ನವ ವಧುವಿನಂತೆ ಶೃಂಗಾರಗೊಂಡ ಹಂಸಭಾವಿ

ಹಂಸಭಾವಿ : ಗ್ರಾಮದಲ್ಲಿ ಫೆ.12 ರಿಂದ ನಡೆಯುವ ಶ್ರೀ ದ್ಯಾಮವ್ವದೇವಿ ಹಾಗೂ ಶ್ರೀ ದುರ್ಗಮ್ಮ ದೇವಿಯರ ಜಾತ್ರಾ ಮಹೋತ್ಸವ ಅಂಗವಾಗಿ ಗ್ರಾಮವು ನವ ವಧುವಿನಂತೆ ಶೃಂಗಾರಗೊಂಡಿದೆ. ಜಾತ್ರಾ ಮಹೋತ್ಸವ ಅಂಗವಾಗಿ ದೇವಸ್ಥಾನಗಳು ಸುಣ್ಣ-ಬಣ್ಣದಿಂದ ಕಂಗೊಳಿಸುತ್ತಿದ್ದು ದೀಪಾಲಂಕಾರಗೊಂಡು ಕಣ್ಮನ ಸೆಳೆಯುತ್ತವೆ.

ಬಸ್‌ ನಿಲ್ದಾಣದ ಬಳಿ ದುರ್ಗಾದೇವಿ ದೇವಸ್ಥಾನಕ್ಕೆ ಹೋಗುವಲ್ಲಿ ದುರ್ಗಾದೇವಿ ದ್ವಾರಬಾಗಿಲು ಮತ್ತು ಗ್ರಾಮದ ಬೆಂಗಳೂರ ವೃತ್ತದ ಬಳಿ ಪುರ ಪ್ರವೇಶ ಮಹಾದ್ವಾರ ಬ್ಯಾನರುಗಳು, ಬಂಟಿಂಗ್ಸ್‌ ಫ್ಲೆಕ್ಷ್‌ಗಳು ಗ್ರಾಮದ ತುಂಬೆಲ್ಲ ರಾರಾಜಿಸುತ್ತಿವೆ. ಗ್ರಾಮದ ಪ್ರತಿಯೊಂದು ಕೇರಿಗಳಲ್ಲಿ ದೀಪಾಲಂಕಾರ ಮಾಡಿದ್ದಲ್ಲದೇ, ಗ್ರಾಮದ ಎಲ್ಲ ದೇವಸ್ಥಾನಗಳು ದೀಪಾಲಂಕಾರದಿಂದ ಕಂಗೊಳಿಸುತ್ತವೆ.

ಗ್ರಾಮದ ಎಲ್ಲ ಬೀದಿಗಳಲ್ಲಿ ಬಾವುಟಗಳನ್ನು ಕಟ್ಟಿ ಗ್ರಾಮದ ಸೊಬಗನ್ನು ಹೆಚ್ಚಿಸಿದ್ದಾರೆ. ಜಾತ್ರಾ ಮಹೋತ್ಸವದಲ್ಲಿ ತಮ್ಮನ್ನ ತಾವು ತೊಡಗಿಸಿಕೊಂಡು ಹಗಲಿರುಳು ಶ್ರಮವಹಿಸಿ ಗ್ರಾಮವನ್ನು ಶೃಂಗಾರಗೊಳಿಸಿದ್ದಾರೆ.

ಫೆ.12 ರಾತ್ರಿ ನಡೆಯುವ ಮೆರವಣಿಗೆಯಲ್ಲಿ ರಾಜ್ಯದ ವಿವಿಧ ಕಲಾ ತಂಡಗಳು ಭಾಗವಹಿಸಿ ಜಾತ್ರೆಯ ಮೆರವಣಿಗೆಗೆ ಮೆರಗು ನೀಡಲಿವೆ. ಪ್ರತಿದಿನ ರಾತ್ರಿ ನಡೆಯುವ ಕಾರ್ಯಕ್ರಮಗಳಿಗೆ ಭವ್ಯವಾದ ದುರ್ಗಾದೇವಿ ವೇದಿಕೆ ನಿರ್ಮಿಸಲಾಗಿದೆ.