ಹಾನಗಲ್ಲ ರಸ್ತೆ ಈಗ ಸೂಪರ್‌

ಹಾನಗಲ್ಲ: ಕೆಶಿಫ್‌ನಿಂದ ಹಾನಗಲ್ಲಪಟ್ಟಣ ವ್ಯಾಪ್ತಿಯಲ್ಲಿನಡೆದ ರಸ್ತೆ ನಿರ್ಮಾಣದ ಕಾಮಗಾರಿ ಕಳಪೆಯಾಗಿದೆ ಎಂಬ ವಿಕ ವರದಿಯ ಪರಿಣಾಮವಾಗಿ ಮರು ಡಾಂಬರೀಕಣ ಆರಂಭವಾಗಿದೆ.

ಪಟ್ಟಣದ ಸಾರಿಗೆ ಘಟಕದಿಂದ ಗಾಂಧಿ ವೃತ್ತದ ತನಕ 2 ವರ್ಷಗಳ ಹಿಂದೆ ಪೂರ್ಣಗೊಂಡ ರೀತಿಯಲ್ಲಿಗಾಂಧಿವೃತ್ತದಿಂದ ಆನಿಕೆರೆ ತನಕದ ರಸ್ತೆ ನಿರ್ಮಾಣ ವ್ಯವಸ್ಥಿತವಾಗಿ ಆಗಿಲ್ಲ. ಅಲ್ಲಲ್ಲಿಡಾಂಬರ್‌ ಕೆದರಿಕೊಂಡಿದೆ. ತಗ್ಗು ಬಿದ್ದಿವೆ ಎಂಬ ಸ್ಥಳೀಯರ ಆರೋಪಗಳನ್ನು ಒಳಗೊಂಡ ವರದಿಗೆ ಸ್ಪಂದಿಸಿದ ಕೆಶಿಫ್‌ನಿಂದ ಮತ್ತೆ ಡಾಂಬರ್‌ ಮಾಡುವ ಕಾರ್ಯವು ಸೋಮವಾರದಿಂದ ಶುರುವಾಗಿದೆ.

ಇದ್ದ ರಸ್ತೆಯನ್ನು ಕೆದರಿ ಡಾಂಬರ್‌ ಹಾಕಲಾಗಿದೆ. ಕಾಮಗಾರಿ ಕಳಪೆಯಾಗಿದೆ ಎಂಬ ಆರೋಪಗಳಿಗೆ ಪ್ರತಿಕ್ರಿಯಿಸಿದ್ದ ಕೆಶಿಫ್‌ ಎಇಇ ವಾಸುದೇವ, ಡ್ಯಾಮೇಜ್‌ ಆಗಿರುವ ಸ್ಥಳದಲ್ಲಿಮಾತ್ರ ಕಾಮಗಾರಿ ಮಾಡಿಸುವುದಾಗಿ ಹೇಳಿದ್ದರು. ವಿಕ ವರದಿ ಬಳಿಕ ಈಗ ಪಟ್ಟಣ ವ್ಯಾಪ್ತಿಯ ಪೂರ್ತಿ ರಸ್ತೆಗೆ ಮರುಡಾಂಬರೀಕರಣ ನಡೆಯುತ್ತಿದೆ.

ರಸ್ತೆ ವಿಭಜಕಕ್ಕೆ ಕಾಮಗಾರಿಗೂ ಮುನ್ನ ತೆರವು ಮಾಡಿದ್ದ ಹಳೆಯ ವಿಭಜಕದ ಸಿಮೆಂಟ್‌ ಕಲ್ಲುಗಳನ್ನು ಬಳಸಲಾಗುತ್ತಿದೆ. ಇದರಿಂದ ವಿಭಜಕ ನಿರ್ಮಾಣ ಗುಣಮಟ್ಟದಿಂದ ಕೂಡಿರಲು ಸಾಧ್ಯವಿಲ್ಲಎಂಬ ಅಂಶವನ್ನು ಪತ್ರಿಕೆ ಬೆಳಕಿಗೆ ತಂದಿತ್ತು. ಹೀಗಾಗಿ ಈಗ ನಿರ್ಮಾಣವಾಗುತ್ತಿರುವ ರಸ್ತೆ ವಿಭಜಕಕ್ಕೆ ಹೊಸ ಸಿಮೆಂಟ್‌ ಕಲ್ಲುಗಳನ್ನು ಜೋಡಿಸಲಾಗುತ್ತಿದೆ.