ಫಸ್ಟ್‌ ವೋಟಿಂಗ್‌ ಫುಳಕ, ಉತ್ಸಾಹ..

ಹಾವೇರಿ: ಮತಗಟ್ಟೆಯ ಪ್ರಕ್ರಿಯೆ ಹೇಗಿರುತ್ತದೆ ಎಂಬ ಭಯ ಒಂದು ಕಡೆಯಾದರೆ ಇನ್ನೊಂದು ಕಡೆ ತಮ್ಮ ಪರಮಾಧಿಕಾರ ಚಲಾಯಿಸುವ ಉತ್ಸಾಹ, ಹೆಮ್ಮೆ..

ಇದು, ಹಾವೇರಿಯಲ್ಲಿ ಮೊದಲ ಬಾರಿಗೆ ಮತದಾನ ಮಾಡಿದ ಯುವಕ/ ಯುವತಿಯರ ಅನಿಸಿಕೆಗಳು. ಹೊಸ ಮತದಾರರು ಉತ್ಸಾಹದಿಂದ ತಮ್ಮ ಗೆಳೆಯ/ಗೆಳೆತಿಯರು, ತಂದೆ ತಾಯಿ ಜೊತೆಗೆ ಮತದಾನ ಮಾಡಿ ಸಂಭ್ರಮಿಸಿದರು.

ಮರೆಯಲಾಗದ ನೆನಪು: ಯುವಕ/ಯುವತಿಯರು ಮೊದಲ ಮತದಾನ ಮಾಡುವ ಮೂಲಕ ತಮ್ಮ ಹಕ್ಕನ್ನು ಚಲಾಯಿಸಿದೆ ಎಂಬ ಹೆಮ್ಮೆಯಿಂದ ಹೇಳಿಕೊಳ್ಳುವುದರ ಜೊತೆಗೆ ಮೊದಲ ಮತದಾನದ ಸವಿನೆನಪುಗಳನ್ನು ಮೊಬೈಲ್‌ನಲ್ಲಿ ಸೆಲ್ಫೀ ಸೇರಿದಂತೆ ವಿವಿಧ ರೀತಿಯ ಫೋಟೋ ತೆಗೆದುಕೊಂಡರು. ಇದು ಮರೆಯಲಾಗದ ನೆನಪು ಎಂದರು.

ಈ ಹಿಂದೆ ತಮ್ಮ ತಂದೆ-ತಾಯಿಗಳು ಮತದಾನ ಮಾಡಲು ಹೋಗುವುದನ್ನು ನೋಡಿ ನಾನು ನನ್ನ ಹಕ್ಕು ಚಲಾಯಿಸಬೇಕು ಎಂಬ ಬಹಳ ದಿನಗಳ ಆಸೆ ಇತ್ತು. ಆದರೆ ಇಂದು ಆಸೆ ಈಡೇರಿದ್ದು ಸಂಭ್ರಮಕ್ಕೆ ಹೇಳತೀರಾಗಿದೆ ಎನ್ನುತ್ತಾರೆ ಹಾವೇರಿಯ ಅಕ್ಷತಾ ಸಣ್ಣಕ್ಕಿ.

ತುಂಬಾ ಕುತೂಹಲವಿತ್ತು: ಮತಗಟ್ಟೆ ಅಂದರೆ ಹೇಗೆ ಇರುತ್ತೆ, ಮತಗಟ್ಟೆಯ ಒಳಗೆ ಯಾವ ರೀತಿ ಕೆಲಸ ಮಾಡುತ್ತಾರೆ. ಹೇಗೆ ವೋಟ್‌ ಮಾಡುತ್ತಾರೆ ಎಂಬ ಕುತೂಹಲ ಮತ್ತು ಉತ್ಸಾಹವಿತ್ತು. ಸದ್ಯ ಆ ಕುತೂಹಲಕ್ಕೆ ಉತ್ತರ ಸಿಕ್ಕಿದೆ. ಇದೊಂದು ರಾಷ್ಟ್ರೀಯ ಹಬ್ಬದಂತೆ ಆಚರಣೆ ಮಾಡಲಾಗುತ್ತಿದ್ದು, ಅದಕ್ಕೆ ನಾವು ಮತವನ್ನು ಹಾಕುವ ಮೂಲಕ ಹಬ್ಬದಲ್ಲಿ ಸಂಭ್ರಮಿಸುತ್ತಿದ್ದೇವೆ ಎನ್ನುತ್ತಾರೆ ಚಾರವಿತಾ.

ಪ್ರಜಾಭುತ್ವ ವ್ಯವಸ್ಥೆಯಲ್ಲಿ ಚುನಾವಣೆ ಎನ್ನುವುದು ದೊಡ್ಡ ಹಬ್ಬ. ಆ ಹಬ್ಬವನ್ನು ಸಂಭ್ರಮಿಸಬೇಕಾದರೆ ಎಲ್ಲರಿಗೂ 18 ವರ್ಷ ಪೂರೈಸಬೇಕು. 18 ವರ್ಷ ಪೂರೈಸಿದ ಯುವಕ/ಯುವತಿಯರು ಪ್ರಜಾಪ್ರಭುತ್ವದಲ್ಲಿ ನಾವುಗಳ ಹಕ್ಕುದಾರರಾಗಿ ತಮ್ಮ ಹಕ್ಕನ್ನು ಚಲಾಯಿಸುವ ಮೂಲಕ ಹಬ್ಬವನ್ನು ಉತ್ಸಾಹದಿಂದ ಆಚರಿಸಿದರು.