ಮದಗದ ಕೆರೆ, ಎಲಿವಾಳ ಸೇತುವೆ ಪರಿಶೀಲನೆ

ರಟ್ಟೀಹಳ್ಳಿ: ತುಂಬಿ ತುಳುಕುತ್ತಿರುವ ತಾಲೂಕಿನ ಮದಗ ಮಾಸೂರು ಕೆರೆಗೆ ಹಾಗೂ ಮುಳುಗಡೆಯಾದ ತಾಲೂಕಿನ ಎಲಿವಾಳ ಸೇತುವೆ ಸ್ಥಳಕ್ಕೆ ಮಾಜಿ ಶಾಸಕ ಯು.ಬಿ.ಬಣಕಾರ ಗುರುವಾರ ಭೇಟಿ ನೀಡಿ ಪರಿಶೀಲಿಸಿದರು.

ಮದಗ ಮಾಸೂರು ಕೆರೆ ಆವರಣದಲ್ಲಿ ಮಾಜಿ ಶಾಸಕ ಯು.ಬಿ.ಬಣಕಾರ ಮಾತನಾಡಿ, ಬುಧವಾರ ಮದಗದ ಕೆರೆ ತುಂಬಿದ್ದು ಕೆರೆ ಕೋಡಿ ಮೂಲಕ ಕುಮದ್ವತಿ ನದಿಗೆ ನೀರು ಬಂದಿದೆ. ಮಳೆ ವಿಳಂಬವಾದರೂ ಕೆರೆ, ನದಿ ತುಂಬಿ ಹರಿಯುತ್ತಿವೆ. ತಾಲೂಕಿನ ಹಳ್ಳಿಗಳ ರೈತರು ಮುಂದೆ ಉತ್ತಮ ಬೆಳೆ ಬೆಳೆಯುವುದಕ್ಕೆ ಅನುಕೂಲವಾಗಲಿದೆ ಎಂದರು.

ಈಗಾಗಲೇ ಮದಗ ಮಾಸೂರು ಕೆರೆಯ ಅಭಿಯಂತರ ಜತೆಗೆ ಮಾತನಾಡಿ ಎಡದಂಡ ಮತ್ತು ಬಲದಂಡೆ ಕಾಲುವೆಗಳನ್ನು ಸಂಪೂರ್ಣ ಸಿದ್ಧತೆ ಮಾಡಿಕೊಂಡು ಮುಂದೆ ನೀರು ಬಿಡುವುದಕ್ಕೆ ವ್ಯವಸ್ಥೆ ಮಾಡಿಕೊಳ್ಳುವಂತೆ ಸೂಚನೆ ನೀಡಿದ್ದೇನೆ. ಎಡದಂಡೆ, ಬಲದಂಡೆ ಕಾಲುವೆಯಲ್ಲಿ ಜಂಗಲ್‌ ಕಟಾವ್‌ ಮಾಡುವುದಕ್ಕೆ ಹಾಗೂ ಕಾಲುವೆಯಲ್ಲಿನ ಹೂಳು ತೆಗೆಯುವುದಕ್ಕೆ ಆ ಪ್ರಸ್ತಾವನೆ ಸಿದ್ಧ ಮಾಡುವುದಕ್ಕೆ ಎಂಜನೀಯರ್‌ಗೂ ಸೂಚನೆ ನೀಡಲಾಗಿದೆ. ಅಧಿಕಾರಿಗಳು ಮಂಗಳವಾರ ಅಥವಾ ಬುಧವಾರ ವರದಿ ನೀಡುವುದಾಗಿ ಹೇಳಿದ್ದಾರೆ. ವರದಿ ಬಂದ ಬಳಿಕ ಎಡದಂಡೆ, ಬಲದಂಡೆ ಕಾಲುವೆಯನ್ನು ದುರಸ್ಥಿಪಡೆಸುವುದಕ್ಕೆ ಮುಖ್ಯಮಂತ್ರಿ ಗಮನಕ್ಕೆ ತಂದು ಸಂಪೂರ್ಣ ಅಭಿವೃದ್ಧಿಪಡೆಸುವುದಕ್ಕೆ ಮುಂದಾಗಲಾಗುತ್ತದೆ ಎಂದರು.

ಸಾಹಿತಿ, ಮುಖಂಡ ನಿಂಗಪ್ಪ ಚಳಗೇರಿ, ಮುಖಂಡರಾದ ಮಲ್ಲಿಕಾರ್ಜುನ ಬುರಡಿಕಟ್ಟಿ, ಪ್ರಕಾಶ ದೇವಾಂಗದ, ಸುರೇಶ ಲಮಾಣಿ ಹಲವರು ಇದ್ದರು.