ಶಾಂತಳಾದ ಕುಮದ್ವತಿ, ನಿಟ್ಟುಸಿರು ಬಿಟ್ಟ ಜನ

ರಟ್ಟೀಹಳ್ಳಿ: ಕಳೆದ 4-5 ದಿನದಿಂದ ಗ್ರಾಮಗಳು, ಬೆಳೆ, ಸೇತುವೆಗಳನ್ನು ಆವರಿಸಿದ್ದ ಕುಮದ್ವತಿ ನದಿ ಸೋಮವಾರ ಶಾಂತಳಾಗಿದ್ದು, ನೆರೆ ಪ್ರಮಾಣ ಇಳಿಮುಖವಾಗಿದೆ.

ಭಾನುವಾರ ರಾತ್ರಿ 9-30 ರ ಬಳಿಕ ನದಿ ನೀರು ನಿಧಾನವಾಗಿ ಇಳಿಕೆಯಾಗಿದ್ದು, ಸೋಮವಾರ ಮಧ್ಯಾಹ್ನದ ವೇಳೆಗೆ ಮುಳುಗಿದ ಸೇತುವೆಗಳು ಮುಕ್ತವಾಗಿವೆ. ಇವುಗಳ ಮೇಲೆ ಸಂಚಾರ ಪುನಾರಂಭಗೊಂಡಿತು. ಬಡಸಂಗಾಪುರ-ಕುಡುಪಲಿ ಬಾಂದರ್‌ ಹೊರತುಪಡಿಸಿ ಕುಮದ್ವತಿ ನದಿ ಪಾತ್ರದಲ್ಲಿನ ಎಲ್ಲ ಸೇತುವೆಗಳ ಮೇಲೆ ಸಂಚಾರ ಆರಂಭವಾಗಿದೆ.

ನದಿ ನೀರಿನ ರಭಸಕ್ಕೆ ಎಲಿವಾಳ ಸೇತುವೆ ತಡೆಗೋಡೆಯ ಕಬ್ಬಿಣದ ಸರಳುಗಳು ಕಿತ್ತುಕೊಂಡು ಹೋಗಿವೆ. ಕುಡುಪಲಿ ಸೇತುವೆ ಮುಂಭಾಗದಲ್ಲಿ ಹಾಗೂ ಸೇತುವೆ ಪಕ್ಕದಲ್ಲಿ ರಸ್ತೆ ಕಿತ್ತುಕೊಂಡು ಹೋಗಿವೆ. ಜನರು ಮತ್ತು ವಿವಿಧ ವಾಹನಗಳು ಸಂಚರಿಸುತ್ತಿದ್ದರೂ ಬಸ್‌ ಸಂಚಾರ ಆರಂಭಿಸಿಲ್ಲ.

ನಿಟ್ಟುಸಿರು ಬಿಟ್ಟ ಗ್ರಾಮಸ್ಥರು: ಒಂದು ವಾರದಿಂದ ಆತಂಕದಲ್ಲಿ ಕಳೆದ ಅನೇಕ ಹಳ್ಳಿಗಳ ಜನ ನದಿ ನೀರು ಇಳಿಮುಖವಾಗುತ್ತಿದ್ದಂತೆ ನಿಟ್ಟುಸಿರುಬಿಟ್ಟರು. ಜನ ಜೀವನ ಸಹಜಸ್ಥಿತಿಗೆ ಬರುತ್ತಿದೆ. ಆದರೆ, ಮನೆಗಳ ಕುಸಿತ, ಬೆಳೆ ಹಾನಿ, ಅಪಾರ ವಸ್ತುಗಳನ್ನು ಕಳೆದುಕೊಂಡು ಸಂಕಷ್ಟಕ್ಕೀಡಾಗಿದ್ದಾರೆ. ಜೀವನವನ್ನು ಮರು ನಿರ್ಮಾಣ ಮಾಡಿಕೊಳ್ಳುವುದು ಕಷ್ಟವಾಗಿದೆ.