ಕೆಲಸಕ್ಕೆ ಬಾರದ ಅಧಿಕಾರಿ, ಸಿಬ್ಬಂದಿ

ಬ್ಯಾಡಗಿ: ಮಳೆ ಪ್ರವಾಹ ಹಿನ್ನೆಲೆಯಲ್ಲಿ ಪರಿಹಾರ ಕಾರ‍್ಯಗಳನ್ನು ಕೈಗೊಳ್ಳವ ಎಲ್ಲ ಇಲಾಖೆ ಅಧಿಕಾರಿಗಳಿಗೆ ಶನಿವಾರ ಹಾಗೂ ಭಾನುವಾರವೂ ಕೆಲಸಕ್ಕೆ ಹಾಜರಾಗುವಂತೆ ನೀಡಿದ್ದ ಜಿಲ್ಲಾಧಿಕಾರಿ ನೀಡಿದ್ದ ಆದೇಶಕ್ಕೆ ಕ್ಯಾರೆ ಅನ್ನದ ಪಟ್ಟಣದ ವಿವಿಧ ಇಲಾಖೆ ಅಧಿಕಾರಿಗಳು ಕೆಲಸಕ್ಕೆ ಗೈರುಹಾಜರಾಗಿದ್ದರು.

ಎಲ್ಲಾ ಸರಕಾರಿ ಕಛೇರಿಗಳಲ್ಲಿ ಶನಿವಾರ ಹಾಗೂ ಭಾನುವಾರವು ಅಧಿಕಾರಿಗಳು ಹಾಜರಿರುವಂತೆ ಜಿಲ್ಲಾಧಿಕಾರಿಗಳು ಸ್ಪಷ್ಟ ಆದೇಶ ನೀಡಿದ್ದರು. ಆದರೆ ಪಟ್ಟಣದಲ್ಲಿ ಕೆಲ ಇಲಾಖೆ ಅಧಿಕಾರಿಗಳು ಕೆಲಸಕ್ಕೆ ಹಾಜರಾಗಿರಲಿಲ್ಲ.

ಶೇ.50 ರಷ್ಟು ಮಾತ್ರ ಅಧಿಕಾರಿಗಳು: ನೆರೆ ಪರಿಹಾರ ಕಾರ‍್ಯಕ್ಕೆ ಪ್ರಾಮುಖ್ಯತೆ ನೀಡಬೇಕಾದ ತಾಲೂಕಾಡಳಿತ ಕಛೇರಿಯಲ್ಲಿಯೇ ಅರ್ಧದಷ್ಟು ಸಿಬ್ಬಂದಿ ಬಂದಿರಲಿಲ್ಲ. ಕೆಲ ಹೊರಗುತ್ತಿಗೆ ಹಾಗೂ ಸರಕಾರಿ ಸಿಬ್ಬಂದಿ ಹೊರತು ಪಡಿಸಿದರೇ ಮಹಿಳಾ ಸಿಬ್ಬಂದಿಯ ಸುಳಿವೇ ಕಚೇರಿಯಲ್ಲಿರಲಿಲ್ಲ.

ಮುಚ್ಚಿದ ಬಾಗಿಲು ತೆಗೆದಿಲ್ಲ: ಪಟ್ಟಣದಲ್ಲಿನ ಕೆಲ ಇಲಾಖೆಗಳು ಹೆಸರಿಗೆ ಮಾತ್ರ ಬಾಗಿಲು ತೆಗೆದಿದ್ದವು. ಆದರೆ ಒಳಗೆ ಡಿ.ದರ್ಜೆ ನೌಕರರು ಇಲ್ಲವೇ ಹೊರಗುತ್ತಿಗೆ ಆಧಾರದಲ್ಲಿ ಕಾರ‍್ಯ ನಿರ್ವಹಿಸುತ್ತಿರುವ ಕೆಲ ಸಿಬ್ಬಂದಿಗಳನ್ನು ಹೊರತುಪಡಿಸಿ ಇನ್ಯಾವುದೇ ಸರಕಾರಿ ಅಧಿಕಾರಿಗಳು ಕಂಡು ಬರಲಿಲ್ಲ. ಅಲ್ಲದೇ ನೋಂದಣಿ ಇಲಾಖೆ, ಕಾರ್ಮಿಕ ಇಲಾಖೆ, ಬಿಸಿಎಂ ಇಲಾಖೆಗಳು ಹಾಕಿದ ಬಾಗಿಲನ್ನು ತೆಗೆಯಲೇ ಇಲ್ಲ..