ಇನ್ನೆರಡು ದಿನಗಳಲ್ಲಿ ಮಳೆ ಸಂಭವ

ಹಾವೇರಿ: ದಕ್ಷಿಣ ಒಳನಾಡಿನಲ್ಲಿ ಮಳೆ ಆಗುವ ರೀತಿಯಲ್ಲೇ ಬಿಸಿಲಿಗೆ ತತ್ತರಿಸುತ್ತಿರುವ ಉತ್ತರ ಒಳ ನಾಡಿನಲ್ಲೂ ಇನ್ನೆರಡು ದಿನಗಳಲ್ಲಿ ಮಳೆ ಬೀಳಲಿದೆ ಎನ್ನುವ ಮಾಹಿತಿ ಕರ್ನಾಟಕ ನೈಸರ್ಗಿಕ ವಿಪತ್ತು ಕೋಶದ ಮೂಲಗಳಿಂದ ವ್ಯಕ್ತವಾಗಿದೆ.

ಕನಿಷ್ಟ 35 ರಿಂದ 38 ರ ಆಸುಪಾಸಿನಲ್ಲಿರುವ ತಾಪಮಾನದ ಪ್ರಕಾರ, ಚಿತ್ರದುರ್ಗ ಮತ್ತು ಡಾವಣಗೇರಿ ಹೊರತುಪಡಿಸಿ ಹಾವೇರಿ ಸೇರಿದಂತೆ ಬೀದರ್‌ವರೆಗಿನ ಉತ್ತರ ಕರ್ನಾಟಕದ ಭಾಗಗಳಲ್ಲಿ ಮಳೆ ಬೀಳುವ ಸಾಧ್ಯತೆಗಳಿವೆ. ಈ ಮಳೆ ಭೂಮಿಯನ್ನು ತಂಪಾಗಿಸಿದರೂ ಬಿತ್ತನೆ ಮಾಡಲು ಪೂರಕವಾಗುವುದಿಲ್ಲ ಎನ್ನುವ ಮಾತು ವ್ಯಕ್ತವಾಗಿದೆ.

ಈ ಮಳೆ ಮುಂಗಾರು ಆಶಾದಾಯಕ ಎನ್ನುವ ಮಾತುಗಳಿಗೆ ಅಪವಾದವಾಗಲಿದ್ದು, ಈ ಬಾರಿಯ ಮುಂಗಾರು ಜೂನ್‌ ತಿಂಗಳಲ್ಲಿ ಆರಂಭಗೊಂಡರೂ ಜುಲೈ ತಿಂಗಳು ಸೇರಿದಂತೆ ಮುಂಗಾರು ಆರಂಭದ ಜೂನ್‌ ಜತೆ ಜುಲೈ ತಿಂಗಳ ಮಳೆ ಸರಾಸರಿ ಪ್ರಮಾಣಕ್ಕೆ ಕೊರತೆಗೂ ಕಾರಣವಾಗಲಿದೆ ಎನ್ನುವ ಅಂಶ ಆತಂಕಕ್ಕೆ ಕಾರಣವಾಗಿದೆ.

ಅಂಡಮಾನ್‌-ನಿಕೋಬಾರ, ಕೇರಳ ಮತ್ತು ಆಂಧÜ್ರದಿಂದ ಪ್ರವೇಶಿಸುವ ಈ ಬಾರಿಯ ಮುಂಗಾರು ಎಲ್‌ ನೀನೋ ಚಂಡಮಾರುತ ಕಾರಣಕ್ಕೆ ತಾಪಮಾನದಲ್ಲಿ ಏರಳಿತ ಸಾಧ್ಯತೆಗಳ ನಿರೀಕ್ಷೆಗೆ ಸಾಕ್ಷಿಯಾಗಲಿದೆ. ನಂತರದ ಮಳೆ ಸಮೃದ್ಧವಾಗಲಿದ್ದರೂ ದೇಶದಲ್ಲಿ ಈ ಬಾರಿಯೂ ಮುಂಗಾರು ಮಳೆ ಪ್ರಮಾಣದಲ್ಲಿ ಅಲ್ಪಮಟ್ಟಿನ ಕೊರತೆ ಎದುರಿಸಬೇಕಿದೆ ಎನ್ನುವ ಎಚ್ಚರಿಕೆ ಸಹ ವ್ಯಕ್ತವಾಗಿದೆ.

ಮಳೆ ಮತ್ತು ತಾಪಮಾನ ಋುತುಮಾನ ಏರು-ಪೇರಿಗೆ ಕಾರಣವಾಗಲಿದೆ. ಈ ಹಿನ್ನೆಲೆಯಲ್ಲಿ ರೈತರು ಕೃಷಿ ಇಲಾಖೆ ಮೂಲಕ ಮಾಹಿತಿ ಪಡೆದು ಬಿತ್ತನೆ ಕೈಗೊಳ್ಳುವುದು ಉತ್ತಮ ಎನ್ನುವ ಸಂದೇಶ ಸಹ ರವಾನಿಸಿದೆ. ಇನ್ನೆರಡು ದಿನ ಗುಡುಗು-ಸಿಡಿಲಿನ ಆರ್ಭಟದೊಂದಿಗೆ ಸುರಿವ ಮಳೆ ಬಿತ್ತನೆಗೆ ಹದ ತರಬಹುದೇ ವಿನಃ ಬಿತ್ತುವುದಕ್ಕಲ್ಲ. ಹಾಗೆಂದು ಕೈಕಟ್ಟಿ ಕೂಡ್ರುವುದೂ ತರವಲ್ಲ ಎನ್ನುವ ಗೊಂದಲ ಸಹ ವ್ಯಕ್ತವಾಗಿದೆ. ಕಾಲ ಕಾಲದ ಋುತುಮಾನ ಪರಿಸ್ಥಿತಿ ಅವ ಲೋಕಿಸಿ-ಆಧರಿಸಿ ಹವಾಮಾನ ಮುನ್ಸೂಚನೆ ನೀಡಬಹುದೇ ವಿನಃ ನಿಖರವಾಗಿ ಹೇಳಲು ಅಸಾಧ್ಯ ಎನ್ನುವ ಸ್ಪಷ್ಠನೆ ನೀಡಿದೆ.