ಹಾವೇರಿ-ಕೆರೆ ಜಲಪೂರಣ ಅಪೂರ್ಣ

ಕುಮಾರಪಟ್ಟಣ: ಅಂತರ್ಜಲ ವೃದ್ಧಿ ಹಾಗೂ ಸಮರ್ಪಕ ನೀರಾವರಿಗೆ ಅನುಕೂಲ ಕಲ್ಪಿಸುವ ನಿಟ್ಟಿನಲ್ಲಿಎರಡು ವರ್ಷಗಳ ಹಿಂದೆ ಕೈಗೊಂಡ 32 ಕೋಟಿ ರೂ. ಯೋಜನೆಗೆ ಅಪೂರ್ಣಗೊಂಡಿದ್ದು, ಸಾರ್ವಜನಿಕರ ಬೇಸರಕ್ಕೆ ಕಾರಣವಾಗಿದೆ.

ಕರೂರ ಗ್ರಾಮದ ಗುಡ್ಡದಕೆರೆ, ಚಳಗೇರಿ ಮತ್ತು ಕಮದೋಡಾ ಕೆರೆಗಳಿಗೆ ನೀರು ತುಂಬಿಸುವ ಮಹತ್ವದ ಯೋಜನೆಗೆ ಎರಡು ವರ್ಷದ ಹಿಂದೆ ಈ ಯೋಜನೆಗೆ ಚಳಗೇರಿ ಗ್ರಾಮದಲ್ಲಿವಿಧಾನಸಭಾ ಮಾಜಿ ಅಧ್ಯಕ್ಷ ಕೆ.ಬಿ.ಕೋಳಿವಾಡ ನೇತೃತ್ವದಲ್ಲಿಚಾಲನೆ ದೊರೆತಿತ್ತು. ಆದರೆ, ಈವರೆಗೂ ಯೋಜನೆ ಕುಂಟುತ್ತ ಸಾಗಿದೆ.

ರಾಣೇಬೆನ್ನೂರು ತಾಲೂಕಿನ ಮದೇನೂರು ಗ್ರಾಮದ ತುಂಗಭದ್ರಾ ನದಿಯಿಂದ ಹಾಗೂ ತುಂಗಾ ಮೇಲ್ದಂಡೆ ಕಾಲುವೆಯಿಂದ ನೀರು ಹರಿಸಲು ಕ್ರಿಯಾ ಯೋಜನೆ ರೂಪಿಸಲಾಗಿತ್ತು. ಆದರೆ, ಸುಮಾರು 85 ಎಕರೆ ವಿಸ್ತೀರ್ಣದ ಕರೂರು ಗ್ರಾಮದ ಗುಡ್ಡದಕೆರೆ, ಚಳಗೇರಿ ಮತ್ತು ಕಮದೋಡ ಕೆರೆಗಳಿಗೆ ನೀರು ತುಂಬಿಸಿಲ್ಲ. ಅಗತ್ಯಕ್ಕೆ ತಕ್ಕಂತೆ ಹಣ ಮಂಜೂರಾದರೂ ಕಾಮಗಾರಿ ನಡೆಸಿಲ್ಲಎಂಬುದು ರೈತರ ಆರೋಪವಾಗಿದೆ.

ಈ ಮೂರು ಗ್ರಾಮಗಳಿಂದ ನದಿ ಸಾಕಷ್ಟು ದೂರದಲ್ಲಿದ್ದು, ಕೃಷಿ ನೀರಾವರಿಗೆ ಸಮಸ್ಯೆಯಾಗಿದೆ. ಅನಿವಾರ್ಯವಾಗಿ ರೈತರು ಬೋರ್‌ವೆಲ್‌ ಕೊರೆಸಿದ್ದಾರೆ. ಆದರೆ ಅಂತರ್ಜಲ ಮಟ್ಟ ದಿನೇದಿನೇ ಕುಸಿಯುತ್ತಿದೆ. ಈ ಸಂದರ್ಭದಲ್ಲಿಕೆರೆಗಳಿಗೆ ನೀರು ತುಂಬಿಸಿದರೆ ಅಂತರ್ಜಲ ಮಟ್ಟ ವೃದ್ಧಿಯ ಜೊತೆಗೆ ಜನ ಜಾನುವಾರುಗಳಿಗೆ ಕುಡಿಯುವ ನೀರು ದೊರೆಯಲಿದೆ. ಆದ್ದರಿಂದ ಶೀಘ್ರವೇ ಯೋಜನೆ ಪೂರ್ಣಗೊಳಿಸಬೇಕೆಂಬುದು ಇಲ್ಲಿನ ರೈತರ ಒತ್ತಾಯವಾಗಿದೆ.