ಹಾವೇರಿ: ಪರೀಕ್ಷಾ ನಕಲು ತಪ್ಪಿಸಲು ವಿದ್ಯಾರ್ಥಿಗಳ ತಲೆಗೆ ಡಬ್ಬಿ ಹಾಕಿದ ಕಾಲೇಜು!

ಹಾವೇರಿ: ಜಿಲ್ಲೆಯ ಭಗತ್ ಪದವಿ ಪೂರ್ವ ಮಹಾವಿದ್ಯಾಲಯದಲ್ಲಿ ವಿದ್ಯಾರ್ಥಿಗಳು ಪರೀಕ್ಷೆಯಲ್ಲಿ ನಕಲು ಮಾಡಬಾರದೆಂದು ವಿದ್ಯಾರ್ಥಿಗಳ ಮುಖಕ್ಕೆ ರಟ್ಟು ಬಾಕ್ಸ್‌(ಡಬ್ಬಿ)ಹಾಕಿಸಿ ಪರೀಕ್ಷೆ ಬರೆಸಿದ ಘಟನೆ ನಡೆದಿದ್ದು, ಈ ಸಂಬಂಧ ಫೋಟೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ.

ಗುರುವಾರ ಪ್ರಥಮ ಪಿಯು ವಿದ್ಯಾರ್ಥಿಗಳಿಗೆ, ಕಾಲೇಜಿನಲ್ಲಿ ವಿಜ್ಞಾನ, ರಸಾಯನಶಾಸ್ತ್ರ, ಅರ್ಥಶಾಸ್ತ್ರ, ವಾಣಿಜ್ಯಶಾಸ್ತ್ರ, ಪರೀಕ್ಷೆಗಳು ಇತ್ತು. ಈ ವೇಳೆ ನಕಲು ಮಾಡಬಾರದೆಂದು ಮುಖಕ್ಕೆ ಬಾಕ್ಸ್‌ ಹಾಕಿಸಿ ಉಪನ್ಯಾಸಕರು ಪರೀಕ್ಷೆ ಬರೆಸಿದ್ದಾರೆ. ವಿಚಾರ ತಿಳಿದ ಪದವಿಪೂರ್ವ ಶಿಕ್ಷಣ ಇಲಾಖೆ ಕಾಲೇಜಿನ ಆಡಳಿತ ಮಂಡಳಿ ಮತ್ತು ಉಪನ್ಯಾಸಕರ ವಿರುದ್ಧ ನೋಟೀಸ್ ಜಾರಿ ಮಾಡಿದೆ.

ಪಿಯು ಮಂಡಳಿಯ ಉಪನಿರ್ದೇಶಕರಾದ ಎಸ್.ಸಿ.ಪೀರ್ಜಾಡೆ ಈ ಬಗ್ಗೆ ಮಾತನಾಡಿ, ಈ ವಿಚಾರ ತಿಳಿದ ತಕ್ಷಣ ನಾನು ಕಾಲೇಜಿಗೆ ಹೋಗಿ ವ್ಯವಸ್ಥಾಪಕರ ಬಳಿ ಈ ರೀತಿಯ ವರ್ತನೆಯನ್ನು ನಿಲ್ಲಿಸಿ ಎಂದು ಆದೇಶಿಸಿದೆ. ಪರೀಕ್ಷೆಯ ವೇಳೆ ಮಕ್ಕಳನ್ನು ಈ ರೀತಿ ನಡೆಸಿಕೊಂಡಿರುವುದು ಒಂದು ಅವಮಾನೀಯ ಘಟನೆ ಈ ಬಗ್ಗೆ ಕಾಲೇಜು ಆಡಳಿತ ಮಂಡಳಿಗೆ ನೋಟಿಸ್ ನೀಡಲಾಗಿದ್ದುಮ ಶಿಸ್ತುಕ್ರಮ ಕೈಗೊಳ್ಳಲಾಗುವುದು. ಜೊತೆಗೆ ಇಂತಹ ಘಟನೆ ಮರುಕಳಿಸಿದರೆ ಇಲಾಖೆಗೆ ಕೂಡಲೆ ತಿಳಿಸಿ ಎಂದು ವಿದ್ಯಾರ್ಥಿಗಳಿಗೆ ಹೇಳಿದ್ದೇನೆ ಎಂದರು.

ಆದರೆ ಇದನ್ನು ಸಮರ್ಥಿಸಿಕೊಂಡಿರುವ ಕಾಲೇಜಿನ ನಿರ್ದೇಶಕರಾದ ಎಂಬಿ ಸತೀಶ್, ನಾವು ಈ ಯೋಜನೆಯನ್ನು ತಂದಿರುವುದು, ಪರೀಕ್ಷೆಯಲ್ಲಿ ನಕಲು ಮಾಡುವುದನ್ನು ತಪ್ಪಿಸಲು. ಇದೊಂದು ಪ್ರಯೋಗವಷ್ಟೇ. ವಿದ್ಯಾರ್ಥಿಗಳೊಂದಿಗೆ ಚರ್ಚಿಸಿ, ಅವರ ಒಪ್ಪಿಗೆ ಪಡೆದು ಈ ಬಗ್ಗೆ ನಿರ್ಧಾರ ತೆಗೆದುಕೊಂಡೆವು. ಪದವಿ ಶಿಕ್ಷಣ ಇಲಾಖೆ ವಿಧಿಸಿರುವ ಎಲ್ಲಾ ನಿಯಮಗಳನ್ನು ನಾವು ಕಟ್ಟುನಿಟ್ಟಾಗಿ ಪಾಲಿಸುತ್ತೇವೆ ಎಂದಿದ್ದಾರೆ.