ಹಗಲಲ್ಲೂ ಉರಿವ ಬೀದಿ ದೀಪ

ಮಂಜುನಾಥ ಹಳ್ಳದ ಹಾವೇರಿ: ನಿರ್ವಹಣೆ ಕೊರತೆಯಿಂದ ನಗರದ ಪ್ರಮುಖ ರಸ್ತೆಗಳಲ್ಲಿ ಹಗಲು ಹೊತ್ತಿನಲ್ಲಿಯೇ ಬೀದಿ ದೀಪಗಳು ಉರಿಯುತ್ತಿವೆ.

ವಿದ್ಯುತ್‌ ಪೋಲು ತಡೆಗೆ ಸರಕಾರ ಹಲವು ಕಾರ್ಯಕ್ರಮಗಳನ್ನು ಆಯೋಜಿಸುತ್ತಿದ್ದರೂ ಹಾವೇರಿ ನಗರದಲ್ಲಿ ನಿರ್ವಹಣೆಯಿಲ್ಲದೇ ಹಗಲಿನಲ್ಲಿಯೂ ದೀಪಗಳು ಉರಿದು ವಿದ್ಯುತ್‌ ಪೋಲಾಗುತ್ತಿವೆ.

ಅಧಿಕಾರಿಗಳ ನಿರ್ಲಕ್ಷ್ಯ: ಸಂಜೆ ಆಗುತ್ತಲೇ ಬೀದಿ ದೀಪಗಳು ಬೆಳಗುವಂತೆ ನೋಡಿಕೊಳ್ಳುವುದು ನಿಯಮ. ಆದರೆ, ಹಾವೇರಿಯಲ್ಲಿ ಹಗಲಲ್ಲಿ ಬೆಳಗುತ್ತವೆ. ನಗರಸಭೆ ಮತ್ತು ಹೆಸ್ಕಾಂ ಅಧಿಕಾರಿಗಳು, ಜನಪ್ರತಿನಿಧಿಗಳು ಗಮನಿಸದಿರುವುದು ವಿಪರ್ಯಾಸದ ಸಂಗತಿ ಎಂಬುದು ಸಾರ್ವಜನಿಕರ ಅಭಿಪ್ರಾಯ.

ನಿರಂತರ ಉರಿಯುವ ದೀಪಗಳು: ಕಳೆದೊಂದು ವಾರದಿಂದ ನಿರಂತರವಾಗಿ ಹಗಲಲ್ಲಿ ಬೀದಿ ದೀಪಗಳು ಉರಿಯುತ್ತಿವೆ. ಇವುಗಳನ್ನು ನೋಡಿ ಅನೇಕ ಸಲ ಪ್ರಜ್ಞಾವಂತ ನಾಗರಿಕರು ಅಧಿಕಾರಿಗಳಿಗೆ ತಿಳಿಸಿದ್ದಾರೆ. ಸಾರ್ವಜನಿಕರು ಹೇಳಿದ ನಂತರ ಕೆಲವು ಕಂಬಗಳಲ್ಲಿರುವ ವಿದ್ಯುತ್‌ ದೀಪ ಕಟ್‌ ಮಾಡಿದ್ದಾರೆ ವಿನಃ ಸರಿಯಾದ ವ್ಯವಸ್ಥೆ ಮಾಡಿಲ್ಲ ಎನ್ನುತ್ತಾರೆ ಸ್ಥಳೀಯ ನಾಗರೀಕರು.

ಹಾವೇರಿಯ ಬಸವೇಶ್ವರ ನಗರ ಬಿ ಬ್ಲಾಕ್‌, ಮತ್ತು ಸಿ ಬ್ಲಾಕ್‌, ಪಿ.ಬಿ. ರಸ್ತೆ, ಎಂ.ಜಿ. ರಸ್ತೆ, ನಾಗೇಂದ್ರನಮಟ್ಟಿ, ಹುಕ್ಕೇರಿಮಠದ ರಸ್ತೆ, ಜಿಲ್ಲಾ ಆಸ್ಪತ್ರೆಯ ಹಿಂಭಾಗದ ನಗರ, ಸೇರಿದಂತೆ ನಾನಾ ವಾರ್ಡ್‌ಗಳಲ್ಲಿ ಮತ್ತು ಓಣಿಗಳಲ್ಲಿ ಹಗಲು ರಾತ್ರಿ ಎನ್ನದೆ 24/7 ಮಾದರಿಯಲ್ಲಿ ಬೀದಿ ದೀಪಗಳು ಉರಿಯುತ್ತಿವೆ.

ಸ್ವೀಚ್‌ ಬೋರ್ಡ್‌ಗಳೆ ಇಲ್ಲ: ನಗರದಲ್ಲಿ ಬಹಳಷ್ಟು ಕಡೆಗಳಲ್ಲಿ ಬೀದಿ ದೀಪಗಳನ್ನು ಬಂದ್‌ ಮಾಡಲು ಸ್ವಿಚ್‌ ಬೋರ್ಡ್‌ಗಳೆ ಇಲ್ಲ. ಇನ್ನೂ ಕೆಲವು ಕಡೆ ಸ್ವಿಚ್‌ ಬೋರ್ಡ್‌ಗಳು ಮಳೆ ಗಾಳಿಗೆ ಹಾಳಾಗಿದ್ದು, ಅಲ್ಲಲ್ಲಿ ಕಿತ್ತು ಹೋಗಿವೆ. ಕಿತ್ತು ಹೋಗಿರುವ ಸ್ವಿಚ್‌ ಬೋರ್ಡ್‌ಗಳಿಂದ ವಿದ್ಯುತ್‌ ತಂತಿ ನೇತಾಡುತ್ತಿದ್ದು ಅಪಾಯಕ್ಕೆ ಆಹ್ವಾನ ನೀಡುತ್ತಿವೆ.

ಇನ್ನಾದರೂ ಬೀದಿ ದೀಪಗಳ ನಿಯಂತ್ರಣಕ್ಕೆ ಕ್ರಮ ಕೈಗೊಂಡು ವಿದ್ಯುತ್‌ ಉಳಿತಾಯಕ್ಕೆ ಮುಂದಾಗಬೇಕು ಎಂದು ಒತ್ತಾಸುತ್ತಾರೆ ಪ್ರಜ್ಞಾವಂತ ನಾಗರೀಕರು.