ್ತು ವಿರೋಧಿ ದಿನಾಚರಣೆ ಕಾರ್ಯಕ್ರಮ ಉದ್ಘಾಟಿಸಿ ಮಾತನಾಡಿದರು.

ಮನುಷ್ಯನಿಗೆ ಆರೋಗ್ಯದ ಬಗ್ಗೆ ಕಾಳಜಿ ಇರಬೇಕು, ಮಾನಸಿಕ ಹಾಗೂ ದೈಹಿಕವಾಗಿ ಸದೃಢನಾಗಿರಬೇಕು. ದುಶ್ಚಟಗಳಿಂದ ಮನುಷ್ಯನ ಜೀವನ ನಾಶವಾಗುತ್ತದೆ. ಆರೋಗ್ಯದ ಮೇಲೆ ದುಷ್ಪರಿಣಾಮಗಳು ಉಂಟಾಗಿ ಮಾನಸಿಕ ರೋಗಿಗಳಾಗುವ ಸಾಧ್ಯತೆ ಇರುತ್ತದೆ ಎಂದರು.

ಜಿಲ್ಲಾ ವಿಶೇಷಚೇತನರ ಕಲ್ಯಾಣಾಧಿಕಾರಿ ಡಾ. ಮಲ್ಲಿಕಾರ್ಜುನ ಮಠದ ಮಾತನಾಡಿ, ದುಶ್ಚಟಗಳು ಅಪರಾಧಿಯನ್ನಾಗಿ ಮಾಡುತ್ತವೆ. ಅಪರಾಧಿಗಳಾಗಿ ಕಾರಾಗೃಹಕ್ಕೆ ಬಂದವರು ಹೊರಗೆ ಬರುವಾಗ ಒಳ್ಳೆಯ ಮನುಷ್ಯನಾಗಿ ಬರಬೇಕು. ಈ ಹಿನ್ನೆಲೆಯಲ್ಲಿ ಇಂತಹ ಅರಿವು ಮೂಡಿಸುವ ಕಾರ್ಯಕ್ರಮಗಳನ್ನು ಆಯೋಜಿಸಲಾಗುತ್ತಿದ್ದು, ಜೈಲು ಪರಿವರ್ತನಾ ಕೇಂದ್ರವಾಗಿದೆ. ತಾವುಗಳು ಇದರ ಸದುಪಯೋಗ ಪಡೆದುಕೊಳ್ಳಬೇಕು ಎಂದರು.

ಡಾ. ವಿಜಯಕುಮಾರ ಬಳಿಗಾರ, ಡಾ. ಪಿ.ಲೀಲಾ ಮಾತನಾಡಿ, ದುಶ್ಚಟಗಳಿಗೆ ದಾಸರವಾಗುವುದು ಸುಲಭ. ಆದರೆ, ಅವುಗಳನ್ನು ಬಿಡುವುದು ತುಂಬಾ ಕಷ್ಟವಾಗಿದೆ. ದುಶ್ಚಟಗಳನ್ನು ಬಿಡಿಸಲು ಸರಕಾರಿ ಆಸ್ಪತ್ರೆಗಳಲ್ಲಿ ಉಚಿತ ಚಿಕಿತ್ಸೆ ನೀಡಲಾಗುವುದು. ವ್ಯಸಗಳಿಗೆ ದಾಸರಾದವರು ಉಚಿತ ಚಿಕಿತ್ಸೆಯ ಸದುಪಯೋಗಪಡೆದುಕೊಳ್ಳಬೇಕು ಎಂದು ತಿಳಿಸಿದರು. ಅಧ್ಯಕ್ಷ ತೆ ವಹಿಸಿದ್ದ ಜಿಲ್ಲಾ ಕಾರಾಗೃಹ ಅಧೀಕ್ಷ ಕ ಟಿ.ಬಿ. ಭಜಂತ್ರಿ ಅವರು ಪ್ರತಿಜ್ಞಾವಿದಿ ಬೋಧಿಸಿದರು. ಅನ್ನಪೂರ್ಣ ಆಸ್ಪತ್ರೆ ವ್ಯವಸ್ಥಾಪಕ ರಮೇಶ ಕೆ.ಎಂ. ಪ್ರಾಸ್ತಾವಿಕವಾಗಿ ಮಾತನಾಡಿದರು. ಬ್ರಹ್ಮಕುಮಾರಿ ಲೀಲಾಜಿ ಅಕ್ಕ, ವಕೀಲರಾದ ಎಂ.ಎಚ್‌.ವಾಲಿಕಾರ, ಸಂತೋಷ ಎಸ್‌.ಐಹೊಳೆ, ರಿಯಾಜ್‌ ಮುದಕವಿ ಉಪಸ್ಥಿತರಿದ್ದರು.