120 ರೋಗಿಗಳಿಗೆ ಒಬ್ಬರೇ ಡಾಕ್ಟರ್‌!

ಸವಣೂರು: ತಾಲೂಕಿನ ಕಾರಡಗಿ ಗ್ರಾಮದ ಸರಕಾರಿ ಪ್ರಾಥಮಿಕ ಆರೋಗ್ಯ ಕೇಂದ್ರದಲ್ಲಿ ವೈದ್ಯರಿಲ್ಲದೇ ಬಡ ರೋಗಿಗಳು ಚಿಕಿತ್ಸೆಗೆ ಪರದಾಡುತ್ತಿದ್ದಾರೆ.

ಕಾರಡಗಿ ಆಸ್ಪತ್ರೆಯನ್ನು ಸುತ್ತಮುತ್ತಲ 9 ಹಳ್ಳಿಗಳ ವ್ಯಾಪ್ತಿಯ 23,130 ಜನತೆ ಅವಲಂಬಿಸಿದೆ. ಆದರೆ, 2 ವರ್ಷಗಳಿಂದ ಹೊರಗುತ್ತಿಗೆ ಆಧಾರದ ಮೇಲೆ ಬಿಎಎಂಎಸ್‌ ಒಬ್ಬ ವೈದ್ಯರು ಮಾತ್ರ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ.

ಆಸ್ಪತ್ರೆಯಲ್ಲಿ ಒಪಿಡಿಗೆ ಪ್ರತಿ ದಿನ 70-80 ಮತ್ತು ಸೋಮವಾರ ಮತ್ತು ಗುರುವಾರ 120 ಕ್ಕೂ ಹೆಚ್ಚು ರೋಗಿಗಳು ಬರುತ್ತಾರೆ. ಆದರೆ ಒಬ್ಬರೇ ವೈದ್ಯರಿಂದ ಚಿಕಿತ್ಸೆ ಕಷ್ಟವಾಗಿದೆ. ರೋಗಿಗಳಿಗೆ ಸಮರ್ಪಕ ಚಿಕಿತ್ಸೆಗೆ ವೈದ್ಯರ ಕೊರತೆ ಕಾಡುತ್ತಿದೆ.

ಕಾರಡಗಿ ಸರಕಾರಿ ಆಸ್ಪತ್ರೆಯ ಎಂಬಿಬಿಎಸ್‌ ವೈದ್ಯರ ಮತ್ತು ಆಸ್ಪತ್ರೆಯ ಆಡಳಿತಾಧಿಕಾರಿ ಹುದ್ದೆ 5 ವರ್ಷದಿಂದ ಖಾಲಿ ಇದೆ. ವೈದ್ಯರ ಸಿಬ್ಬಂದಿ ಸೇರಿ ಒಟ್ಟು 13 ಹುದ್ದೆಗಳು ಇರಬೇಕು. ಆದರೆ ಇರುವ 6 ಸಿಬ್ಬಂದಿಗಳಲ್ಲಿ ಹೊರಗುತ್ತಿಗೆ ಆಧಾರದಲ್ಲಿ ಒಬ್ಬರು ಬಿಎಎಂಎಸ್‌ ವೈದ್ಯರು, ಲ್ಯಾಬ್‌ ಟೆಕ್ನಿಷಿಯನ್‌ ಮಾತ್ರ ಕಾರ್ಯನಿರ್ವಹಿಸುತ್ತಿದ್ದಾರೆ. ಇನ್ನು 8 ಜನ ಕಿರಿಯ ಆರೋಗ್ಯ ಸಹಾಯಕರಲ್ಲಿ ಇಬ್ಬರು ಮಾತ್ರ ಇದ್ದು, ಅದರಲ್ಲಿ ಒಬ್ಬ ಮಹಿಳಾ ಆರೋಗ್ಯ ಸಹಾಯಕಿ ಕಳೆದ ಐದು ವರ್ಷದಿಂದ ಅನಧಿಕೃತವಾಗಿ ಗೈರು ಉಳಿದಿದ್ದಾರೆ. ಇದರಿಂದ ಗರ್ಭಿಣಿಯರಿಗೆ ಮತ್ತು ಮಕ್ಕಳಿಗೆ ನೀಡುವ ಲಸಿಕೆ ಕಾರ್ಯಕ್ರಮ ಯಾವುದೇ ಗ್ರಾಮಗಳಲ್ಲಿ ನಡೆಯುತ್ತಿಲ್ಲ.

ಆಸ್ಪತ್ರೆಯಲ್ಲಿ ಸದ್ಯಕ್ಕೆ ಲ್ಯಾಬ್‌ ಟೆಕ್ನಿಷಿಯನ್‌, ಕಿರಿಯ ಆರೋಗ್ಯ ಸಹಾಯಕ, ಡಿ ಗ್ರೂಪ್‌ ನೌಕರರು ಸೇವೆ ಸಲ್ಲಿಸುತ್ತಿದ್ದಾರೆ. ಔಷಧಿಗಳಿಗೆ ಕೊರತೆ ಇಲ್ಲ. ಔಷಧಿ ವಿತರಣಾ ಕೊಠಡಿ, ರೋಗಿಗಳನ್ನು ದಾಖಲು ಮಾಡಿಕೊಳ್ಳುವ ಕೊಠಡಿ, ಲ್ಯಾಬ್‌ ರೂಂ ಎಲ್ಲವೂ ಇವೆ. ಆದರೆ ಆಸ್ಪತ್ರೆಯಲ್ಲಿ ಸಿಬ್ಬಂದಿ ಸಮಸ್ಯೆ ಒಂದೆಡೆಯಾದರೆ, ಊರು ಹೊರ ಭಾಗದಲ್ಲಿ ಆಸ್ಪತ್ರೆಗೆ ಕಂಪೌಂಡ್‌ ಇಲ್ಲ. ಇದರಿಂದ ರಾತ್ರಿ ಕುಡುಕರ ಹಾವಳಿ ಕಂಡುಬರುತ್ತದೆ. ಇನ್ನು ಮುಂದೆಯಾದರೂ ಸಂಬಂಧಿಸಿದವರು ಇತ್ತ ಗಮನಹರಿಸಿ ಆಸ್ಪತ್ರೆಗೆ ವೈದ್ಯರ ನಿಯೋಜನೆ ಮಾಡಬೇಕಿದೆ.