ಡಾಲರ್‌ ಎಕ್ಸೆಂಜ್‌ ನೆಪದಲ್ಲಿ ಹಣ ಕಳವು

ಹಾವೇರಿ: ಡಾಲರ್‌ ಎಕ್ಸೇಂಜ್‌ ಮಾಹಿತಿ ನೆಪದಲ್ಲಿ ವೆಹಿಕಲ್‌ ಶೋ ರೂಂಗೆ ಬಂದ ಆಗುಂತಕರ ತಂಡವೊಂದು ಕೇವಲ ಮೂರೇ ನಿಮಿಷದಲ್ಲಿ 16 ಸಾವಿರ ರೂ. ಕಳ್ಳತನ ಮಾಡಿ ಪರಾರಿಯಾಗಿರುವ ಪ್ರಕರಣ ನಗರದಲ್ಲಿ ಶನಿವಾರ ಬೆಳಕಿಗೆ ಬಂದಿದೆ.

ನಗರದ ಹೊರ ವಲಯದಲ್ಲಿರುವ ಪ್ರತಿಷ್ಠಿತ ಶೋರೂಂನಲ್ಲಿ ಶುಕ್ರವಾರ ಸಂಜೆ ಈ ಘಟನೆ ನಡೆದಿದ್ದು, ಸಿಸಿ ಕ್ಯಾಮೆರಾ ಮೂಲಕ ಸಿನಿಮೀಯ ರೂಪದ ಕಳ್ಳರ ಕೈಚಳಕ ಶನಿವಾರ ಬಯಲಾಗಿದೆ. ಈ ಕುರಿತು ಶೋ ರೂಂ ಮಾಲೀಕರು ಶಹರ ಠಾಣೆಯಲ್ಲಿ ಪ್ರಕರಣ ದಾಖಲಿಸುವುದಾಗಿ ತಿಳಿಸಿದ್ದಾರೆ.

ಒಬ್ಬ ಮಹಿಳೆ, ಯುವಕ ಮತ್ತು ಮಧ್ಯವಯಸ್ಕ ಸೇರಿ ಮೂವರು ಈ ತಂಡದಲ್ಲಿದ್ದು, ಇವರ ಕಾರ್ಯಾಚರಣೆ ಯಾರಿಗೂ ಸಂಶಯಕ್ಕೆ ಆಸ್ಪದ ನೀಡಿಲ್ಲ. ಕೇವಲ ಮೂರ್ನಾಲ್ಕು ನಿಮಿಷದಲ್ಲಿ ಮಾಲೀಕರ ವಿಶ್ವಾಸ ಗಳಿಸಿ ಕ್ಯಾಶಿಯರ್‌ ಕ್ಯಾಬಿನ್‌ಗೆ ಹೋಗಿ ಕರೆನ್ಸಿ ನೋಡುವ ನೆಪದಲ್ಲಿ ತಮ್ಮ ಕೈಚಳಕ ತೋರಿಸಿ 500 ರೂ.ಮಾಲ್ಯದ ನೋಟುಗಳ 16 ಸಾವಿರ ರೂ.ಗಳನ್ನು ಕಳ್ಳತನ ಮಾಡಿದ್ದಾರೆ.