ಯೋಜನೆ ಹಣ ಸಾಲಕ್ಕೆ ಜಮಾ ಮಾಡ್ಬೇಡಿ

ಬ್ಯಾಡಗಿ : ರೈತರಿಗೆ ಸರಕಾರದ ವಿವಿಧ ಯೋಜನೆಗಳಿಂದ ಜಮಾ ಆದ ಮೊತ್ತವನ್ನು ಬೆಳೆ ಸಾಲದ ಮೊತ್ತಕ್ಕೆ ಜಮಾ ಮಾಡಿಕೊಳ್ಳದಂತೆ ಆಗ್ರಹಿಸಿ ಬ್ಯಾಡಗಿ ತಾಲೂಕಿನ ಶಿಡೇನೂರ ಗ್ರಾಮದ ರೈತರು ಸಿಂಡಿಕೇಟ್‌ ಬ್ಯಾಂಕ್‌ ವ್ಯವಸ್ಥಾಪಕರಿಗೆ ಮನವಿ ಸಲ್ಲಿಸಿದರು.

ಈ ಸಂದರ್ಭದಲ್ಲಿ ಮಾತನಾಡಿದ ರೈತ ಮುಖಂಡ ಕಿರಣಕುಮಾರ ಗಡಿಗೋಳ, ಕಳೆದ ನಾಲ್ಕೈದು ವರ್ಷದಿಂದ ಸಮರ್ಪಕ ಮಳೆಯಾಗದೇ ರೈತರು ಕಂಗಾಲಾಗಿದ್ದಾರೆ. ಇದರ ಮಧ್ಯೆ ಸಾಲಮನ್ನಾ ಮಾಡುವುದಾಗಿ ಸರಕಾರಗಳು ರೈತರನ್ನು ದಾರಿ ತಪ್ಪಿಸುತ್ತಿವೆ. ಸಾಲ ಮನ್ನಾ ಆದೇಶ ಹೊರಡಿಸಿ ಸಾಕಷ್ಟು ತಿಂಗಳುಗಳೆ ಕಳೆದಿದ್ದರೂ ಸಂಪೂರ್ಣ ಸಾಲ ಮನ್ನಾ ಆಗಿಲ್ಲ. ಕೆಲವರ ಖಾತೆಗೆ ಹಣ ಜಮಾ ಆಗಿದ್ದರೇ ಇನ್ನೂ ಕೆಲ ರೈತರಿಗೆ ಈ ಅವಕಾಶ ದೊರೆತಿಲ್ಲ. ಹೀಗಿರುವಾಗ ಶಿಡೇನೂರ ಬ್ಯಾಂಕ್‌ ಸಿಬ್ಬಂದಿ ರೈತರಿಗೆ ಬರುವ ವಿವಿಧ ಯೋಜನೆಗಳ ಮೊತ್ತವನ್ನು ಸಾಲಕ್ಕೆ ಜಮಾ ಮಾಡಿಕೊಳ್ಳುತ್ತಿರುವುದು ಖಂಡನೀಯ. ಈ ವರ್ತನೆ ನಿಲ್ಲಿಸದಿದ್ದಲ್ಲಿ ಬ್ಯಾಂಕಗೆ ಬೀಗ ಜಡಿದು ಪ್ರತಿಭಟನೆ ನಡೆಸಲಾಗುವುದು ಎಂದು ಎಚ್ಚರಿಸಿದರು.

ಪಿಂಚಣಿ, ಕೂಲಿ ಹಣ ಬಿಡುತ್ತಿಲ್ಲ:
ಶಂಭನಗೌಡ ಬಿದರಕಟ್ಟಿ ಮಾತನಾಡಿ, ಶೀಡೆನೂರ ಶಾಖೆಯ ರೈತರ ಖಾತೆಗಳಿಗೆ ಕೃಷಿ ಹೊಂಡದ ಸಹಾಯಧನ, ಎನ್‌ಆರ್‌ಇಜಿಒ ಕೂಲಿ ಹಣ, ವೃದ್ಧಾಪ್ಯ ವೇತನ, ರೇಷ್ಮೆ ಸಹಾಯಧನ, ಆಶ್ರಯ ಮನೆಗಳ ಅನುದಾನ, ಪಿಂಚಣಿ ಹಣ ಜಮೆಯಾದರೂ ಎಲ್ಲವನ್ನು ಬೆಳೆ ಸಾಲಕ್ಕೆ ಜಮಾ ಮಾಡಿಕೊಳ್ಳಲಾಗುತ್ತಿದೆ. ಈ ಕುರಿತಂತೆ ಹಲವಾರು ಬಾರಿ ರೈತ ಸಂಘದ ಮೂಲಕ ಮನವಿ ಮಾಡಲಾಗಿದೆ. ಇಷ್ಟಾದರೂ ವ್ಯವಸ್ಥಾಪಕರು ಕ್ರಮ ಕೈಗೊಳ್ಳುತ್ತಿಲ್ಲ. ಕೂಡಲೇ ಮತ್ತೆ ಇಂತಹ ಸಮಸ್ಯೆ ಉದ್ಭವವಾಗದಂತೆ ನೋಡಿಕೊಳ್ಳುವಂತೆ ಮನವಿ ಮಾಡಿದರಲ್ಲದೇ ಗ್ರಾಹಕರೊಂದಿಗೆ ಬ್ಯಾಂಕ್‌ ಸಿಬ್ಬಂದಿ ಸೌಜನ್ಯದಿಂದ ನಡೆದುಕೊಳ್ಳುವುದನ್ನು ಕಲಿಯಲಿ ಎಂದು ಎಚ್ಚರಿಸಿದರು.

ಆರ್‌.ಎಸ್‌.ಮಲ್ಲಾಡದ, ವೀರಪ್ಪ ಬಿದರಿ, ಎನ್‌.ಬಿತೆವರಿ, ಬಸವರಾಜ ಹುಲ್ಲತ್ತಿ, ಮಾಲ ತೇಶ ಮಂಜಪ್ಪ ಅರಳಿಕಟ್ಟಿ, ಇನ್ನಿತರರು ಉಪಸ್ಥಿತರಿದ್ದರು.