ಸಂಗೀತದಿಂದ ಮನಸ್ಸಿಗೆ ನೆಮ್ಮದಿ

ಹಾವೇರಿ: ಸಂಗೀತ ಆಲಿಸುವುದರಿಂದ ಮನಸ್ಸಿಗೆ ನೆಮ್ಮದಿ ಮತ್ತು ಮುದ ನೀಡುತ್ತದೆ. ಸಂಗೀತಕ್ಕೆ ಯಾವುದೇ ಭಾಷೆ, ಗಡಿ, ಜಾತಿ ಇಲ್ಲ ಎಂದು ಶಿಶುನಾಳ ಶರೀಫಜ್ಜನವರ ಮೊಮ್ಮಗ ಹುಸೇನ್‌ಸಾಬ ಶರೀಫನವರ ಹೇಳಿದರು.

ನಗರದಲ್ಲಿ ಸೋಮವಾರ ನಡೆದ ಕರೋಕೆ, ಆ್ಯಕ್ಟಿಂಗ್‌ ತರಬೇತಿ ಮತ್ತು ರಿಕಾರ್ಡಿಂಗ್‌ ಸೆಂಟರ್‌ ಪ್ರಾರಂಭೋತ್ಸವ ಕಾರ್ಯಕ್ರಮದಲ್ಲಿ ಹಾಡು ಹಾಡುವ ಮೂಲಕ ಉದ್ಘಾಟಿಸಿದರು.

ಸಂಗೀತಕ್ಕೆ ಯಾವ ವಯಸ್ಸಿನ ಮಿತಿ ಇಲ್ಲ. ಸಂಗೀತ ಕೇಳುವುದರಿಂದ ಮನುಷ್ಯನಲ್ಲಿರುವ ಕಾಯಿಲೆಗಳು ದೂರವಾಗುತ್ತವೆ. ಸಂಗೀತವನ್ನು ಹಾಡುವುದು ಅಷ್ಠೇ ಅಲ್ಲ. ಅದನ್ನು ಕೇಳುವುದು ಸಹ ಒಳ್ಳೆಯದು. ಇದನ್ನು ಎಲ್ಲರೂ ಜೀವನದಲ್ಲಿ ಅಳವಡಿಸಿಕೊಂಡು ನೆಮ್ಮದಿಯ ಜೀವನ ನಡೆಸಬೇಕು ಎಂದರು.

ಈ ಸಂದರ್ಭದಲ್ಲಿ ಶರೀಫರು ರಚಿಸಿದ ಎಂತ ಭಕ್ತಿ ಹೋಂಟಾಳಿಕಿ ಕುಂಬಾರಕಿ.. ಕೋಡಗನ ಕೋಳಿ ನುಂಗಿತ್ತಾ ತಂಗಿ.. ಗೀತೆಗಳನ್ನು ಹಾಡಿ ರಂಜಿಸಿದರು. ಈ ಸಂದರ್ಭದಲ್ಲಿ ರಾಘವೇಂದ್ರ ಕಬಾಡಿ, ಶಿವಬಸವ ಬಣಕಾರ, ವೀರಣ್ಣ ಬೈರಾಪುರ, ಸತೀಶ ಚವ್ಹಾಣ, ಮಾರುತಿ ಜಂಗಣ್ಣನವರ, ಕೆ. ಪರಶೆಟ್ಟಿ, ಕರೇಗೌಡ ಪಾಟೀಲ, ವೀಣಾ, ಕಾವ್ಯಾ, ಶಿಲ್ಪಾ ಕಬಾಡಿ, ಶಶಿಕಲಾ ಪಾಟೀಲ, ಶ್ರೇಯಾ ಬಣಕಾರ ಸುಚಿತಾ ಕಬಾಡಿ, ಸೇರಿದಂತೆ ಉಪಸ್ಥಿತರಿದ್ದರು.