ಮನ ಸೆಳೆಯುತ್ತಿರುವ ಕೈಮಗ್ಗ ಬಟ್ಟೆಗಳು

ಹಾವೇರಿ :ರೇಷ್ಮೆ ಸೀರೆ, ಕಸೂತಿ ಸೀರೆ, ಇಳಕಲ್‌ ಸೀರೆಗಳು ಮಹಿಳೆಯರ ಗಮನ ಸೆಳೆಯುತ್ತಿವೆ. ಕಸೂತಿ ವಸ್ತ್ರಗಳು, ಮನೆ ಅಂದವನ್ನು ಹೆಚ್ಚಿಸುವ ಗೃಹೋಪಯೋಗಿ ವಸ್ತುಗಳತ್ತಲೂ ಆಕರ್ಷಣೆ ಹೆಚ್ಚಿದೆ. ನಗರದ ಜಿಲ್ಲಾ ಗುರುಭವನದಲ್ಲಿ ರಾಜ್ಯ ಸರಕಾರದ ಕೈಮಗ್ಗ ಮತ್ತು ಜವಳಿ ಇಲಾಖೆ ಹಾಗೂ ಕಾವೇರಿ ಹ್ಯಾಂಡ್‌ಲೂಮ್‌ ಅವರ ಸಹಯೋಗದಲ್ಲಿ ದಸರಾ ಹಾಗೂ ದೀಪಾವಳಿ ಹಬ್ಬದ ಅಂಗವಾಗಿ ಅ.12ರಿಂದ 26ರ ವರೆಗೆ ಆಯೋಜಿಸಿರುವ ವಸ್ತ್ರ ಕೌಶಲ ಕೈಮಗ್ಗ ಉತ್ಪನ್ನಗಳ ವಸ್ತು ಪ್ರದರ್ಶನ ಹಾಗೂ ಮಾರಾಟ ಮೇಳ ಗ್ರಾಹಕರನ್ನು ಕೈ ಬೀಸಿ ಕರೆಯುತ್ತಿದೆ.

ರೇಷ್ಮೆ ಸೀರೆ, ಟಾವೆಲ್‌, ಲುಂಗಿ, ಬೆಡ್‌ಶೀಟ್ಸ್‌, ಕರವಸ್ತ್ರ, ಪೂಜಾ ವಸ್ತ್ರ, ಪಿಲ್ಲೊ ಕವರ್ಸ್‌, ನ್ಯಾಪಕಿನ್ಸ್‌ , ಕಂಬಳಿ ಹಾಗೂ ಉಣ್ಣೆ ಉತ್ಪನ್ನಗಳು ಮೊಳಕಾಲ್ಮೂರು ಅಪ್ಪಟ ರೇಷ್ಮೆ ಸೀರೆಗಳು, ಕೈ ಕಸೂತಿ ಸೀರೆಗಳು, ರವಿಕೆ ದೇಸೀ ಲುಕ್‌ ನೀಡಿದ್ರೆ, ಗೌನ್‌ ಹಾಗೂ ಸ್ಕರ್ಟ್‌ಗಳು ವಿದೇಶಿ ಲುಕ್‌ನೊಂದಿಗೆ ಆಧುನಿಕವಾಗಿ ಕಾಣಿಸುತ್ತಿವೆ. ಕಾಟನ್‌ ಬಟ್ಟೆಗಳು ಎಲ್ಲರ ಗಮನ ಸೆಳೆಯುತ್ತಿವೆ. ಕೈ ಮಗ್ಗದ ಬಟ್ಟೆಗಳ ಖರೀದಿಯೂ ಜೋರಾಗಿದೆ.

40 ಮಳಿಗೆ:

ರಾಜ್ಯದ ವಿವಿಧ ಜಿಲ್ಲೆಗಳಿಂದ ಬಂದಿರುವ 40 ಕೈಮಗ್ಗ ಸಹಕಾರಿ ಸಂಘಗಳು ಮೇಳದಲ್ಲಿ ಪಾಲ್ಗೊಂಡಿವೆ. ಹಬ್ಬದ ಪ್ರಯುಕ್ತ ಶೇ.20ರಷ್ಟು ರಿಯಾಯಿತಿ ದರದಲ್ಲಿ ಮಾರಾಟ ಮಾಡಲಾಗುತ್ತಿದೆ. ಬಾಗಲಕೋಟೆ, ಗದಗ, ಧಾರವಾಡ, ಹಾವೇರಿ, ಗುಲ್ಬರ್ಗ, ತುಮಕೂರು, ಶಿವಮೊಗ್ಗ, ದಾವಣಗೆರೆ, ಚಿತ್ರದುರ್ಗ, ಬಳ್ಳಾರಿ ಹಾಗೂ ಹೊರ ರಾಜ್ಯಗಳ ಕೈಮಗ್ಗ ಸಂಘಗಳು ಇದರಲ್ಲಿ ಪಾಲ್ಗೊಂಡಿವೆ.