ಬ್ಯಾಂಕ್‌ಗೆ ರೈತರ ಮುತ್ತಿಗೆ, ಪ್ರತಿಭಟನೆ

ಸವಣೂರು: ರೈತರಿಗೆ ಋುಣಮುಕ್ತ ಪತ್ರ ವಿತರಿಸುವಲ್ಲಿ ವಿಳಂಬ ನೀತಿ ಅನುಸರಿಸಲಾಗುತ್ತಿದೆ ಎಂದು ಆರೋಪಿಸಿ ಕರ್ನಾಟಕ ಅನ್ನದಾತ ಕೃಷಿಕ ಸಮಾಜದ ಪದಾಧಿಕಾರಿಗಳು ಸೋಮವಾರ ಪಟ್ಟಣದ ಸ್ಟೇಟ್‌ ಬ್ಯಾಂಕ್‌ ಆಫ್‌ ಇಂಡಿಯಾ ಬ್ಯಾಂಕ್‌ ಶಾಖೆಗೆ ಮುತ್ತಿಗೆ ಹಾಕಿ ಪ್ರತಿಭಟಿಸಿದರು.

ಸವಣೂರು ತಾಲೂಕಿನ ಮಂತ್ರೋಡಿ ಗ್ರಾಮದ ಕಾರಡಗಿ, ಮರಬಸನಗೌಡ್ರ, ಗಾಳಿಗೌಡ್ರ ಸೇರಿದಂತೆ ವಿವಿಧ ರೈತರ ಋುಣಮುಕ್ತ ಪತ್ರ ನೀಡಲು ಬ್ಯಾಂಕ್‌ ಅಧಿಕಾರಿಗಳು ಸತಾಯಿಸುತ್ತಿದ್ದಾರೆ. ಪಟ್ಟಣದ ಬ್ಯಾಂಕ್‌ನಲ್ಲಿ ಸಣ್ಣ ಕೆಲಸಕ್ಕಾಗಿ ನಿತ್ಯ ಅಲೆದಾಡಿಸುತ್ತಾರೆ ಎಂದು ಆರೋಪಿಸಿ ರೈತರು ಬ್ಯಾಂಕ್‌ ಅಧಿಕಾರಿಗಳೊಂದಿಗೆ ವಾಗ್ವಾದ ನಡೆಸಿದರು.

ಈ ಸಂದರ್ಭದಲ್ಲಿ ಸ್ಥಳಕ್ಕೆ ಆಗಮಿಸಿದ ಸಿಪಿಐ ಎಚ್‌.ಮೈಲಾರ ಹಾಗೂ ಸಿಬ್ಬಂದಿ ರೈತರ ಬೇಡಿಕೆ ಈಡೇರಿಸಲು ಅವಶ್ಯವಾಗಿರುವ ಕ್ರಮ ಕೈಗೊಳ್ಳಲು ಹಿರಿಯ ಅಧಿಕಾರಿಗಳೊಂದಿಗೆ ಚರ್ಚಿಸುವಂತೆ ಬ್ಯಾಂಕ್‌ ಸಹಾಯಕ ವ್ಯವಸ್ಥಾಪಕ (ಮ್ಯಾನೇಜರ್‌) ಗಣೇಶ ಎ.ಪಿ ಅವರಿಗೆ ತಿಳಿಸಿದರು.

ಗಣೇಶ ಎ.ಪಿ ಅವರು ಕೂಡಲೇ ಬ್ಯಾಂಕ್‌ ಮೇಲಾಧಿಕಾರಿಗಳೊಂದಿಗೆ ಚರ್ಚಿಸಿ, ಈ ಕುರಿತು ಸಮಯ ಅವಕಾಶ ನೀಡಲು ಕೋರಿದರು. ಆದರೆ ರೈತರು ಇದು ಹತ್ತು ನಿಮಿಷದಲ್ಲಿ ಆಗುವ ಕೆಲಸ ನಾವು ಎರಡು ಗಂಟೆ ಬೇಕಾದರು ಕುಳಿತುಕೊಳ್ಳುತ್ತೆವೆ ಎಂದು ಪಟ್ಟು ಹಿಡಿದರು. ರೈತರ ಬೇಡಿಕೆಯಂತೆ ಋುಣಮುಕ್ತ ಪತ್ರ ವಿತರಿಸಲಾಯಿತು. ನಂತರ, ರೈತ ಸಂಘದ ಪದಾಧಿಕಾರಿಗಳು ಪ್ರತಿಭಟನೆ ಹಿಂದೆ ಪಡೆದರು.

ಕರ್ನಾಟಕ ಅನ್ನದಾತ ಕೃಷಿಕ ಸಮಾಜದ ರಾಜ್ಯ ಅಧ್ಯಕ್ಷ ಶಿವಾನಂದ ಯಲಿಗಾರ, ಪದಾಧಿಕಾರಿಗಳಾದ ಸಿದ್ದನಗೌಡ ಪಾಟೀಲ, ಶಂಕ್ರಣ್ಣ ಅರಗೋಳ, ಶಂಕರಗೌಡ ಪಾಟೀಲ, ಬಸವರಾಜ ಅಕ್ಕಿ, ಗದಿಗೇಪ್ಪ ಗುದಗಿ, ಓಂಕಾರಗೌಡ ಪಾಟೀಲ, ವಿರೇಶ ದೊಡ್ಡಮನಿ, ಬಸಲಿಂಗಪ್ಪ ಬ್ಯಾಳಿ ಹಾಗೂ ಇತರರು ಇದ್ದರು.